سَوالف ~ أول أيَـام الزَواج

السلام عليكم ورحمة الله ،

في البدايه أنا بنت حالي حالك مو آخصائية حياة زوجيه ولا شي عشان اتفلسف عليكم بمفاهيم معقده ، بنت عندي أفكاري وتجربتي الخاصه وأمور شفتها واكتشفتها وتعلمتها وحبيت أكتب عنها في هالموضوع لكل بنت مقبله على الزواج و للمتزوجات حديثا وأن شالله يفيدكم 

كلنا نعرف أن أول أيام الزواج صعبه شوي لأن أنتو شخصين غريبين عن بعض ومافي مشاعر تحملونها لبعض

 ( أتكلم عن اللي تزوجت زوجها وهي ماقد شافته ولا اقعدت معاه ) ~ مثل حالتي :) 

شخص غريب لاتتوقعين منه بيفهمك وبيفهم تصرفاتك ، غالبا راح تفهم كل كلمه أو تصرف تسويه غلط والعكس أنتي راح تفهمين زوجك غلط و راح تخلق مشاكل كثيره من سوء فهم أو عناد من الطرفين وفرض شخصيه ❤

في بداية الزواج كل من فيكم بيفرض شخصيته عالثاني وهنا أكبر الأخطاء ، ما أقولك لاتفرضي شخصيتك لا بالعكس خلي يكون لك شخصيه ومبادئ من أول شي ومحد يمشيك على رايه ، أنتي أنسانه لكِ شخصيه ورأي وقرار وإذا مشيتي على رأي أحد يكون اقتناع منك مو شي مفروض عليك ، ثقي تمام أن الرجل مهما كان عمره يبقى طفل ومحتاج كلمة طيبه أسعي دايم تكونين له الأم والأخت والصديقه والحبيبه إذا كنتي له كل هذا بيكون لك عبد للأبد بإذن الله بس محتاج شويه سياسه وتكنيك ؛) ❤

في أول أيام الزواج أبتعدي عن الزعل كل شوي وكل دقيقه تزعلين منه ، في بنات ينتهزون أول أيام الزواج أن الرجل يدلل ويدلع وتقوم كل شوي تدور الزعل عشان يراضيها ، صدقيني بيراضيك أول مره بس مو كل مره ، خلي زعلك ودموعك عزيزه لما تبين تزعلين أزعلي على شي كبير يسوى لان كثرة الزعل والبكي والدموع تقلل من شانك وبيقول ماعندك سالفه وبيعرف أنها عيارة بنات ودلع ، صدقيني لما يشوف زوجك أنك مو زعوله على كل شي وقتها لما تزعلين راح يسووي كل شي عشان يراضيك ، أحيانا المشاكل يخلقها الزوج ويمنعك من بعض الأمور ويفرض عليك أمور ، هذا شي طبيعي في أول الزواج لان مثل ماقلت مايعرفك وبيشوفك ويختبرك أنتي من أي نوع من البنات بس بعد مايعرفك صدقيني كل الحواجز والأمور اللي قالها لك بـ تنمحي لأن يعرفك الحين ❤

دايم إذا تناقشتوو بأمور وصار فيها جدال لا تعلي صوتك عشان ماتنقلب الأمور ضدك وحاسبي على كل كلمة تقولينها ، وإذا شفتي زوجك صوته عالي عليك بكلمة وحده قولي بصوت حاد شوي وهادي ( لا تعلي صوتك ) خليه يكلمك بهدوء مثل ماتكلمينه ، نفس الشي إذا غلط بكلمة وقفيه عند حده بس بأسلوب هادي وجاد ، لا تطوفين له كلمات سيئه بس لاتسووينها سالفه بس نبهييه على الكلمه اللي قالها وقولي مثلا ( ياليت تختار كلمات أرقى من هذي ) أو ( أتمني ماتتكرر مثل هالكلمات ) أهم شي تكون بصوت فيه حده وجديه ، لأن معروف أن الشباب غالبا كلماتهم سيئه وماعندهم أسلوب حوار لطيف بس أهم شي ماتوصل عندك فالبيت هالكلمات و الأهم أن ماترضين فيها وتصير متداوله وممكن يناديك فيها وهذا الأسوء ❤

من وجهة نظري عشان يكون زواجك سعيد لازم يتوافر هالأمرين 

 ❤ الحب و الأحترام ❤

بدون هالأمور مستحيل يمشي زواجك بسعاده ، إذا بينكم حب بس مافي أحترام وكل واحد ينادي الثاني بألقاب أو كلمات سئيه فهذي عيشه لاتطاق ، وإذا في أحترام بس مافي حب ولافي عطف ورحمه بينكم هم صعبه هالحياة ، الحياة الزوجيه السعيده هي اللي تكون بينكم محبه ورحمة وعطف واحترام ، أنتي تعطفين عليه وترحمينه اذا ماقدر يوفرلك اللي تبينه اليوم يوفره لك بعدين و هو يرحمك ويحترمك ويقدر وجودك في حياته ، وعلى فكره حب المرأة يختلف تماما عن حب الرجل حب المرأة واضح ويبين من تصرفاتها ونظراتها لكن الرجل غالبا مشاعره تكون غامضه ومكبوته داخله ماتشعرين فيها إلا نادر مو لان حبه اقل من حبك لا يمكن يكون مجنونه فيك اكثر منك بس ملامح الرجوله أحيانا تخفي كمية الحب الهائله والمرأة بطبعها رومانسيه وحساسه ❤

الحياة الزوجيه ماتمشي بالعناد وكل واحد يفرض على الثاني قيود وأمور صعبه ومحد يقدر دور الثاني ولايقدر وجوده في حياته ❤

أنتي كـ عروس جديده خلي الرجل يحبك خليه يتعلق فيك ومايستغني عنك خليه لما ما تكوني موجوده في بيته يحس أن شي ناقصه لايصير وجودك وعدم وجودك واحد، خليه يحبك بالكلمة الطيبه والرحمه اللي فيك و الخجل والصوت المنخفض والملامح البريئة ، أنتي أنثى يعني أحساس وخجل ونعومه لاتكوني غير هذا ، إذا فرض عليك شي وأنتي قادره تسوينه وماراح يكلف عليك شي سوويه بدون جدال في بعض البنات ينصحون رفيقاتهم بالغلط للأسف ويقولون لاتسووين اللي يطلبه منك إذا سمعتي كلامه من أول مره خلاص قدر عليك :/ << ترا زواج هذا مو حرب 

ممكن بعض الأحيان يطلب منك مثلا ماتطلعين مع رفيقاتك أبد ومنعك من هالشي وأنتي قبل الزواج كنتي عادي تطلعين معاهم حاولي تناقشينه بهدوء ليش رافض هالشي الأمر عادي الكل يطلع ! وإذا شفتيه مصمم على رايه أخذيها وأقبليها بهدوء من باب أن يغار عليك ، في المقابل صدقيني اذا قبلتي فيه وقلتي له ( أنا مو حابه هالشي بس عشان خاطرك ولايهمك ) وقتها لما شي يزعجك من زوجك ومو حابه يسوويه مره ثانيه تكلمي معاه بـ هالشي وأتمنى ماتسوويه عشان خاطري راح يتفهم ويلبي طلبك ❤

أبتعدي عن الكذب واللف والدوران أبتعدي عن الغرور والقسوه والنفاق هذي أموور مايحبها الرجل وحتى المرأة ماتحبها واذا اخذ زوجك فكره انك كذابه في أول الزواج خلاص تصير الفكره هذي عنك في باله على طول ماعاد يصدقك ، عاملي زوجك مثل ماتحبي يعاملك ، لاتنطرين كل شي من زوجك أنتي بعد ساهمي في علاقتكم مافيها شي ، إذا شفتيه متضايق أو زعلان روحي له أسأليه باللي يضايقه حتى اذا ماحب يقولك عادي لاتضغطين عليه يكفي تاخذينه بالحضن وغيري عليه الجو حاولي تعدلين مزاجه ، لا تكونين عنصر النكد في البيت كوني النسمه الخفيفه اللي تجيب السعاده والراحة ، وقتها حتى لو زعلتي من زوجك بشي وتركتي بيته راح ينجنن ويكره البيت من بعدك ويحاول بكل طريقه أنه يرجعك لبيته لأن شاف راحة البال والسعاده بوجودك ❤

هذي بعض النقاط المهمه وأتمنى تؤخذ بعين الأعتبار لأن بعض البنات عندهم مفاهيم خاطئه وكأن زوجها عدو لا زوجك المفروض يكون والدك وأخوك وصديقك وأبنك وحبيبك ، أنا من قريب متزوجة من سنتين ونص وعايشه الوضع وشفت البنات ونصايحهم لي قبل الزواج وبعد الزواج شي مختلف تماما عن الواقع ، هي بإختصار " عَاملي مثل ماتحبي أن تُعاملي " هذي القاعده أخذيها بكل مجالات الحياة ❤

نقطة مهمة خارج الموضوع السابق وهي :

كلنا وأحنا مقبلين على زواج لنجهز حلوو مافي وحده ماتعرف تجهز نفسها من ملابس للبيت وفساتين و عطور و ساعات و ذهب وألماس بس ترا كل هذا مو مهم كثر أنك تجهزي نفسك من الداخل ( نظافتك الشخصية ) هي اللي تظهر جمالك ، لبس حلو بدون نظافه ونعومه ولاشي 

المهم عند الزوج مو لبسك من أي ماركة ولا شنو ساعتك المهم عنده الريحة الحلوه ونعومة الجسم لما يلمس يدك تزلق من كثر النعومة ، مو يلقى جسمك جااف وخشن وشعر صغير بجلدك و ريحة كريهه ، كثير من البنات ينسون النقطه هذي وهي أهم من تجهيزك ، عنايتك اليوميه مهمه جدا مو تنطرين تتزوجين عشان تهتمين لا قبل زواجك لان النظافه والعنايه هذي لنفسك مو لأحد ثاني ❤

وبس

أتمنى عجبكم الموضوع وأحب أقرى ردوودكم تحت الموضوع و في الأنستقرام

ولاتنسون الاشتراك في المدونة ❤ و الأنستقرام ❤ والتويتر ❤

حساباتي كلها موجوده أعلى الصفحة

وآشوفكم على حب ❤