سوالف ~ گل يَوم هي فُرصـة ثانِيـة

السلام عليكم ورحمة الله ،

 

 

" I didn't know what I wanted to do, but I always knew the woman I wanted to be "

" لا أعرف ماذا أريد أن أفعل ، ولكني دائما أعرف المرأة التي أود أن أكونها " 

كثيير منا يعيش بتخبط مو عارف وين يروح بدون أهداف بدون طموحات ، جاتني هالفترة ومريت فيها وربما مازلت أعيشها أحيانا وأعيش هذا الصراع ، كنت فعلا ما أعرف شنو بسوي و شنو أخطط عليه مافي هدف معين أهداف كثييره براسي وأفكار كبيييره ولكن اللي اعرفه اني ماكنت أبي أكون شخص عادي أبي اكون شخص مهم مؤثر . . آشلون مادري !

كنت أسعى ومازلت للـتميز و للـنجاح للـوصول لأحلامي دايم أتخيل شكلي إمرأة ناجحه ومهمة في المجتمع 

تخبطت في أكثر من شي وكان فيني الأستعجال ابي بسرعة أوصل للي ابيه سويت أكثر من شي بنفس الوقت اقتحمت أكثر من مجال بنفس الوقت " وهذا خطأ طبعا " صاحب بالين كذاب مافي نجاح يجي بسرعه ومافي نجاح يجي وانتي منشغله بأكثر من شي ، كان لازم يكون تركيزي على أمر واحد وأنتظر نجاحه بعدها أفتح لي مجال أخر ، حاولت أعدل الوضع شوي وأركز اهتماماتي وأرتب أوراقي مثل مايقولون وأخطط بتمهل وبعقل أكثر ، رغم أن أحيانا الله ياخذنا من الطريق اللي كنا مخططين له وقعدنا نفكر ونجهز له إلى طريق أخر فيه خير لنا أكثر 

" Everyday is a second chance "

" كل يوم هي فرصة ثانيه " 

لا تقولين حياتي أنتهت لمجرد أن مر عليك يوم سيئ " أو أسبوع أو شهر " دامك صحيتي في يوم جديد هذي نعمة من الله وفرصة ثانيه للعيش وللتفاؤل وللنجاح وانتهاز الفرص، مافي شي يوقف عشان خسرتي أو فشلتي لان الحياة جولات والخساره هي خساره الروح ، عندي ثقه كبيره بأن في هذي الدنيا كل شي يتعوض إلا . . ❤ الجنـة ❤ 

خسارة الجنة هي الخسارة الكبرى ، لكن دامك عايشه في هالدنيا وحافظه ربك مافي شي اسمه " خسرتي " لان يمكن لاحقا تكتشفي أنك غلطانه هذي ماكانت خساره كانت خيره لأمور أفضل منها وأنجح ، واخذيها مفهوم في هذي الدنيا لازم تفقدين شي وتحصلين على شي مافي شي ثابت مستحييييل تحصلين على كل شي بدون ما تضحين بشي ممكن تضحين بوقتك بصحتك بأمور مادية أو معنوية عشان تنجزين الشي اللي سعيتي له 

" Change your thoughts and you change your world "

" غيري أفكارك وبتغيريين عالمك " 

اذا كنتي من النوع اللي عنده أفكار محبطه ومتشائمة انسي تماما انك بتنجحي وتتطوري وتعيشي سعيده ، غيري أفكارك عشان يتغير عالمك وتصير حياتك اسهل ، كوني إيجابيه قدر الامكان وازرعي هذي الأفكار الايجابيه وهذا التفاؤل من حولك ، بتشوفي ان نظرتك لما حولك تغيرت بشكل كبير ، لا تقولي " مستحيل " لان مافي شي مستحيل هذي كلمة خلقها الناس الضعفاء اللي ماعندهم حجة للقيام بـ هالشي فقالو مستحيل ، الناس وصلو القمر وهذا أنجاز كانو يقولون عنه مستحيل يصير هالشي فما بالك في أحلامك ! 

هل تعتقدي ان حصولك على الوظيفه اللي تتمنينها مستحيل ! أو هوايتك أيا كانت ( رسم / تصوير / تصميم ) مستحيل تصيرين في هالمجال اسم معروف وناجح ! أو تكملي دراستك وتاخذين شهادات عليا ! 

لا طبعا مو مستحيل ولكن مو سهل بمعنى وانتي جالسه في غرفتك ومابذلتي الأسباب بتنجحين أو بتحصلين اللي تتمنين لا طبعا 

أبذلي اسباب النجاح والوصول لهدفك وحاولي أكثر من مره ، تمسكي بحلمك وأسعي فيه الطريق اكيد مو سهل بتواجهك " عقبات / فشل / صعوبات " ولكن مو هذي النهايه لا تستسلمي لان النهاية لازم تكون اللي انتي حلمتي فيها وتمنيتيها 

" Don't give up; the beginning is always the hardest "

" لا تستسلم البدايات دائما الأصعب "

أقري قصص من الكتب أو من النت عن المشاهير وبداياتهم واشلون وصلو للمكان اللامع اللي هم فيه ، ابد ماكان سهل وكثييير انا اندهشت من بعض القصص وين كان هالشخص واشلون صار شنو واجهه وأشلون تغلب عليها ، قصص ملهمه للغايه تعطي أمل كبييير وحافز ابتعدي عن سوالف وقصص الفشل اللي ماراح تفيدك دايم شوفي الناجح واللي اعلى منك هذا يعطي دافع انك توصلين له وأحيانا الغيره الحسنه مفيده أنك تغاري من نجاح شخص وتسعين عشان تكونين أفضل منه 

نقطة مهمه : الغيره الحسنة هي اللي تغارين من نجاح شخص وتتمنين تكونين أفضل حال منه بس أكيد مع انك تتمنين الخير له يعني ماتحسدينه وتتمنين له السوء والفشل لان دااااااايم تذكري " وعلى نيـاتكم تـرزقون " صاحب النية الطيبه دايم ربي يبارك له ويوفقه ويسهل طريقه 

" Believe you can and you're halfway there "

" ثقي بأنك تقدري وبتكوني في منتصف طريقك "

الثقه بالنفس من أساسيات النجاح مافي حد ناجح ما كان واثق في نفسه من البدايه وواثق بـ حلمه ، مهما كانو الاشخاص اللي حوالينك كوني واثقه الثقه هي اللي بتعطيك القوة والدافع للاستمرار صدقيني بدون ثقه ماراح توصلين للي تبينه ، كوني دايما محاطه بناس ايجابيه ناجحه واثقه من نفسها هذا راح يزيدك ثقه بالنفس ويعطونك طاقه ايجابيه 

" Do one thing every day that scares you "

" سوي شي واحد كل يوم أنتي تخافين منه "

فكرة حلوه وحاولو تجربونها ، كتبي لك لسته بأشياء تخافين منها مثلا : 

- أخاف اجرب أكل جديد 

- أخاف أمسك القطط

- أخاف من تحليل الدم 

- أخاف ركوب الطائرة

- أخاف من الأختلاط بالآخرين

. . . إلى آخره

بعدها أمسكي نقطة نقطة وحاولي تتغلبي على نفسك وعليها بحيث أنك كل يوم تتغلبين على شي ، ليش لأ !

جربي أكل جديد في أكله معينه مثلا ماتحبينها عطيها فرصه ثانيه جربيها وأكليها الأنسان يتغير مع الوقت و حتى ذوقه يتغير يمكن صار الوقت اللي تعجبك فيه هذي الأكله ، في ناس كثيره اعرفها ماتحب تجرب اكل جديد خلاص هي حابه كم طبق ماتاكل غيره ، بالعكس عطي نفسك فرصه تجربي أشياء جديده وتختبري نفسك ، تخافين أو تخجلين من الاختلاط بالآخرين تغلبي عليها أنتي مو عايشه لحالك أنتي جزء من مجتمع كبير مجبوره تخالطينه وتتعايشي معاهم زملاء دراسة أو عمل أو حتى ناس ألتقيتيهم في مناسبه ما ، كوني اجتماعيه تعرفي عن ناس جدد كوني علاقات جديده لاتتقيدين بعلاقات قديمة اكسري حواجز الخجل مع الناس كوني لبقـه ان تكلمتي فقولي خير أو الصمت لا تتكلمين عالفاضي والمليان خلي كلامك على شي تفهمين فيه لا تكونين دائما المستمعه للحديث ولا تكوني المتحدثة دايما كوني متوازنه واكيد مافي أحلى من التعرف على صداقات جديده . .

 الانسان بطبعه متغير مافي شي يتم على حاله حاولي دايم تكتسبين أشياء جديده من ثقافه ومعلومات جديده أو هوايات جديده ، طوري من نفسك ومن قدراتك وتغلبي على عجزك وضعفك لايكون شي مسيطر عليك تحرري من قيودك وشوفي الحياة بمنظور جديد 

بعض مقولات أعجبتني :

"The things you do for yourself are  gone when you are gone, but the things you do for others remain as your legacy "

" الأشياء اللي تسويها لنفسك تذهب مع ذهابك ، ولكن الاشياء اللي تسويها للآخرين تبقى كالأرث "

" Your time is limited, so don’t waste it living someone else’s life " 

" وقتك محدود لذلك لاتضيعه وأنت تعيش حياة شخص آخر " 

" Failure is the condiment that gives success its flavor " 

" الفشل هو البهار الذي يعطي للنجاح نكهته " 

" Our greatest glory is not in never falling, but in rising every time we fall "

" المجد الأعظم ليش في عدم السقوط [ الفشل ] ، ولكن في الأرتقاع في كل مره نقع فيها " 

" All you need in this life is ignorance and confidence; then success is sure "

" كل ماتحتاجه في هذه الحياة هو التجاهل و الثقة بعدها النجاح بالتأكيد " 

وبس

آشوفكم على حب ❤