السلام عليكم ورحمة الله ،

شخباركم بنات ان شالله طيبين !

رجعتلكم اليوم بعد ما وصلت الحمدلله الى جمهورية التشيك وهي اللي بقييم فيها الفترة هذي وبعد مااستقريت وضبطت أموري قلت اسويلكم هالبوست الخفيف عن شنطتي للميكب شنو الأشياء اللي خذيتها معاي ومااقدر استغني عنها

طبعا أنا مو هوس ميكب لا اللي يشوفوني دايم يعرفون ان مكياجي خفيف وتعتمد اهم شي على ان يطلع وجهي بشكل صحي وفيه حيويه مااحب يكون باهت وأصفر لان بالصج وجهي في علامات تعب وسهر وهذا اللي اكرهه ، عشان هالشي اهتم دايم بالكريم اللي يعطيني هالمظهر وبالغالب استخدم بشكل يومي الـ بي بي كريم لان يوفر لي الترطيب و التغطيه و الحمايه من الشمس واكيد الآيلاينر مع جل الحواجب و البلشر و الروج هذي هي أهم الاشياء اللي تكون معاي

مستحضرات ماقدر استغني عنها واخترتها من بين المستحضرات اللي عندي وهي المفضله عندي بالوقت الحالي ، في منها كم شغله جديده شريتها عشان اجربها في السفره راح اتكلم لكم عنها بتفصيل شوي

شنو خذيت معاي في شنطة الميكب ؟

أول شي : شنطتي الميكب خذيتها من " فكتوريا سيكرت " عجبتني للسفر كبيره وتكفي آشياء كثييير

• باليت نيكد من آيربن ديكاي | هالباليت عششششق ما استغني عنه صحيح مو كثير احط شادو خصوصا وانا مسافره بالمررره ما احط شادو بس قلت خلني اجيبه معاي لان المده طويله وممكن يجي يوم احتاجه

• ماسكارا من سيفورا | من قريب شريت هالماسكارا مع انها مو اللي عاجبتني واو بس خذيتها للزمن :d

• ماسكارا من جوزي ماران | في بوست قريب بنزله عنها

• بودره مضغوطة من ماك | تكلمن عنها بالسابق وفعلا من أحلى البودرات عندي وما استغني عنها لتثبيت الكريم

• جل حواجب من ميكب فورايفر | هذا جل الحواجب الوحيد اللي جربته وعجبني ولافكرة اغيره

• قلم كحل ذو وجهين من آيربن ديكاي | عجيييب هالكحل يجي لونين اسود و بني ولونه قوي جمميل

• روج nouvelle vogue من ماك | كتبت عنه بالانستقرام اعتقد لووونه جد جد رووووووعه بينك الحلووو لاهو فاتح ولا غامق مادري شنو أحلى درجة بينك صراحه

• قلم شفايف sour من ماك | هالقلم الوحيييد اللي عندي انا مو نوعي استخدم اقلام للشفايف افضل الروج بس هذا شي خياااال اعششششششقه وكل مايخلص اجيب مثله لونه لحمي على بينج شي جذي وحطيت بوست عنه هنا

• بلشر من لورا غيلر | حبيت حجمه صغير ولونه بينكي هادي حلووو للنهار

• اصباغ أظافر من سياتيه | هالماركة عليهم ألوان تجيب العافيه وهم من اشهر ماركات صبغ الاظافر خذيت منهم مجموعه الكريسماس فيها ٢٤ لون شي خياااال

• آيلاينر من هيلوكيتي | هالشي كيوووت من اسمه طلبته من موقع سوق وحبيت اجربه كحل اسود فرشاتها تشبه القلم رغم اني افضل الريشه

الحين نجي للأشياء الجديده أذكرها لكم مع شويه تفاصيل

Eveline Cosmetics Magical Cover Foundation 5 in 1

ماركة ايفلين حسب ماقريت انها ماركة بولنديه طبيه عندها منتجات ميكب وللعنايه بالبشره والرشاقه ، انا اول مره اعرف واجرب هالماركة خذيتها بالصدفه من موقع ( سوق Souq ) لفتت نظري منتجاتها واسعارها جدددا معقوله ورخيصه بالنسبه للماركات الثانيه

• تغطي تماما كل عيوب البشرة

• مظهر مشرق طوال اليوم

• نهاية الكريم مات مطفي ويدوم ١٦ ساعه

• يطابق تمام لون البشرة

• يحتوى على زيت الأرقان

للامانه اللي جذبني لـ هالماركة وهالمنتج هو زيت الأرقان صاير يلفت نظري دايم لما الاقيه على منتج ، الكريم لي بس كم يوم من جربته ، أول شي علبته أنيق حلوه بس يمكن صغيره شوي وكميه المنتج قليله بس عشان ماكون طماعه بالنسبه لسعره ٣.٥٠٠ دك جيد ومناسب ، حبيت سهوله توزيعه والفينشنق يعطيني مات مافيه اي لمعه او شي ومايبين انك حاطه شي من الاساس طبيعي للغايه وتغطيته متوسطه وجيده ، انا احط فوقه بودره لان لونه غامق شوي علي فـ افتح اللون فالبودره ، بشكل عام وبالنسبه لكريم بـ هالسعر مواصفاته جيده جدا ، طبعا هذا الكريم للنهار وللدوام ماانصح في للمناسبات

PROFESSIONAL MAKE-UP CONCEALER 2 IN 1 - COVERING & ILLUMINATING

كونسيلر ايضا من نفس الماركة ٢ في ١ تغطيه وإضاءه

• يصحح العيوب ويعطيك بشره خاليه من الشوائب

• مثالي للتغطيه والاضاءه لمده ٢٤ ساعه

جدددا حبيت هالكونسيلو لانه خفيييف ماتحسين ان بوجهك شي بالعاده الكونسيلر يكون شوي حاسه بوجود طبقه لو بسيطه بس هذا المنتج طبيعي للغايه وسهل الاستخدام والتوزيع فيه فرشه مثل شكل القلوس تحطينه على منطقه تحت العين الى عظمة الخد ، هالكونسيلر هذا ماينفع تستخدمينه في المناسبات لانك تحتاجين لواحد اكثر وضوح منه بس هذا ممكن استخدامه في النهار المشاوير الخفيفه وبالدوام ممكن ان يخفي علامات التعب والارهاق