السلام عليكم ورحمة الله ،
في تدوينة قديمه كتبت عن طريقة الطلب والتسوق من النت وكان الموضوع مختصر جدددا ،
بحاول هنا مو اعيد كتابته لا بس اوضح نقاط اكثر ماوضحتها لكم سابقا مع جوله بسيطه بأهم مواقع التسوق بالنت والمضمونه وأنا جربتها بنفسي
أولاً وقبل كل شي انا فعلا اتمنى من كل بنت وكل شخص انه يتعلم طريقه الطلب والتسوق من النت لعده اسباب منها:
• الراحه ~ وانتي في بيتك وغرفتك وتتسوقين من اشهر المحلات والماركات في العالم تتنقلين بكل سهوله وبساطه وراحه بينهم هذي غير المتتتتتعه بشكل ماتتخيلونه وانتي تتسوقين احساس رهيييب صراحه
• فرق الأسعار ~ بشكل عام المواقع الاجنبيه ارررخص بكثييير من المحلات اللي عندنا هنا يزيدون بالاسعار عشان اجار المحل والشحن و و و و ~ شوفو بنفسكم واحكموو ابسطها محل ماك للميكب شوفو عندنا الروج ينباع بكم وشوفو بالموقع بكم يعني انتي وفرتي مبلغ تستفيدين منه حتي لو كان الفرق ١٠ دولار شي طيب
• البضاعه جديده وبعضها غير متوفره ~ بعض المنتجات اللي عندنا تجي متاخر بعكس برا تنزل اول باول الجديد احنا بعد شهور يالله ينزل هذا غير بعض الماركات والمنتجات اللي مو متوفره عندنا بالمررره
• نرتاح من نصب التاجرات ~ صحيح الرزق على الله بس جد بعض التاجرات اللي يهديهم غير انها تبيع المنتج بـ دبل سعره غير ان بعضهم نصابات ويضحكون على البنات بالتقليد والاشياء المزيفه والغش التجاري فانتي ريحي راسك وتعلمي بنفسك ووفري فلوسك
وحبيت أذكركم أن عشان تطلبين من النت وتتسوقين انتي بحاجه حق فيزا خاصه للشوبينق تطلعينها من اي بنك ، وانتبهي تحطين فيها مبالغ كبيره حطي دايم الحد المطلوب للشي اللي بتشترينه عشان سبحان الله اذا انسرقت هذي البطاقه او تهكر حسابك بالموقع مايقدر احد يستخدمها لانها رصيدها فاضي صفر ، انا هذي طريقتي دايم اتسوق واختار اللي ابيه من الموقع بعدها اشوف كم الحساب كامل مع الشحن وبعدها احول المبلغ المطلوب لبطاقة الفيزا فقط لاغير ، ومن باب الامان ايضا انك تسجلي في موقع paypal هذا الموقع فكرته انه يكون الوسيط بينك وبين الموقع اللي بتشترين منه اذا كنتي ماتعرفين اذا هالموقع مضمون او لا حتى ماتكون بيانات بطاقتك في هذا الموقع الغير مضمون ، انصح فيه وبشده استخدمته انا شخصيا مع كم موقع كان اسيوي وخفت صراحه ان الموقع يسرقني والحمدلله تمت عمليه الشراء بأمان . .
من المواقع اللي أعشقها ومضمونه هي نوردستروم موقع امريكي وهو بالاساس محل مشهور موجود بامريكا فقط حسب معلوماتي ، هالموقع أحبه لان يوفرلي ماركات كبيره مثل فيندي و سان لوران و ڤلنتينوو وغيرهم وهذي الماركات اصليه ١٠٠٪ وعندهم بعد ماركات ميكب مميزه مثل انستازيا بڤرلي هيلز و ماك و ميكب فورايفر كلهم في مكان واحد ، طبعا عندهم قوائم اختاري منها اللي تحتاجينه وايضا عندهم خصومات طول السنه مثل باقي المواقع وهذي الخصومات ممكن تكون كبيره نسبتها وممكن تكون متوسطه بالذات لاتفوتكم خصوماتهم بالكريسماس راس السنه خصومات جددا رائعه مو بس في هالموقع بكل المواقع . .
آسوس ايضا من المواقع المشهوره والمضمونه موقع بريطاني يجمعلك كل احتياجاتك من ملابس وشنط واكسسوارات وشوزات ومواد تجميل ، مافيه ماركات كبيره كل الموجود ماركات متوسطه جيده السعر ، تشكيلتهم بالفساتين والتنانير رهييييبه دايم تعجبني وماركات الميكب الموجود اغلبها ماركات بريطانيه . .
موقع امريكي وهو محل كبير ومعروف موجود في كثير اماكن منها تلاقينه في دبي ، يوفرلك الماركات الغاليه من شنط وملابس وشوزات واكسسوارات وعطور واغلب الماركات الكبيره موجوده فيه . .
ايضا موقع مختص بالماركات الكبيره الغاليه ويشمل اغلب المصممين الكبار من شوزات وملابس و شنط وغيرهم . .
هذا موقع امريكي الى الان ماشريت منه بس عنده اشياء كثيير حلوه ورخيصه وشفت كثير تاجرات يعرضون نفس بضاعته من فساتين وملابس وشوزات . .
وما انسى حبيب الكل أمازون اللي يوفرلك كل مايخطر على بالك باسعار مناسبه من ملابس وشنط والكترونيات وكتب ومجلات وديكورات ومواد تجميل وادويه شاااامل كل شي هالموقع جممميل جدا وكثير حسابات بالانستقرام تطلب منه وتبيعه عليكم بسعر اغلى واكيد هذا من حقها لان هي اللي تعبت وطلبت بس انا افضل دايم الواحد يعتمد على نفسه . .
وفي كثير مواقع لمحلات كبيره مثل زارا | مانقو | اتش اند ام | توب شوب | فورايفر ٢١ ، ماعليك الا تكتبين اسم المحل اللي تبينه بقوقل وبيطلعلك موقعه وكلها مواقع مضمونه باذن الله ، ولا تنسين الخصومات الكبيره والعروض الهائله مع نهايه كل سنة ميلاديه في شهر نوفمبر تقريبا تبدأ الخصومات في كل المواقع والمحلات إلى بدايه السنه الجديده جد تحصلين عروض مذذذذهله واسعار تنافسيه قويه ، كتبت تدوينه سابقه عن مشترياتي من عروض راس السنه اللي يسمونها الجمعه السوده BlackFriday في هاليوم كل المواقع تسوي خصومات كبييره توصل الى ٧٠٪ واكثر فرصه صراحه ماتتفوت . .
ومثل ماقلت لكم اللي بيعرف طريقه التسوق والتسجيل بالمواقع يضغط على رابط التدوينه تحت
وبس
آشوفكم على حب ❤️
جربت مرة أشتري من موقع سيفورا الأمريكي و طلبي تكنسل 3 مرات , من أفشل المواقع اللي جربتها =\
ReplyDeleteموقع سيفورا انا موعارفه شنو مشكلته بالضبط مرتين يتكنسل طلبي وجد حزنت كثير وبعد مده قلت خليني اجرب مره ثالثه وسبحان الله ضبطت ماعرف شنو السبب بس مرتين بعدها ضبطو معاي
Deleteأضيفي الى قائمتك
ReplyDeletewww.neimanmarcus.com
www1.bloomingdales.com/
تدوينة مفيدة
شككرا 💜
Delete