مفضلاتي لـ شهر سيبتمبر و آكتوبر ٢٠١٥

السلام عليكم ورحمة الله ،

من أسهل التدوينات وأمتعها هي تدوينه المفضلات اللي بـ كل فتره أجمع منتجات حبيتهم وهبيت فيهم هالشهر ، وهالشهر عندي منتجات متنوعه منها جديده ومنها قديمه شوي ، ومو معناته اني حطيتها بمفضلات هالشهر يعني هي شي واااو لا مو شرط ممكن لاني احتجتها هالفتره حيييل وقمت استخدمها بس ممكن بعد شهر شهرين أتركها ، وايضا مو لانها من مفضلاتي وحبيتها يعني راح تعجبك لا مو بالضروري لان رأيي وذوقي وأحتياجاتي تختلف عن الكل واللي يناسبني ممكن مايناسبك فـ أنتي هنا تشوفين المنتجات في حال عجبتك وحسيتي أنها ممكن تنفعك وتحتاجين لها جربيها 

جهاز كلاريسونك

تكلمت عنه في السابق واعتقد حطيته مره في المفضلات وهذي المره الثانيه اللي احطه ، الجهاز باختصار فرشه تنظف الوجه والجسم حيييييل احتجتها هالشهر من كثر ماصارت عندي مناسبات واستخدمت مكياج ثقيل وكانت هي المنقذه واللي تريحني بعد كل استخدام احس باطمئنان معاها ، في مثلها من كذا ماركه مااقدر احكم بشي مااستخدمته بس بشكل عام مايمنع تشترين ماركات ثانيه تقوم بمثل وظيفتها وتعتبر بديل بسعر ارخص ، خذينها من موقع نوردستروم بحدود الـ ١٨٠ دولار . . 

عطر نوار من شانيل

عطر شرقي شاريته من كم شهر للوهله الاولى تحسين ثقيل شوي بس لما يبرد يصير اخف ولان الاجواء بعد بدأت تبرد فهو مناسب للايام الجايه ، ماذكر السعر . .

صابونه أفريقيه

صابونه كتبت لكم عنها في بوست سابق خذيتها من موقع آي هيرب ، الصابونه تنظيفها عميق وتنظف البشره صحيح بعد استخدامها احس بتحسس في بشرتي بس هي دقايق بمجرد مااحط كريمات الترطيب يروح كل شي ، خذينه من موقع آي هيرب بـ ٤ دولار. . 

قلم روج من نارس

روج كريمي لون لحمي تقريبا اللون هادي وناعم يناسب النهار رغم انه مو ثابت بس احط قبله محدد ، جاني هالقلم مع واحد ثاني باللون الاحمر من سيفورا امريكا كهديه في يوم ميلادي ، اللون الاحمر حلو وواضح بس انا حبيت اللون اللحمي هذا اكثر . .

روج من أنقلوت 

ماركة انقلوت ماشدتني كل هالسنين للامانه ومكتفيه بالماركات اللي اعرفها ومجربتها ، وبالضبط قبل ٤ شهور صديقه لي مدحت أرواج المات حق أنقلوت وكنت قريبه من المحل وقلت خليني اشوفهم ، جد الالوان المات عندهم رهيييييبه درجات حلوه وخذيت منهم ٣ ألوان بنفسجي رقم ٤٢٢ و لون بنكي رقم ٤١٥ ولون لحمي تقريبا رقم ٤١١ ، كلهم ألوان حبيتهم بس لون البينك حبيته اكثر واستخدمته الفتره اللي فاتت كثير للدوام الصبح ، لونه نهاري ناعم رغم ان اللون مو ثابت حييل وايضا ارواج المات عند هالماركة حيييييل جافه يعني لون شفايفك جافه راح تبين جفافها اكثر مع هالارواج وراح تطلعلك خطوط بعكس ارواج المات اللي عند ماركة ماك بس مع هذا حبيت الروج . . .

مرطب شفايف من جاك بلاك

هالماركة منتجاتها تحمس وهذا اول منتج أجربه منهم ، هو مرطب شفايف يجي شكله مثل العصار تضغطين ويطلع المنتج قوامه دهني ثقيل شوي يشبه الفازلين فيه زبده الشيا وفيتامين إي لتغذية الشفايف وتعطيها نعومه وترطيب ونسبه حمايه من الشمس ٢٥ ، حبيت حجمه وشكل التعليب يرطب الشفايف بس كنتيجه احسن لازم تقشرين شفايفك بشكل شبه يومي عشان تزيلي الجلد الميت ، خذيته من موقع سيفورا امريكا بـ ٧ دولار . . .

ماسكارا هيلينا التايقر

هالماركة مشهوره بماسكاراتها الحلوه والكل يجمع على جودتها ، ماسكارا التايقر من اشهر الماسكارات عندهم والماسكارا هي للتكثيف والتطويل ، انا ماحسيت انها تكثف رموشي لا الكثافه المعتاده بس حبيت فيها تطول الرمش شوي وماتتكتل وتتجمع عالرمش وتنشف بسرعه . . . 

فاونديشن لوريال

فاونديشن كتبت عنه شوي في الانستقرام هو فاونديشن مات مطفي ويدوم لك ٢٤ ساعه وتغطيته بالنسبه لي اشوفها متوسطه ، حبيته لان جاتني فتره اعاني من لمعه الفاونديشن ولازم اطبطب عليه بالباودر عشان اطفي هاللمعه ، ووقتها نزل هذا الفاونديشن وخذيته قبل لاتصير ضجه عليه ويخلص من كل مكان ، الفاونديشن حلو وحبيته بس مايسوا كل هالضجه يعني في مثله كثير ، عموما اللي بشرتها دهنيه ومختلطه وتعاني من لمعه راح ينفعها ، يومي وسهل الدمج وخفيف عالبشره ، خذيته تقريبا بـ ٨ دولار . . . 

لمعه للجسم J.S.Douglas Söhne

شي كيوووت خذيته من أخر سفره هو علبه مثل العطر وتبخينها على جسمك تعطي لمعه حلوه ولها ريحه بسيطه ، لما يكون عندك مناسبه حطي لوشن على جسمك بعدها اللمعه عشان تثبت اكثر ، حبيتها وحطيتها لكم بالمفضلات لاني استخدمتها مرتين في مناسبه وكانت جميله . . .

وبس هذي مفضلاتي لهالفترة ان شالله عجبتكم

وآشوفكم على حب 💜