فضفضة ~ شوية صراحة

السلام عليكم ورحمة الله ،

هالبوست قاعده اكتبه الحين بدون اي تخطيط مسبق بدون اي فكرة معينه في بالي بمجرد اني حسيت ابي اكتب شي اشارككم فيه . .

حاسه هالفتره هذي مضغوطه والنفسيه شوي نازله داون مابي اقول محبطه ومنكسره لان هالكلمات تضيق الخلق زياده وتزيد النفسيه سوء وهالشي هذا ما ابيه ، احيانا الانسان يمر بظروف يكتشف فيها ذاته اذا كان شخص قوي او ضعيف ، خلوني اواجه نفسي اليوم واقولكم للاسف انا انسانه مو قوية لكني ادعي القوه والصلابه لكن في اقل شي القى نفسي أنهرت وماتمالكت اعصابي صحيح بعدها استرجع بعض من قوتي ولكن انهياري في البدايه يضعفني  

اكككككره لما يبان هذا الشي فيني هذا الشي اللي كنت اخبيه عن الناس عن الكل حتى أقرب الاشخاص دايما اظهر لهم بمظهر القويه الصلبه اللي تقدر تدير حياتها بالشكل اللي تبيه واللي تلاقونها في المواقف شجاعه ، انا انسانه جدا حساسه وضعيفه قلب يمكن حاليا انا افضل من السابق لكني مازلت استشعر هذا الشي ، اككره الدموع اللي تختبئ ورا عيني وتنتظر اي لحظه عشان تنزل اكككره رجفة الصوت اللي تفضحني ماحب أكون ضعيفه بعيوني ابدددا . . 

في هالحياة مافي شي يتم على حاله لا مال ولا صحه ولا سعاده ولا حزن كل شي بيتغير واذا مرت علينا فتره سيئه نقول الحمدلله ونتاكد انها بتعدي ، انا ما أقولكم اني امر في فتره سيئه لا ان شالله مو سيئه لاني اتوقع مريت بـ فترات سابقه كانت اسوء وبفضل الله عدت على خير لكن هذي بالذات صعبه شوي لان فيها " غربه " غربه عن وطن غربه عن اهل غربه عن احباب متخوفه منها لانها تجربه أولى لي ما اعرف هل انها قادره عن التأقلم قادره على المواجهه قادره على التحمل ، !! أتوقع أسوء شعور أنك تحس بالوحده ما حولك أحد اعتمادك بيكون على الله ثم نفسك والأصعب أني بكون مع طفلي اللي مجبوره أكون قوية على شانه وماقصر معاه بشي وماحسسه بالخوف او الضعف او الغربه باختصار هو نقطة ضعفي وقوتي بنفس الوقت 

دايما اسمع ان مواجهة مخاوفك وضعفك يساعدك على التغلب عليها ، كتبت لي اليوم هذا البوست عشان أقوي نفسي أكثر واواجه مخاوفي لاني مقبله على مرحله صعبه من حياتي وتجربة جديده علي أحتاج فيها لـ قوة لـ صبر لـ تحمل لـ شجاعه ، مستعينه بالله أولا وأخيرا انه بيكون معاي ولن يخذلني ان شالله 

أدري كلامي اللي فوق كان فيه بعض السلبيه اذا ماكان كله سلبيه ههههههه لكن حبيت اكتبه لي ولكم، رغم اني دايما أحب اكتب عن الايجابيه والتفاؤل لكن ماننكر ان احيانا الواحد يمر بـ بعض من السلبيه مهما كنا ندعي المثاليه والايجابيه في حياتنا لابد تجي مرحله تضيق فيها بعض الامور فحبيت اشارككم بهذا الجانب ايضا وماننسى دام ثقتنا بالله موجود فـ ما ضاقت إلا فرجت بإذن الله 

(( الكلام اللي بكتبه تحت كتبته سابقا في الانستقرام )) 

في كثيير بنات لما يتابعون بلوقرز أو مشاهير الآنستقرام ويشوفون صورهم يقولون " هذي حياتها سعيده ليش أنا حياتي جذي " ، حكموا على حياة الآشخاص من صوره ( مثاليه ) تبيْن أن حياة هالآنسانه كاملة وكل شي تبيه عندها ، رغم آن مو هذا الواقع آبد ولا حتى الصوره حقيقية غالبنا وبنسبة كبيره " نصطنع الصوره " ونبين جمالها ونخفي عيوب ما حولها وياخذ تحضيرنا لها وقت عشان نطلعها بالشكل اللي نبيه . . مثال بعض صوري خلقت فيها جو مغاير جدا عن المكان اللي هي فيه وآخفيت كل التفاصيل اللي ماتعجبني فالمكان يعني مو هذا واقع المكان آبد . . صور الفطور الصباحي اللي نشوفها بالانستقرام من المصورين جدا جميله ولقطاتها تفتح النفس ولكن مو هذا الواقع ١٠٠٪  منو يصحى على صوت فيروز وفطورها يجيها للغرفه وكوب عصير فريش ونافذة غرفتها تطل عالحديقه والعصافير عالشباك 😒 . . خليكم واقعيين اذا كان هالشي فيه فهي بنسبه ٥٪ طيب والباقي !! 

 أنا مثلا أقوم على صوت ولدي وهو يبكي :| وعادي الحياة جميـله

اللي أبي أقوله أن أحنا مو شرط نبين لكم آحزاننا ومشاكلنا والا اجي كل شوي وافضفض في بوست عشان تقولون ي حرام و أي هذي نفسنا عندها مشاكل وهموم ، لا بالعكس أحاول أطلع وأبرز الجانب الآيجابي والسعيد من حياتي وأفرح ناس وألهمـهم ، والحمدلله مافي أحد ما الله رزقه بسعاده لو بسيطه هذي تكفي نكمل حياتنا فيها ، وشي حلو الواحد يخلق سعادته البسيطه ويفرح الناس اللي حوالينه حتى لو بالصور ، أنا كثير من بلوقرز ومصورات لما أشوف صورهم تجيني سعاده صورهم تفتح النفس ويجيني آنشراح منها وإلهااام كبييير ، [ آستمتعــوا دايمـا باللحـظة ] لا تخلـون دقيقـة تفـوت من عمـركم  وآنـتو زعلانين وإلا طفشانين وإلا متضايقين وإلا ي حظ فلانه وعلانه وتتذمرون لانك ماتدرين اشلون حياتها يمكن تكونين انتي اسعد وافضل حياة منها بس الفرق بينكم ان هي تلتفت للامور الايجابيه عندها ، صدقيني دامك بصحة وعافيه وآهلك جنبك #الحمدلله هذي أعظم نعمه

وحطي هالشي في بالك كل شي في هالدنيا فاااني وكل شي بينتهي بيوم ما الألم والتعب والحزن والهم كله بينتهي مع نهايه هالدنيا ماعلينا الا التمسك بـ رب العباد هو الباقي وجنته باقيه مهما كانت دنياك حلوه أو سيئ مو مهم الاهم الفوز بالجنه ، جمله جميلا جدا قريتها تقول " كل شي معوض إلا . . الجنـة " 

ونقطة مهمة : تمنـوا الخير لغيـركم وكونوا قنوعيـن وراح تلقـون كل الخيـر " وعلى نياتكم ترزقون "

خلوووني اتكلم بأمور أسعد من القرقه السابقه

تعرفون وش اكثر شي يسعدني >>  الورد والآيس كريم من باسكن روبنز مع كيكة براوني يممممي 

صايره بالفترة الاخيره مجنونة جوكليت بزياده صحيح بالسابق احب الجوكليب وانواع الكاكاويات " كتكات / فليك / مارس / تايم اوت " بس الحين لا هوسي أصبح على النوتيلا و dip&dip هالكافيه اتوقع حفظني من كثر ما اجيهم ياخي عندهم انواع تجييييب السعاده وتوديني عالم ثاني اتخيل نفسي بعالم كله جوكليت حتى بيوتها 😅 

قريت مره ان الشخص لما يتضايق او عنده مشكله دايم يلجأ للشوكليت والكاكاو لان في " المنبهات | مثل القهوه و الكاكاو " هرمون ينشط العقل ويساعده على التفكير بزياده وتخليه يكون مصحصح << عرفتووو ليه الحين طايحه بالجوكليت :d 

لا صج الجوكليت هرمون السعاده يريح النفس ويبسطها سبحان الله استغرب من الناس اللي مايحبون الجوكليت ابدا اصلا ماياكلونها ابد من معقوله في ناس جذي !! بعيدا عن مرضى السكر الله يشفيهم  بس والله اشفق على اللي طبيعيين مايعانون من مشاكل تمنعهم من اكل الحلويات والجوكليت صراحه لانهم ماجربو طعم السعاده البسيطه في هذي القطعه الصغيره من الجوكليت ❤️

تدرون متي حاله الاستكنان عندي ، ! لما ينتهي يومي على خير واكون منجزه كل اشغالي وواجباتي تجاه طفلي وبيتي وزوجي ونفسي بعدها أخذ شور وألبس بجامتي المفضله عندي وأدخل الفراش الدافي اتمدد واطقطق بـ الايفون >> مثل وضعي الحين وانا اكتب هالبوست 

شعوور لايوووصف فعلا احساس الراحه وان ما وراك شي ممتع وكتبت لكم في فضفضه سابقه عن وقتي المفضل وهو بعد الساعه ١١ او ١٢ مساءً اذا حابين تطلون عليها 

المهم قلت لكم بالانستقرام اني قاعده أحوس وأجهز للسفر أكره مرحله تضبيط الشنط وشنو احتاج وشنو مااحتاج وعندي انا مشكله اني اخذ كككككل شي ودايم أقول " ها يمكن احتاجه " ماادري الا انا ماخذه الكبت كلله ولما اسافر ثلاث ارباع اللبس ارده مثل ماهو مالبسته :/ 

كل مره اسافر عارفه كم المده اللي بقعد فيها واحسب حسابي بالاشياء اللي ممكن احتاجها بس هالمره ماعرف كم بقعد هناك شي يحير ويوهق لااا ومعاي طفل بعد يعني متوهقه اكثر لان الطفل له احتياجات خاصه يمكن اذا ماخذيتها معاي من هنا ما ألاقيها هناك ، عموما انا حاولت كثر ما اقدر اسوي سيرج للبلد اللي بروح لها لاني اول مره أجيها واحاول اعرف عنها اكثر . . 

وبسس هذي فضفضتي لليوم 

كلام يمكن ملخبط متفكك بس صدقوني يدي هي اللي تكتب لاشعوري وحبيت اشارككم شي من حال أعيشه الحين 

ويمكن تكون هذي أخر تدوينه لـ هالفتره على ما أسافر وأستقر وتتضبط الأمور وأرجع لكم ثاني 

بس طبعا الانستقرام بكون باذن الله معاكم بشكل يومي ودعواتكم لي ❤️

آشوفكم على حب ❤️