Review : Argan Black Oil Mascara

السلام عليكم ورحمة الله ،

أول شي كلنا نعرف شهره زيت الأرقان " أو الأركان " وزادت بالفتره الاخيره صرت اسمع ناس كثير يمدحونه ويتكلمون عنه للشعر وللبشره ولكل شي هو زيت مصدره الاساسي من المغرب وكثيير ماركات استخدموا هذا الزيت في بعض تركيباتهم لمستحضرات تجميل وعنايه ، انا شخصيا جاني فضول على هالزيت هذا شنو سالفته هل هو فعلا مثل مدحهم له !! أو انها مجرد دعايات !! حبيت فعلا اجربه وصار يلفت نظري لما اقرأ اسمه في كل منتج 

خلوني أول شي أتكلم عن هذا الزيت بتفاصيل بسيطه 

شنو هو زيت الأرقان Argan Oil

يسمى « الذهب السائل »  زيت يستخرج من لوز شجر الأركان وهو شجر نادر يتواجد بسهل سوس المغربي ويعمر لمدة 200 سنة وإنه زيت يستخدم بكثرة في المطبخ التقليدي لهذه المنطقة، كما يستخدم لخواصه التجميلية والعلاجية . . 

يوجد نوعان من زيت الأركان بشكل عام :

زيت خاص بالطعام وزيت خاص بالتجميل

يستخدم كـ مكون رئيسي في مستحضرات التجميل الراقية كمرطب ومغذي ومرمم للبشرة والشعر والأظافر ، فهو يغذي ويرمم و ينعم الشعر التالف والمتعب والمتقصف ذو النهايات المتكسرة كما أنه يعيد النضارة والحيوية للشعر والبشرة بشكل عام ، وكعامل مساعد على شد البشرة والتخلص من التجاعيد وخطوط التمطط على البطن والفخذين، تبدأ النتائج في الظهور خلال أيام قليلة من الاستخدام عادة من 7-15يوم ويزداد التحسن مع الاستعمال المستمر . . 

أفضل وقت لاستخدام زيت الأرجان وأفضل امتصاص له يكون على بشرة نظيفة تماما وعلى شعر نظيف تماما، خصوصا بعد الاستحمام فهو يُمتص بسهولة ولا يترك أثرا وتكون الفائدة أفضل والنتائج أسرع في الظهور . . 

فعلا شريت منتجات كثيره بس عشان وجود هذا الزيت من مكوناتها من مستحضرات تجميل كريمات و ماسكارا وزيت للشعر وبتكلم عنهم جميعا بس بعد مااستخدمهم مده ومن ضمن هالمنتجات اللي فيها هذا الزيت ماركة Josie Maran وهي الماركة الشهيره في منتجاتها الطبيعيه ومن مكوناتها دايم زيت الأرقان في كل منتج

اليوم بتكلم عن ماسكارا سوده بزيت الأرقان 

Argan Black Oil Mascara

ماسكارا مغذيه كريمي و طبيعيه بنسبه ٩١٪ تحتوي على زيت الأرقان مختلطه بأصباغ معدنيه سوداء وحسب ماهو مكتوب في موقعهم انها تعِدك بـ تغطيه / تطويل / تكثيف / تقوس للرمش لعيون متألقه وجذابه وتزيد مظهر رموشك ١٠+ اضعاف ، شهدت ٩٤٪ من مستخدمين هذا المنتج زيادة في طول الرمش 

فيديو للمنتج

http://youtu.be/xxIRqTZpFnY

رأيي بالمنتج :

 • بالنسبه للفرشاة كثيير شفنا أشكال لفرش الماسكارا في منها المقوس و الفرشه الصغيره وشعيراتها صغار و فرشة طرف شعيرات كبيره والطرف الاخر شعيرات صغير ، هذي غير شكلها يجي كأنه موج بحر أو نقدر نقول دوائر صغيره جنب بعض يعني تبدا نازله وبعدها صعود ونزول الفرشه هي جيده صحيح اني اضطر اعيد على الرمش اكثر من مره عشان اصيد كل الرموش بالذات الرمش الصغير 

• سهولتها في توزيع المنتج على الرموش بس احتاج مثل ماقلت لكم انا اعيد عليها اكثر من مره عشان احصل على النتيجه اللي ابيها وهي تسمحلك في هالشي انك تعيدي عليها 

• بالنسبه للسواد الماسكارا ما أشوفها سواد سواد الغامق لا في ماسكارات أكثر سواد منها 

• الحلو فيها مايتكتل المنتج على رمشك وتصير رموشك متينه ومليانه من المنتج توزيعه حلو ومايبهذلك ويتلطخ هنا وهنا بس انه مايجف بسرعه يحتاج دقايق 

• من ناحيه تعطي تقوس للرمش اممم مالاحظت هالشي كثير عادي يعني وانا هالشي أعانيه مع رموشي لأنها قصار وماتنعكف أو تتقوس وانا من النوع اللي ما استخدم عكافه الرموش ابد بس حسيت ان عيوني مفتوحه شوي 

• حسيت انها فعلا في طول خفيف لرموشي لما استخدمتها طولتهم شوي 

بشكل عام الماسكارا جيدا جدددا حبيتها وحسيتها مريحه وماتعبت رمووشي رغم اني صايره هالفتره استخدمها بشكل يومي بس الحمدلله ماشفت تساقط لرموشي مثل ماسكارات سابقه كانت عشان انظفها يتساقط رمشي ، قلتلكم هذي حبيتها ماعرف اذا زيت الارقان هو له دخل فيها او لا لان ماحس بفرق عن غيرها كثير 

وبس

آشوفكم على حب ❤️