كُـن سَعيـدا Be Happy

السلام عليكم ورحمة الله وبركاته ،

اليوم عندي ثرثرة طويلة شوي 

" آشياء بسيطة تجلب سعادة كبيرة "

انا عندي ثقة تامة ان كل شخص فينا قادر يخلق سعادة لنفسه وللي حوالينه ،

اذا انتي قررتي تكونين سعيده بتكونين سعيده

في دراسه بعلم النفس تقول ان الانسان هو اللي يجلب الحظ الجيد والسي بحياته

لما تكونين متفاءلة و عندج ثقة بربج وقلبك مؤمن بقضاءه هني بتكونين مرتاحه وسعيده بحياتج

وفي أمور بسيطه نقدر نسويها نخلق جو لنفسنا ونغير مزاجنا

بالنسبه لي في أمور كثيره تغير مزاجي وتشعرني بالسعادة 

بختصرها لكم بـ ١٠ أمـور تشعرني بالسعادة : 

- الجوكليت و الآيس كريم

من آهم الاشياء اللي تعدل مزاجي و احس بالسعادة والراحة النفسيه
" احيانا لما اكون معصبه احتاج ايس كريم او جوكليت عشان اهدى مادري ليش بس له تاثير كبير علي " ومعلومة جميلة قريتها ان الشوكولاته تطيل عمر القلب ❤️ عاد ماوصيكم  هههههههه 

- افلام ديزني 

آحب اشوف افلام كرتون خصوصا اذا من والت ديزني فيهم كمية جماااال و قصص تروق الخاطر .. عالم الكرتون له سحر خاص و اعتقد مافي احلى من تخلقين جو سينما وانتي فالبيت " نفيش و شيبس و كاكاويات و ديزني ي سلاااام "

- كفر او غطاء جديد لـ موبايلي 

احب اغير كفر موبايلي بين فترة و فترة حسب مزااجي .. شعور حلو يجيني لما اشتري كفر / غطاء (( اتوقع جذي يسمونه ))   

واحاول اختار كفرات حلوه من ناحيه الالوان تفتح النفس او على كتابات تبث التفاءل 

- هدية بدون مناسبه 

اكثر شي مفرح لما تجيك هدية بسيطه وبدون اي مناسبه هني احس بالسعادة اكثر من الهديه اللي تقدم بمناسبه ، حلو لما تحسين ان شخص تذكرك ( شاف مثلا بوكيه ورد وعجبه وتذكرك وفكر يهديك ياها من بين كل الناس ) أما الهدايا اللي تقدم بمناسبه فهي أكيد جميله بس تحسين انها مدري رد جميل مثلا  ^_^"  وتكونين منتظره الهديه اكيد عكس لما تجيج بدون مايكون عندج خبر

- التسـوق / وما أدراك ما التسـوق 

هالشي هذا اتوقع يجيب السعادة للكل ؛)) انا اعشــق الـ shopping كل ماآملك قطيته فيه .. صج صج انا اعاني من هالمشكله حييل اصرف على التسوق بس صج شي يوووونس يفرررح ، والا شراايكم 

- التصوير 

عالم دخلته من فترة بسيطه حبيته و استمتعت فيه رغم اني مبتدئه بس قاعده احاول اتعلم ، وتلقوني احوس يمين ويسار عشان اصور وتطلع النهايه مرضيه والقى ردود فعل جميله هني احس بسعادة .

احب اتعلم اشياء جديده مااحب اقعد فاضيه تلقوني احوس واشغل نفسي ، لان انا شخصيه ملوله بسرعه ازهق والروتين يذبحني فـ تلقوني يا " أرسم " " أصمم " أصور " كل شي يخطر فـ بالي أسويه 

- لما يطق مطر بالنهار 

احب المطر لما يكون رشاش خفيف والجو نهار والشمس ماتبين من الغيوم بس نورها منتشر شي يشرح الصدر ويجيب السعادة ، في هالوقت تلقوني حتي لو تعبانه وابي انام مااقدر خلاص اصحصح ، تلقوني ودي اسوي كل شي ، يزززين هالجو صج صج يوسع الخاطر هذا اليوم الوحيد اللي أداوم وأنا مزاجي رااايق ☺️

- جمعة الأهل 

لما أهلي يجتمعون ونحط هالشغلات الزينه من قهوة وشاي و حلا و موالح وغيره ، والسوالف الحلوه وهاللمه ماكو احلى منها 

والله يدومها علينا وعليكم

- الطبخ 

أحب لما افصل وادخل المطبخ ههههههه واهم شي اطلع بـ نتيجه جيدة  .. بيني وبينكم ماعرف بالطبخ بس احب اخبص واجرب خصوصا بالحلا وهالسوالف .. بس بعد الزواج لا الحمدلله تسنعت  .. ان شالله اذا قدرت انزل لكم بعض من ابداعاتي 

- البيجاما الجديدة 

هههههههه مدري ليش بس صج تجيب السعاده لما اكون لابسه بجامة جديده .. واكتشفت مو بس انا اللي يحس بهالشي 

عقب ما آخذ آحلى شور ولوشنات وعطور وحركات آلبس بجامتي السعيده ✌️

وفي أمور كثيره اكيد بسيطة وتجيب السعادة مثل (( قراءة القرآن )) خصوصا لما الله يقدرني و اختمه قمة المتعه والسعادة و رضاء النفس . .

بس انا حاولت اختصرها بـ ١٠ أشيـاء تخصني واكيد تختلف هالامور من شخص لاخر . .

وهذي بعض المقولات عجبتني عن السعادة 

- إن السعادة قناعة ,فإذا رضينا بحياتنا وقنعنا بها, فقد بلغنا قمة السعادة . . 

سعادتك في ذاكرتك، وذاكرتك في ذكرياتك، فاجعلها جميلة تعش سعيداً . . 

- السعيد يرى الحاضر أفضل أيامه ، والمتفائل يرى مستقبله أفضل من حاضره ، أما المتشائم فينظر إلى الماضي باعتباره أفضل الأيام ولا يرى مستقبله إلا قاتماً . .

وبالأخيـر أتمنـى لگم أيـام ورديـة مع من تحبـون 3>