بلا مسكارا بلا هم . . رموشك صحية كثيفة وطويلة بطرق بسيطه

السلام عليكم ورحمة الله ،

منو فينا مايعاني من الرموش وكل يوم يجرب مسكارا تكثيف وتطويل وخرابيط نتفت رموشنا وفوق هذا مانلاقي النتيجة اللي ترضينا ، اخذيها مني دام الاساس تعبان ورموشك اساسا ضعيفه وخفيفه ماراح تنفع معاك الماسكارات ، الحل انك تعتنين فيها وحلي مشكلتها مثل ماتهتمين في بشرتك وشعرك هي تحتاج للعنايه بعد ، بالذات اذا كنتي تستخدمين الماسكارا بشكل يومي هذا جد يتعبها ويضعفها ، وبعض الماسكارات ايضا نتيجة استخدامها بكثره سيئه وبالذات الماسكارا اللي تكون ضد الماء هذي تتعب الرمش كثيير ويتم فيها مده طويله

حلوول بسيطة ومضمونه ومتوفره للكل 

• زيت الخروع

زيت مشهور ومعروف حتى أمهاتنا وجداتنا يعرفونه ويعرفون فوايده لنمو الشعر والحواجب وايضا للرموش وبعد يستخدم كـ مُلين للبطن وامور أخرى بس تأكدي تشترين الزيت المناسب لان حسب ماعرف ان انواع فأسألي عن اللي للشعر . .

الطريقة : على رموش نظيفه جيبي علبه صغيره او ماسكارا عندك ناشفه نظيفها زين وحطي الخروع فيها او اذا ماعندك خلاص مثل ماهو الزيت اخذي عصا الماسكارا النظيفه او عود اذان ودخليها بالخروع وامشي فيها على رموشك بالليل وروحي نام والصبح غسلي وجهك عادي 

خلطات أخرى مع زيت الخروع 

~ أخذي مقدار متساوي من زيت الخروع و زيت الزيتون وعن طريق اصابعك او قطنة او عصا الماسكارا وحطيها على رموشك بالكامل من الجذور الى الاطراف 

~ اخذي زجاجه صغيره او علبه ماسكارا نظيفه و أملي نص الزجاجة زيت الخروع ومقدار ربع و ربع لكلا الزيتين زيت اللوز و زيت فيتامين سي بحيث تكون كمية الخروع اكثر واخلطيهم وبنفس الطريقه وبشكل يومي حطي على رموشك 

• زيت جوز الهند وزيت اللافيندر

قبل كل شي خلينا نتعرف على كلا الزيتين :

زهرة الخزامي أو اللافيندر : هي نبته على شكل شجيرة تعيش في المناطق الجبلية ، في الغابات التي تحيط بالنصف الغربي من القارة الأوروبية ، منطقة البحر المتوسط ، وهي تزرع بوفرة لرائحتها العطره في فرنسا ، إيطاليا ، انكلترا ، و النرويج . وتزرع الآن في أستراليا لكي يصنع من زهرها العطور وهو زيت عديم اللون قابل للذوبان في الماء, له إستخدمات عديده في الغالب يستخدم كعطر وكماده تجميليه ولكن له إستخدامات أخري لا نهايه لها وفوايده للجسم كثيره في مجال البشره والهضم والشعر والجسم . .

وبالنسبه لنمو الشعر : اللافندر معروف بتأثيره علي نمو الشعر, حيث يعمل علي زيادة تدفق الدم إلى جذور الشعر وبالتالى حصولة على التغذية المناسبة ، فقط دلكى فروة الرأس بزيت الافندر مرتين إسبوعيا وسوف تلاحظى زيادة طول الشعر خلال أول شهر تدريجيا . .

أما زيت جوز الهند فهو معروف وأغلب منتجات العناية يدخل في تكوينها جوز الهند الصافي في الشعر والبشرة وكتغذيه ايضا مفيد 

الحين أصنعيها بنفسك امزجي هالزيتين مع بعض عشان تحصلين على زيت يحفز النمو لرمشك 

الطريقة :

 ١/٢ ملعقه صغيره من جوز الهند

 ٢-٤ نقاط من زيت اللافيندر 

امزجي المكونات مع بعض واخذي قطنه او اصبعك واخذي من الزيت وادهني على جذور رمشك الى اطراف الرمش . . 

• الفازلين

واذا كنتي كسوله ومالك بحوسه الزيوت وخلطها جيبيلك الفازلين الاصلي الاصفر اتوقع موجود في كل بيت وعن طريق أعواد الأذن اخذي من الفازلين وحطي على رموشك قبل النوم وبالنهار نظفيها من بقايا الفازلين 

طبعا تكون رموشك نظيفه ويفضل دايم قبل ماتروحين لفراشك عشان تنامين وتستفيدين اكثر من الزيوت ودايم خلي الزيوت او الخلطه اللي سويتيها جنبك عالسرير عشان تذكرينها وخليها روتين لحياتك كل يوم قبل النوم ، وهذا مو بس للرموش تقدرين تستخدمينهم ايضا للحواجب وللشعر . .

[ . . منتج جديد . . ]

من ضمن تجاربي في معالجات الرموش ، تكلمت لكم سابقا عن ماسكارا تاليكا وكانت تجربتي جيده معاها ، وبسفرتي الاخيره شفت الماركة منزله منتج جديد للرموش وحبيت أجربه 

اولا هي عباره عن انبوبه لها راسين ، جهة معالجه للرمش وجهة ماسكارا وحسب ماذكر انها تحفز النمو بنسبة ٨٠٪ وتثخن الجلدة بنسبة ٧٤٪ في غضون ٢٨ يوم

وطريقتها سهله وبسيطه من خطوتين 

الخطوة الاولي : 

جهة الماسكارا العلاجيه وهي مادة زيتيه تحتوي على ١٢ من النباتات المحفزه لنمو الرمش بشكل طبيعي 

الخطوة الثانية : 

جهة الماسكارا السوداء تطيل وتعطي كثافه و تجعد الرمش 

تستخدم صباحا على رموش نظيفه فقط ضع الماسكارا العلاجيه على منبت الشعر و بعدها يمكن وضع الماسكارا السوده ، ومساء على رموش نظيفا ايضا نضع الماسكارا العلاجيه ، يعني توضع مرتين الماسكارا العلاجيه اما جهة الماسكارا السوده فهي اذا حابه تحطي ماسكرا لرموشك 

[ . . تجربتي . . ]

استخدمت الماسكارا العلاجيه اكثر من شهرين " حاليا انتهت من عندي " غالبا كنت احطها مره وحده باليوم ونادرا مااحطها مرتين وهي زيتيه جدا وشكل فرشتها كانها قطنه او اسفنجه اخذها وامسح على رمشي ، شخصيا ماشفت اي نتايج ملحوظه يمكن حسيت بعد الشهرين ان الفراغات بين رموشي طلع فيها رمش خفيف لكن ابدا مو نفس اللي ذكروه ان خلال شهر راح اشوف نمو بنسبه ٨٠٪ هذي نسبه خياليه وترفع توقعاتك عالفاضي بس هذا ابدا مو حقييييقي مجرد دعايه ، ماعرف حبيت المنتج القديم اكثر من هذا حتى كشكل القديم افضل واصغر حجم، اما الجهة الثانيه وهي الماسكارا السودة باختصار ((( فااااااااشــلة ))) من افشل الماسكارات اللي مرت علي ، تتكتل بشكل سخيييف وتلصق الرموش في بعضها وتجيب العيد بعينك من كثر ماتتلطخ هنا وهناك وتاخذ وقت عشان تنشف جد ماحبيتها ابدددا . .

حاليا وبعد ماخلصت الماسكارا العلاجيه توجهت لطريقه ثانيه اسمع دايم مدح عليها ونتايج مرضيه ، ولان المنتجات متوفره عندي هالفترة قلت خليني اجربها

[ خلطة الخروع مع الفازلين ]

خذيتلي ملعقه كبيره خروع وملعقه فازلين طبعا المقدار بشكل عشوائي حطيته وخلطتهم في علبه صغيره وكل يوم بالليل استخدم اعواد اذان واخذ شويه من الخليط واحطه على رمشي وانام ، انتبهي انتبهي لايدخل بعينك هذي مواد تأذي العين فانتبهي لاتحطينه وانتي صاحيه ، وحاليا لي ١٠ ايام تقريبا استخدم هالشي واذا في اي نتايج كتبتها لكم قريب 

وبس

آشوفكم على حب