مشترياتي ~ Sephora| Nordstrom| LimeCrime

السلام عليكم ورحمة الله ،

بما ان السنة قربت على نهايتها

أقولكم كل عام وانتو بخير وعساها سنه سعيده عالجميع

وعشان ماطول عليكم الفترة اللي فاتت شريت منتجات جماليه وحبيت أجمعها لكم في هذا البوست ،

 وكل اللي راح تشوفهم طالبتهم من مواقع أون لاين

من نوردستروم وسيفورا ولايم كرايم واغلبهم غير متوفرين عندنا بالخليج

نبدأ بالميكب 

باليت صغنون من ماك 

هذا خذيته من موقع نوردستروم وكان في ٣ باليتات منه بهذا الحجم بالوان مختلفه انا خذيت الالوان اللي فيها بيج وبنيات اكثر احب مثل هالالوان الهاديه تناسب الصباح والطلعات الخفيفه والزيارات العائليه ، جوده الشادو والالوان جد روووعه حيييل صايره مااستغني عنه بالذات حجمه اكثر شي شدني له صغير وسهل تاخذينه معاك لان في عندهم مثله بس كبير ماحبيته انا ادور على شي ينحط داخل شنطه ميكب صغيره ويناسب التنقل ، سعرها 30$ . . 

روج Sin من ماك

ايضا من نوردستروم خذيت هذا الروج كان خاطري من زمان بهذا اللون القوي رغم اني ماحب هالالوان القويه لكن بما انه فصل شتاء فـ حلوه هذي الالوان الدافيه هو لونه عنابي غامق حيل ، سعرها 17$ . .

ماسكارا من جيڤنشي 

هذي الماسكارا خذيتها من سيفورا هي حجمها ميني وخذيتها عن طريق النقاط اللي جمعتها في بطاقة سيفورا في موقعهم " كل مره اشتري من الموقع يعطوني نقاط وبهذي النقاط اقدر اختار هديه بقيمتها " الماسكرا شكلها غريب وصراحه متعبه فالاستخدام لانها صغيره فانتي تضطرين تمشي على رمشه رمشه ، اممم ماعرف اذا حبيتها او لا جيده نوعا ما بس مشكلتها مثل ماذكرت انك تصيرين بطيئه بسببها عشان تخلصين عين وحده ، ماعرف كم سعرها لاني خذيتها مجاني . .

عطر رول من إليزابيث اند جيمس

وهذا بعد خذيته عن طريق النقاط اللي جمعتها من موقع سيفورا " الحلو في فكره النقاط انك تجربي اشيا بالمجان واذا عجبتك تاخذينها بالحجم الكبير " هالماركة مسوين عطرين أبيض وأسود ويجي منها عطر رش و رول مثل دهن العود تدهنين بها يدك ورقبتك اماكن النبض و زيت للجسم وشامبو ولوشن مجموعه واسعه ، انا عندي الرول من العطر الاسود وهو العطر الثقيل فيه ويحتوي على زهره البنفسج وخشب الصندل والفانيلا ، ريحته لطيفه مو ثقيله حييل ومميزه صراحه ماتشبه احد . .

ماسك للبشرة من سيفورا

شدني هذا الماسك للرؤوس السوده وللوجه ككل ، هي يجي طبقتين يعني ماسكين يعملون على تنظيف المسام

من الشوائب والبثور ويقشر خلايا الجلد الميته وايضا يهدي البشره ويشدها ، طبعا انا مازلت في تجربته ان شالله انتهي منه واكتب عنه بالتفصيل سوا هنا او بالانستقرام

وأخيييرا أرواج لايـم كرايـم عندي :) وراح اكتب عنه ريفيو بسيط تحت

تصدقون من زمان في بالي بس جد مافكرت اشتريها ماعرف ليه هو بس اللي شدني لون الكشمير هو اللي سوا ضجه وشهره لهذي الماركة ، بالصدفه وفي البلاك فرايدي وانا اتسوق بالمواقع الا اختي كانت تشوف حساب بالانستقرام يبيعها وكانت تقول ان هذي ارخص وحده تبيع هالارواج بهذا السعر فطرت علي وقلت خليني ادخل يمكن عليهم تخفيض وفعلا حصلت عليهم تخفيض كانو بـ 20$ وصارو بـ 15$ فرق بسيط لكنه حمسني للطلب رغم ان موقعهم محير شوي وماتوقعت ان تضبط معي الطلبيه وتوصل بس الحمدلله

طلبت ٣ أرواج "   Faded / Bleached /Cashmere  "  الالوان عالصوره بمثل الترتيب

يجي الروج بـ انبوبه زجاجيه جميله وانيقه مثل قلوس الشفايف وصيغة الروج سائله وكميه بسيطه منهم تعبي كل الشفايف بمجرد ماتحطينه على شفايفك ثواني ويصير مطفي غير لامع وثابت  ، اللون واضح من أول مره يبين معاك وممكن تحطين طبقه ثانيه بس مو أكثر 

[ . . رأيي بالمنتج . . ]

• ثبات الروج جيد ممكن يدوم معك ٤ ساعات مو اكثر بالذات اذا كنتي تاكلين وتشربين راح يخف معاك  

• وضوح اللون جيد جدا لان الالوان اللي انا مختارتها ناعمه فتحتاج لطبقه ثانيه 

• سهل وسلس بالاستخدام وتوزيعها سريع 

• ماتقطع الشفايف بالرغم من ان الروج مطفي بالعاده تتقطع الشفايف وتطلع خطوط بس هذي حسيتها ناعمه مو حييل تجفف الشفايف  

• ماتتلصق الشفايف في بعض لان في ارواج مطفيه بعد ماتحطينها تحسين شفايفك تلصق في بعض بس هذي لا ونهايتها مخمليه لطيفه 

وهذي كانت مشترياتي لليوم 

آشوفكم على حب