مُدونة كريستال: وصفات~ براونيز بالكندر والتوت البري

السلام عليكم ورحمة الله ،

رجعت لكم مع تدوينة المطبخ والوصفات واتوقع اكثر شي بتشوفونه في هالقسم هو الحلويات لاني من عشااااقها والوصفات فيهادايم مسليه وسهله ولذييذه الواحد يتحمس وهو بيسويها ، بحاول أنزل وصفه لشي غير الحلويات في الايام الجايه بس مااعتقد اني اميل لـ هالنوع من الوصفاا او الطبخات

عموما نجي لوصفه اليوم " براوني كيك " جددددا سهله واصلا مافي وصفه ومقادير من الاساس لاني مستخدمه الخليط الجاهز للكيك وهذي نعمه للبنات اللي مايعرفون للحلا وللطبخ وايضا تنفع اللي ماعندهم وقت وأسرع سريع يبون يسوون حلاهم ، وأنا كثيير أحب هالنوعيات من الخليط الجاهز لكل شي بالذات للحلا جربت انواع كثيره خليط الكيك و البراوني والكريب والبان كيك كل شي حبيت أجربه وكان تطبيقه جدا حلو وضبط من المره الأولى

بشكل عام الحلويات ماهي فيزياء وشي صعب هي مجرد قواعد أو أساسيات بسيطه تحفطينها وتطبقينها في كل مره وبتصبط معاك بعدها تقدرين تبدعين من عندك وتبتكرين اشياء جديده وأفكار مميزه بس اللي عليك تفهمين لأساسياتها مثلا " حراره الفرن ، مدة الخبز ، شنو اللي ممكن نحطه ويتجانس مع الخليط بدون مايخرب الخلطه " اشياء مثل هذي بعدها لك مطلق الحريه والخيار بالنكهات والزينه وكل شي

يلا نبدأ معاكم بـ حلاي لليوم " براوني بالكندر والتوت البري "

خليط براوني كيك الجاهز

قوالب سيليكون

أصابع كيندر

توت بري

صوص جوكليت أو نوتيلا سايحه

أول شي نحط خليط البراوني في وعاء ونشوف شنو يحتاج اضافه مثل " ماء ، زيت ، بيض " حسب ماهو مكتوب خلف العلبه تطبقينه

ندهن قوالب السيليكون بزيت او بخاخ عشان مايلصق الكيك بعدها نحط كميه من الخليط داخل القوالب و نجيب أصابع الكندر ونغرزها داخله الخليط واذا كان بارز شي من الكيندر نغطيه بالخليط خلوه يعني متوسط القوالب تحته خليط وفوقه خليط البراوني

نكون مشغلين الفرن قبل ماندخل القوالب بمده حتى يكون حار لما ندخل القوالب ونخليها بالفرن ١٥ دقيقه تقريبا لان القوالب صغيره ماتحتاج مده اطول ، وانتو طبعا بعد ١٠ دقايق من دخول البراوني الفرن اخذو عود اسنان وشوفو اذا نضجت الكيكه اذا طلع لكم العود نظيف يعني أوك

الحين نطلع القوالب بعد ماصارت جاهزه ونجيب لنا طبق تقديم نطلع البراوني من القوالب ونحاول انها ماتخرب وتطلع بنفس شكل القوالب " انا شوي خرب عندي راس القالب شوي لزق معاي :/ " بعد مانطلع البراوني ونحطهم بالطبق خذيت اصبع كيندر وحطيته فرق البراوني ودخلته المايكرويف دقيقه عشان يسيح " لاني من عشاق الجوووكليت الساايح " بعدها خذيت التوت الأسود والتوت الأزرق اللي يسمونه ( البلابيري والبلوبيري ) وزينة فيها الطبق وبعدها عملت صوص نوتيلا " خذيت ملعقه كبيره نوتيلا حطيتها في وعاء مع شوي ماء حار وحركته إلى ان صار معاي صوص سايح خفيف " رشيته عالخفيف حوالين الطبق وبس