مُجـرد ذِكـرَيات | Just Memories

السلام عليكم ورحمة الله ،

كم يوم ونختم سنة ٢٠١٤ وندخل في ٢٠١٥ على خير بإذن الله ، عام أخر مره من حياتنا وأخذ معه الكثير من الذكريات ، صاحبتني فيها أيام سعيده وأيام صعبه قاسيه كلها مرت بفضل من الله 

مهما أتت فترة قاسيه لابد تأتي بعدها فترة سعيده ، خسرت ناس وكسبت ناس تغيرت نظرتي لبعض الامور ، كسبت تجارب وثقافات جديده ، هذي هي الحياة ماتوقف عند أحد ولا تنتظر أحد ماشيه بخيرها وبشرها 

هالتدوينة من ضمن سلسة من تدويناتي عن الـ " Lifestyle آسلـوب حيـاة " آمور حياتيـة تخصني من مشاعر أو مواقف أو سوالف حبيت أشارككم فيها وممكن تحصلون من وراها بعض الفايده أو خلوها تكون ذكرى للزمن 

الحلو في التدوين أو المدونة هي تشبه الكراسه الصغيره اللي نشخبط فيها اذا كنا محتاجين نتكلم ونفضفض او نرسم لمجرد الرسم وفي الغد هذي الكراسة وهذي الشخابيط راح تكون شي قيم بالنسبه لك تذكرينها وتشوفين نفسك فيها ، من وأنا طفله أحب تكون دايم جنبي ورقه وقلم مااعرف استغنى عنهم إلى يومنا هذا أحس الكتابه غييييير بالقلم تلقوني " أكتب وأكتب وأكتب " أفكار غير مترابطه أحلام غير معقوله طموحات غير ممكنه < هذي كنت أنا في وقتٍ مضى 

الآن أنا مازلت أشبه تلك الفتاة الصغيره ولكن مع عقلانية أكثر ونضج أكبر وأنتقلت من تدوين الكراسة إلى التدوين الألكتروني نطاق أوسع وأكبر وهنا ناس تشاركني وتسمعني وتقرأ أفكاري بعكس كراستي السريـة اللي أخفيها عن الكثيييير 

اليوم سأدون معكم بعض من ذكرياتي يمكن أخفي عنكم بعض الأمور لخصوصيتها جدا ولكن لا مانع في مشاركتكم أهم أحداث حياتي لـ هذا العام

❤ في شهر فبراير ولِدت مدونتي وأبصرت النور بفضل من الله وعشت معاها أيام جميله من الحماس و التشويق ومازلت أعيشها والحمدلله تعرفت على مجموعه جميله من الصديقات كانت المدونة حلم ومازالت حلم أعيشه ، أتمني أستمر وأنجح لأن الطريق قدامي طويل ومو سهل أبدا أنك تنجحين وتجذبين ناس لمدونتك وتصيرين أسم كبير في عالم التدوين ويهتمون فيك وبأفكارك وتلهمينهم وتستمرين ، يجيني خوف دايم أني أوقف وأخسر المدونة بس دايم أحاول أبعد هذي الأفكار وأستمتع في كل لحظة و كل يوم معاكم

❤ في شهر مارس انتقلت في مهنتي لمكـان جديد وهذي المره الثالثة لي في مكان جديد والحمدلله وجدت فيه راحتي من بعد ماتنقلت لأكثر من مكان ماوجدت فيه الراحة ولا لقيت فيه الصحبه اللي تعطيني التفاؤل كل صباح عشان أقوم وأترك فراشي وأداوم وهذي أهم نقطه عندي اذا كنتي في مكان كله تشاؤل وتذمر لايمكن تستمرين واكيد بيجيك الأحباط من هذا الجو ضرووري جدا تكونين مرتاحه نفسيا وجسديا في مكان عملك لان هذا مكانك بيكون مده سنوات طويله 

❤ في شهر مايو تحققت أحدى امنياتي وهي السفر إلى آوروبا ورؤية تلك البلدان ( سويسرا ، الريف الفرنسي ، النمسا ، المانيا ) اللي كنت اشوفهم بالصور فقط والحمدلله شفتهم بالحقيقه وكانت روعتها وجمالها لايوصف حتى الصور اللي كنت أشوفها ماكانت توصل حقيقه وحجم هذا الجمال وجات السفره هذي بوقتها كنت محتاجه فترة نقاهه من بعد تعب وشوي مشاكل صغيره اتعبتني ولله الحمد والشكر على كل شي 

( كتبت تدوينه عن سفرتي من جزئين في الصفحات السابقه )

❤ في شهر أغسطس طفلي كمل عامه الأول وكان شعور جميل وأحساس أجمل وأنا أشوفه وهو يكبر قدامي وهو يضحك وهو يبكي وهو يلعب وهو يقول ماما ، صحيح كنت أتمنى تكون صحته أفضل وبكامل عافيته حاله حال الأطفال اللي في عمره ويتحرك مثلهم بس الحمدلله دامه يضحك ضحكاته تسوى الدنيا والله يشافيه لي يارب ويحفظ لكم أطفالكم ويرزق كل محروم هالنعمه 

❤ في شهر اكتوبر و نوفمبر زفيت أغلى رفيقاتي عرايس وشاركتهم الفرحة وكنت سعيده لهم وتمنيت من قلبي لهم التوفيق لانهم أكثر من خوات بالنسبه لي ، وبنفس الوقت ودعت أقرب رفيقه لي وأخت هي طبعا من بعد زواجها عاشت في دبي صحيح فقدنا اتصالاتنا اليوميه وطلعاتنا مع بعض و ضحكنا بس مع بعد المسافه قلوبنا للحين متصله وكل ماتجي الكويت لازم تمرني 

❤ في شهر نوفمبر أهلي أنتقلـو لمنزل ثاني وتركنا منزلنا اللي كبرت فيه ولعبت فيه و في كل ذكريات الطفوله والمراهقه ، فعلا الفراق صعب مهما كان الشي اللي نفارقه دامه يحمل في قلبنا ذكريات يصعب فراقه ، حزنت عليه ومازلت اشعر بغصه وعدم شعور بالامان ماتعودت على منزل جديد احسه غريب مو هذا سريري ولا هذا جدار بيتنا ولا هذا بابنا بس سبحان الله النسيان نعمه والتعود نعمه متأكده انتا نقدر نخلق ذكريات جديده سعيده تعوضنا وتنسينا ذكريات سابقه 

هذي مجرد ذكريات دونتها لنفسي وشاركتها معاكم عشان تكون مرجع لي مع مرور سنوات تذكرني بوقت جميل بكل حالته وأسال الله ان تكون سنة خير وأمان وسعادة عليكم وعلينا يارب 

وكل عام وأنتو بخير

وآشوفكم على حب  ❤