My trip to Europe | رحلتـي إلى آوروبا ❤️ الجزء ١

‏السلام عليكم ورحمة الله ،



أول شي مبارك عليكم الشهر وكل عام وانتو بخير ❤️

هذا ملخص بسيط لسفرتي الأخيره لـ أوروبا و لأنه طويل شوي بنزله على جزئين

في شهر مايو اللي فات كنت مسافرة جولة أوروبيه ، كنت حابه جولتي تشمل أماكن ومدن كثيره في دول أوروبا،
وكانت هذي سفرة الاحلام بالنسبه لي كنت انتظرها من مدة ومتحمسه لها وجهزت كل اموري والحمدلله تمت على خير


مخطط الرحله كان الوصول إلى مطار جنيف والتوجه إلى مدن الريف الفرنسي بعدها سويسرا ثم إلى النمسا والعوده من ألمانيا


في 22/5/2014 انطلقت رحلتي على الخطوط الاماراتيه من الكويت إلى دبي " ترانزيت ساعتين " بعدها إلى مطار جنيف " سويسرا "

كنا مأجرين سياره و حاجزين كل فنادقنا ومرتبين أيامنا اللي بنقضيها في كل منطقه عن طريق موقع ( بوكينق ) و أكيد رحلتنا ماتكتمل بدون الـ ( قارمن ) اللي ضبطنا فيه كل مناطقنا اللي نبيها و أماكن الفنادق
بس علينا نشغله و نحدد الوجهه وننطلق بإذن الله

وأنصح الكل صراحه اذا بتروحون دول أوروبا اخذو سياره لكم مع القارمن واستمتعو بالقياده والطريق سهل وممتع
والمناظر تبارك الله خيااااال ، سبحان الله على قولة جدتي هذي جنتهم بالأرض ، طبيعة صراحة يُحسدون عليها

المهم وصلنا مطار جنيف استلمنا السياره و انطلقنا إلى مدينة ( ديفون ) مدينة فرنسيه " الريف الفرنسي " على حدود سويسرا وتبعد نص ساعه طريق

ديفون مدينة هاااااااديه جدددددا وأجواءها دااايم ممطره قعدت فيها يومين
 وطول المده كانت الأجواء غايمه و روقااااان و رومانسيه ❤
هالمدينة ريفيه جدا مافيها مولات و السيارات قليله مافي زحمة و ازعاج
بالنسبه لشعبها اشوفه جاد جدا ماعرف احس انهم غير ودودين حتى لما كنت اكلمهم وابتسم ابدا مايبتسمو
دايم اسمع عن هالشي بالنسبه لشعب فرنسا عامةً انهم غير ودودين

بس بالرغم من هذا حبيت الهدوء وحبيت طبيعتها الخلابه و جوها وتمنيت اني قضيت ايام اكثر فيها
بس كان لازم نكمل طريقنا ونروح لمدينتنا التاليه
ان شالله اذا ربي سهل راح تكون لي زياره ثانيه لها

بعدها انطلقنا إلى ( شامونيه ) ايضا تنتمي للريف الفرنسي
 وهي مدينة مرتفعه ويقع فيها جبل الـ ( مون بلان ) الشهير ، طبعا كلنا نعرف هالماركة وهي سميت باسم هذا الجبل الثلجي

في هالمدينة وأحنا فيها نشوف منظر الجبل الثلجي من النوافذ و كان شي جميل
بارده المدينه اكيد لانها على جبل ، تشبه ديفون بهدوءها رغم اختلافها بالاجواء و المناظر فيها لانها محاصره بالجبال من كل الجهات ،
هالمدينة تتميز بنشاطات كثيره لمحبي تسلق الجبال و التزلج وركوب الدراجات
و تقدرون تركبون التلفريك وتصعدون للجبل

كان خاطري أروح بالتلفريك واشوف هالجبل الشهير بس كل مره نروحله يقولون الجو مو مناسب فـ يوقفون رحلات التلفريك لان أحيانا الأجواء تكون غايمه لدرجة تصعب الرؤيه أو رياح وغيره

بس زرنا مدينة قريبه نوعا ما من شامونيه وهي ( آنسي ) مدينة فرنسيه و كانت مدينة نابضه بالحياة ،
 فيها حركة كثيره وناس رايحه وراده
عندها أروع منظر شفته وعشقتها من أول نظره ، بحيرتها الخلابه ومنظر الجبال خلف البحيره

طبعا ركبنا القوارب الصغيره و خذينا جوله في قمة الروعه في البحيره ،
بعدها خذينا لنا قهوة وقعدنا في الحديقه اللي أمام البحيره ، وفيها محلات للي يبي يتسوق
بس أنا مانعه نفسي منهم لأني خصصت آخر ٤ ايام في ميونخ عشان اتسوق

وبعد رحت الزحليقه الصيفيه في الشامونيه
وهي زحليقه عملاقه تصعدون إلى أعلى التل وانطلقووووو بالزحليقه كان شي ممممتعه وناسه حسيت بالطفوله 😅
هذي الزحليقه للكبار واذا معاكم صغار ماينفع يركبون بروحهم لازم أحد كبير معاهم
هي مثل القارب صغير جدا يكفي لشخص كبير وطفل وفي كاميرا تنتظركم بالطريق
واذا نزلتو منها تروحون تشوفون صوركم واذا عجبتكم تشترونها

بعدها أنطلقنا إلى مدينتنا التاليه
( نيوشاتل ) مدينة سويسريه وكنا حاجزين في " منتجع " شاليه داخل البحر
يعني حوالينا كله بحر في بحر ، المكان كان راااقي جدددا وواسع ومنظر البحر يجيب السـعــادة

أسم المنتجع للي حاب يروحله ( Hotel Palafitte )

خلال إقامتنا في المنتجع رحنا لـ مصنع الشوكولا وكانت رحللله لذييييييذه دخلنا المصنع

في البدايه حكو لنا عن تاريخ الشوكولا بطريقه فيلم متحرك نمشي و نشوف أحداث القصه كانت فكرة جمييييله
حلو ان مو بس نسمع القصه لا نشوفها قدامنا ، بعدها دخلنا إلى منطقه تحضير الشوكولا و أشكالها وأنواعها
، شفناها أول ماكنت الشوكولا بذور من الأشجار بعدها تحولت لـ سائل و شكلوها بقوالب و اضافوا لها المكونات الآخرى

و المنطقه الأخيره وهي الاكثر تشويقا " تجربة أنواع الشوكولا " اللي يعدونها بالمصنع ،
حاطين مجموعه كبيييره من أنواع الشوكولا ونمشي ونتذوق كل الأصناف ، وقتها اتوقع ارتفع السكر عندي مليون هههههههه

وعند مخرج المصنع في متجر يبيع شوكولاته وخذيت هدايا لأهلي

حاولت كثر ماأقدر إني ما أطلع وأستمتع بأجواء الشاليه والبحر لاني أحب الاجواء هذي
قداام البحر و مسويه قهوتي و كاكاوياتي p: والله مافي آحلى من البحر

بالنسبه للي يحبون القهوة العربيه وما يستغنون عنها الحين موجود الدلة الكهربائيه
اخذيها معاك و اخذي القهوة والهيل و ابد سويها متي مابغيتي

سههله جددا انا النوع اللي خذيته في مؤقت للوقت اذا جا وقت احط الهيل يدق مثل المنبه
ان الحين حطي الهيل و اذا خلصت ينبهك انها خلصت ، والحلو ان فيها وضع التسخين يعني ماتبرد القهوة ابد
انا حطيت القهوة والهيل في أكياس عشان ماتاخذ حيز بالشنط

ايضا كانت لي زيارة سريعة لمدينة ( مونترو ) وتغدينا فيها بمطعم لبناني
و تمشينا في المدينة و قعدنا قدام البحر ((( كم مره قلت قعدنا قدام البحر ههههههههه ماعندي غيرها )))
وكانت جوها جميل ، يمكن ماطولت فيها بس عجبتني فيها مول صغير اذا كان ناقصكم شي تبون سوبر ماركت داخلها والا خطوط للموبايل والا سوالف الشاور واللوشناات

الأجواء في سويسرا بالذات كانت غالبها ممطره ، لدرجة حسيت بملل لان المطر يحكم علي اقعد احيانا اذا كان قوي
بس بشكل عام مطرهم يكون خفيف وناعم والسما تمطر دقايق وبعدها يصفى الجو ، دايم خلوا مظلات معاكم بالسياره لان تحتاجونها كثير

( إنترلاكن ) رابع محطاتنا وهي مدينة سويسريه ومشهوره كثير عند العرب والخليجيين بالذات
الحلو فيها تقدرون تحصلون مطاعم عربيه وتركيه وهنديه

و زرنا أكبر شلال "قس باخ " اعتقد جذي اسمه ، فعلا كان كبيييير حيييل الشلال و كان الصعود له متعب جددددا ، النزول للشلال كان اسهل بس الصعود كان هلاااااااااااك ، وربي اختلفت مشاعري من الآلم أضحك وأبكي ههههههه
عارفين شعور لما رجلك خلاص تقول أسمحيلي ما اقدر امشي زود هههههه بس الحمدلله وصلنا لسيارتنا بسلام

وفي اليوم الثاني لنا في انترلاكن رحنا لقمة جبل " تتلس " بعد ما تأكدنا ان الجو مناسب للصعود رغم انهم قالو لنا ان الجو غايم نوعا ما
وصلنا للمحطة و حطينا السيارة في الباركينق ونزلنا نقطع تذاكر للتلفريك
الجبل هذا له ٣ قمم أعلاها قمتنا اللي نبيها " قمة تتلس " صعدنا بالتلفريك والمناظر من فوق تجننننن

بس لما صعدنا فعلا كانت الرؤيه سيئة بسبب الغيوم بس كملنا رحلتنا وحاولنا نستمتع بالثلج كثر مانقدر
اهم شي اني بردت حرتي وكتبت اسمي بالثلج هههههه كان حلم الطفوله

وبعد زرت " البحيرة الزرقاء " وسموها في هالأسم يقولون من كثر صفاوة البحيره نقدر نشوف نفسنا فيها كأنها مرايه

طبعا هناك كل شي دخوله بتذكرة ، المهم قطعنا تذاكر ودخلنا .. فعلا البحيره كانت سااحرة ومسوين حوالينها نشاطات مثل اللي حاب يركب قارب صغير و في مطعم و في ركن للي حاب يشوي
 تجيب اكلك و يعطونك حطب ونار واستمتع بالشواء


وفي مدينة جميله زرناها " لوزيرن " حبييييتها حييل لانها كسرت جو الارياف
مدينة فيها حيويه وحركة ناس و كافيهات و محلات ماركة شهيره
تقعدون قدام البحر وفي عربات الآيس كريم حواليكم واستمتعو بالآجواء



ويكفي لهذا الحد تعبت وأنا أكتب وأتذكر ههههههه



آشوفكم بالجزء الثاني ❤️