فضفضة ~ روتيني اليومي بأيام العطله + شويه سواليف

السلام عليكم ورحمة الله ،

كل عام وآنتو بخير 

ورجعت لكم مع تدوينه الفضفضه وشويه سواليف بسيطه
لاني ماكنت حابه اغيب عنكم كثير

صايره الفتره اللي فاتت كميه خمول وكسل ومالي خلق اسوي شي ومابي افكر وودي اسكر المدونه والسناب واشيا كثيره من هذا القبيل للاسف :( يمكن لاني حسيت عطائي قل وحماسي تلاشى مااتمنى هالشي ولكن هذا اللي حصل ، فترة ان شالله وتعدي وبشكل عام اشوف الكل مو مثل عطاءه بالسنين اللي فاتت كثير بلوقر اتابعهم خفوو بالتدوينات وهذا امر سيئ ولكن ماينلامون صار الانستقرام والمدونه مكان مهجور نوعا ما والتفاعل بسيييييط جدا بعكس العطاء . .

خليني اقولكم عن روتيني اليومي لهالفترة 

بما اني في عطله فـ صاير نومي معتفس شوي اصحى هالظهر تقريبا .. / 

~ أقوم اغسل وجهي بـ الصابونه الافريقيه السوده

الصابونه حلوه وتنظف بقوه حتى احس تجفف الدهون في البشرة يعني اذا بشرتك دهنيه استخدميها قبل الميكب
ولازم ترطبين بشرتك بعدها لانها فعلا تجفف البشرة ، تحتوي الصاوبنه حسب ماكتب فيها على فيتامين ي وتناسب البشرة الدهنيه واللي يعانون من اكزيما ، طلبتها من فتره من موقع آيهيرب  . . 

~ غالبا ماآكل على طول لا تلقوني اشرب شي دافي " شاي حليب " عشششقي الابدي ومااقدر ابدي يومي بدونه ، استغرب من اللي يبدون يومهم بقهوه احس ماتتحمل معدتي القهوه عالريق :/ بعدها يبدا فطوري وبالغالب أفضل البيض مع البهارات طريقه لذييذه وكتبتها لكم سابقا وبعيد كتابتها عالسريع هنا . .

..[ وصفة بيض بالبهارات ]..

• بيضه نكسرها في وعاء ونحط معاها 

( م ك اوريقانو اللي هو زعتر بري + 1/4 م بهارات مشكل + ملح + فلفل اسود )

• في مقلاه النار نحط زيت زيتون ونقطع فلفل اخضر وطماط صغار ونقليهم بعدها نصب خليط البيض فوقها 

• نرش جبن موزريلا بالوجه ونغطي البيض من فوق عشان يذوب الجبن 

وناكل معاها توست او خبز اللي يعجبكم وبس 

عليكم بالعافيه 💜

~ بعدها اشوف احتياجات طفلي والبيت وطول الوقت اقضيه معاه وقبل يجي وقت العشى اكون مخططه شنو بسوي لازم والا اضيع ماعرف افكر بنفس الوقت شنو اطبخ لازم قبلها اقل شي ساعه ماعرف ليه بس لازم اكون مخططه عشان مااضيع واعرف احتياجاتي ، والاصعب لما يكون زوجك له ذوق معين في الاكلات ويكره اكلات انتي تحبينها "•_• 

وطفلك له ذوق آخر بالاكل ماتعرفين ذوق منو تراضين عشان هالسبب لازم يكون تخطيط مسبق وتجهيزات لاكثر من طبق . . 

~ بعد وجبه العشى أجهز طفلي للنوم من بيجامه وتفريش اسنان ونقعد نلعب شوي ، احاول كثر مااقدر اقلل من استخدام الايباد لطفلي ونلعب بالالعاب يدويا ، في السابق لان كانت حالة طفلي صعبه شوي ومايقدر يقوم باي حركه فالايباد هي وسيلة الترفيه الوحيده له لكن الان الحمدلله حالته في تطور ويقدر يتحرك شوي ويلعب بنفسه ،

ويجي وقت نوم طفلي وادخله فراشه . . 

~ بعدها آخذ شاور وانا افضل الشاور دايم نهايه اليوم احس يشيل عندي تعب النهار وانام نظيفه ومرتاحه ، بالشاور عندي قسمين اما شاور طويل او شاور سريع ، الطويل يكون مره او مرتين بالاسبوع فيه استخدم سنفرات وتفريك عميق وكتبت عنه موضوع قديم ، اما الشاور السريع هو اللي استخدم فيه الصابونيه ومقشر ناعم بسيط وبعد مااخلص ماانسى زيت جونسون وشويه مسك للجسم او اي سبريه جسم . . 

~ الان يبدي وقتي المفضل ووقت كل ام اكيد بعد ماينامون الاطفال ، اجهزلي مطاطير القهوة العربيه والشاهي وماننسى خرابيط الليل من موالح وبساكيت وجوكليت واشيا من هذا القبيل ، اتابع فيلم او برنامج عالتلفزيون او فيلم عالنت . .

~ ولانه الجو هدوء واسترخاء تلاقوني اشغل شموعي والفواحه العطريه واحط في وجهي ماسكات وكريمات هذا بشكل يوم وترك تقريبا وهالفترة استخدم ماسك قلام قلو البرتقالي للنضاره ومنتظره اخلصه عشان ابدي في ماسك كيلز ايضا للنضاره والحمدلله في العطله اسهر تقريبا الى صلاه الفجر اصليها وأنام . .

وهكذا تقريبا روتيني كل يوم 

والحمدلله على نعمه العطله

 ونعمه الصحه والعافيه

والدوامات عالابواب ياأهل المدراس والجامعات 

ربي يوفقنا جميعا ويكتب لنا الخير في الايام الجايه

وآشوفكم على حب 💜