My bath step by step | خطواتي للشـاور اليومي

السلام عليكم ورحمة الله ،

اليوم بتكلم عن طريقتي بأخذ الشور ، طريقتي بسيطه وسهله ومافيها تكلف ابد 

قبل كل شي حبيت اقولكم اني من مده بسيطه قمت وطلبت من " مزيونه وشقرا "
من كثر ما أقرا تجارب البنات والمدح اللي
اسمعه بالذات عن صابونيتها ، راح اذكر لكم تحت عن رأيي فيها . 

بالنسبه للـشور هذي طريقتي يوميا شور سريع و بنفس الوقت نظافه . . 

أول شي أستخدم ( الشور جل ) :

جربت أنواع منهم " زهور الريف - بودي سنتر - بودي اند وورك - سنتر بوينت "

طبعا بلا مناز عشقي بودي اند وورك كل شي في هالمحل يجننننن من شاور جل و لوشن و بودي سبرييه وشموع .

استخدمت الشاور جل على جسمي ، يكفي ريحته وهو بالجسم يعطر الحمام تجنننن روايحهم

رغم انها بس تخلصين من الشور تروح الريحه يعني مو ثابته . .

الخطوة الثانيه ( الصابونيه ) :

" ماصورتها لانها خالصه من عندي حاليا وهذي العلبه الثانيه اللي خلصتها " 

الصابونيه مثل ماقلتلكم فوق طالبتها من " مزيونيه وشقرا " وطبعا اتوقع الاغلب عارفها

هي إمراة تسوي خلطات تستخدمينها في الشور توحد اللون و تشيل الكلف والحبوب اللي بالجسم 

عن تجربتي مع الصابونيه حييييل حبيتها صج صج ي بناات تحسون بنظافه وانتي تستخدمينها 

بالنسبه للتوحيد اللون وغيره مادري مالاحظت هالشي يمكن لان لوني أنا واحد الحمدلله بس قريت تجارب لبنات فعلا يقولون وحد لونهم 

بس انا عجبني لان مثل ماقلتلكم حسيت بنظافه حلوه معاه 

وممكن تستخدمين صابونة البابايا بدل منها انا استخدمتها حبيتها جددا وتقوم بنفس دور الصابونيه

الخطوة الثالثة ( التقشير ) : 

أستخدم مقشر الاملاح واحد خذيته من مزيونه وشقرا و الثاني من منتجات " لاش " 

تقشير الجسم أسويه مرتين او ثلاث مرات بالأسبوع ، لازم تسوين تقشير للجسم عالاقل مره بالاسبوع ، لاتهملين هالشي ضروري الجسم يتخلص من الجلد الميت ويتجدد 

طبعا توزعينه على جسمج كامل و تخلينه ثواني عقب استخدمي الليفه المغربيه وفركي جسمك كامل 

احيانا استخدم نوعين من المقشر في جلسة الشور يعني عقب ما أخلص من مقشر الأملاح واتغسل عددل منه مو تخلينه شوي عالجسم لا تأكدي ان جسمك نظيف منه بالكامل 

عقب أحط المقشر الثاني ماصورته لكم بس عادي اي مقشر استخدمي وبنفس الطريقه وزعيه بالجسم كامل عقب أفرركي وبعد الفرك 

تغسلي عددل 

الخطوة الرابعة ( الترطيب ) :

أهم خطوة ضرورية الترطيب بعد الشور لاااااااااازم 

من " lush " عندهم منتج جميل صراحه و هو مثل البلسم المرطب ،

بعد ماتخلصين الخطوات اللي فوق طلعي عن الماي شوي و ووزعي البلسم على جسمج بالكامل و هو مبلل طبعا و خليه عليك دقايق بعدها ادخلي للماي مره ثانيه وتغسلي عدل منه . .

حبيت المنتج حيل وريحته حلوووه رغم ان ترطيبه اشوفه مو كبيير بس جيد جدا 

أنا أكثر من مرطب استخدم بعد الشور اتنشف زين و احط المرطب 

جربت مرطب فيتامين سي حلوو عالجسم كلله عقب احط ( بلوك اند وايت ) للمناطق الداكنة مثل الركب والاكواع و غيرها 

ودام تكلمت فوق عن مزيونه وشقرا هم عندها مرطب جميييل وترطيبه عالي 

الخطوة الخامسة ( التعطير ) :

بعد ما اخلص من الخطوات السابقه ارش على جسمي

 بودي سبريه من بودي اند وورك أو فيكتوريا سيكرت روايحهم حلوه للجسم 

وهم الافضل بالنسبه لي 

وعندكم المسك تكلمت عنه قبل اكيد ما استغني عنه احطه تقريبا بعد كل شاور

تحت رقبتي ومن عند اذني نقط خفيفه و عند أماكن النبض 

وبخصوص الشفايف جربت مقشر الشفايف من ( لاش )

استخدمه بين فتره وثانيه احط على شفايفي بعدها اجيب قطعه قماش خفيفه

واقشر فيها شفايفي بدون قطعه القماش ماحسيت بتقشير

يعني المنتج بروحه ماشفت ذاك التقشير الممتاز بس مع قطعه القماش

لا بأس به منتج جيد

هذي هي خطواتي البسيطه في الشاور وأهم خطوتين برأيي الصابونيه والترطيب

ضروووري ضروووري ضرووري بشكل يومي 

وبسسسسس

أن شالله تعجبكم التدوينه وتفيدكم لو بالشي القليل 

وأكيد تسعددني ردودكم وتعليقاتكم سواء هني بالمدونة أو بالتويتر 

آشوفكم على حب ❤