Good Kisser & Soar ~ from Mac

السلام عليكم ورحمة الله ،

 

 

روج جديد انضم لمجموعة الآرواج اللي عندي من ماك ، كوليكشن MAC A Novel Romance مجموعة تتكون من ٦ أرواج مطفية ( مات ) مابين النيود ودرجات البينك والعنابي 

آرواج ماك يمكن البعض يشوف مافيها زود عن باقي الماركاات الثانيه حتى بدرجات الألوان نلاقي مثيل لها وسعرها نوعا ما مرتفع ، بس مااعرف لييييش أحب أروااااج هالماركة ماقد جربت منهم صراحة الا الأرواج و الكومباكت ( بودرة الوجه ) ويعجبوووني بكل شي من ناحية التغليف والحجم شي يجننننن وبالذات أفضل أرواج المات ( المطفيه ) أكثر من الكريمي والأنواع الثانيه أحسها تناسبني وثباتها ربما أكبر 

خذيت روج واحد من هالكوليكشن أسمه Good Kisser لون ممكن اسميه فوشي فاقع قوي جميييل لمحبات الالوان الفاقعه الفوشيه انصحها بهاللون وهو ممكن يكون أقوى لون وردي نزل في ماك

في عندهم أرواج فوشيه ثانيه ومقاربه للون وهي الـ Girl about town و Flat out fabulous 

بطبعي انا أبحث دايم على الألوان الهاديه النيود البيج اللحمي حلوه تناسب جميع البشرات والالوان وتناسب كل الاوقات ، حبيت أغير وأكسر الروتين وأجرب هاللون للامانه الى الآن ماجربته من وقت ماشريته . . 

محدد شفايف أو قلم شفايف Soar من ماك

هالمحدد هذا من أشهر الأقلام المحدده في ماك لونه لحمي وردي جدددا جمييل يناسب النهار يعطيك مظهر ناعم 

الكل طبعا أنجن على روج ( كايلي اخت كيم كرداشيان ) طبعا هي حسب ماقالو في بعض المواقع انها استخدمت هذا المحدد مع روج  please me او twig وبعضهم كتبو شي أخر

عموما لون المحدد قريب من لون كايلي سواء هو أو غيره ، والمحدد يعطي جمال للشفايف لما تحطينه بالاول وبعدها تحطي الروج حتى يساعدك في ترتيب شفايفك تبين تصغرينها او تكبرينها او تضبطينها 

حبييييته من الاستخدام الأول فعلا شي يستااهل اني اشتريه رغم اني مااحب المحددات ابدا وماعندي محدد من الاساس ما اشتريهم بس هذا غير لونه وسهوله في الاستخدام اللون واضح جدا مو محتاج تحطي روج فوقه هو يكفي انك تعبي شفايفك منه ، بس اللي شفايفها جافه راح تعاني معاه وماراح ينفعها أبد

أرواج بديلة لـ أرواج ماك

طبعا في كثيير ماركات أرخص من ماك و أرواج قريبه من ألوان أرواج ماك وأحيانا تكون طبق الأصل ، أنا مع البحث عن بدائل المنتجات ليش لا اذا في بديل يشبه المنتج وجيد من ناحية الجوده والمضمون والمفعول أخذيه ولاتفكري هذا راح يوفر لك بعض المبلغ اللي راح تصرفينه على منتج غالي وانتي عندك بديل له ، غير هذا راح تتيح لك الفرصه تجربي أكبر عدد من المنتجات مثلا عندنا أرواج ماك قاعده تباع في محلاتنا بـ 28$ وأكثر وكل ماله تزيد الأسعار بهذا المبلغ تقدرين تشترين أكثر من روج يجيبلك ٢ او ٣ أرواج مثل أرواج ( ويت وايلد ) رخيصه وجودتها جيده والوانها حلوه 

وهذي بعض البدائل لـ آرواج مـاك 

وبس

آشوفكم على حب ❤