لِتدوم رائِحة عَطرك مُده أطَول + أفَكار عَطريه ومُفضلات

  

السلام عليكم ورحمة الله ،

مسالخير جميلاتي اعتذر عن الانقطاع شهرين بسبب بعض الظروف وان شالله الحين أرجع مثل السابق وأنزل مواضيع ماأتاخر 

من وأنا في سن مراهقه لغايه عمر الـ ٢٢ تقريبا ماكانت العطور تشدني ابد عادي عندي اي عطر احطه والسلام ، ماكنت متذوقه للعطور ولا من عشاقها بس أبخها في المناسبات وخلاص ماكان عندي عطر مميز كنت اخذ من أمي ومن خالتي وكانو هم يشترولي هدايا عطور احيانا فكان الوضع عادي عندي واهتماماتي في اتجاه أخر تماما عن الجمال والعنايه والأمور الانثويه ، إلى ان جاء ذاك اليوم اللي طلعت من قوقعتي للحياة وصرت فيه إنسانه ثانيه :d 

حبيت العطور بشكل كبير وجاني فضول أجرب كل الانواع وكل ماسمعت بنت تمدح شي رحت المولات ودورت عليه أشمه واتعرف على الروايح والعطور واساميها لان قبل لما احد يسالني عن عطري اقول ماعرف اسمه جد شي يفشل ماتعرفين اسم عطرك "^_^

 ورحت أبحث في أمور كثيره تخص العطور منها العطور الغاليه ومكوناتها وليش هي مفضله عند الاغلب وليش سعرها مرتفع عن العطور الثانيه وشنو النوتات العطرية واشلون نثبت العطور بالجسم وشنو أماكن النبض كل هالامور جاني فضول أعرفها وأفهمها ، واليوم أكتب لكم عن معلومات ربما في بنات مايعرفونها وأساليب للتعطير بتفيد الكل ان شالله

قبل كل شي خلونا نتعلم الاساسيات في العطور ، العطور تجيك ٤ أنواع أما " كلونيا أو تواليت أو عطر أو عطر مركز " وركزو على الكلمات اللي بكتبها تحت هذي راح تشوفونهم في زجاجات العطور عشان تعرفين أنتي أي نوع خذيتي وتختلف كل نوع بكمية زيت العطر الموجود بالزجاجه

الكلونيا Eau de Cologne : تجيك زيت العطر أقل مع خليط الماء والكحول فتكون أخف وزن ومنعشه يعني اكثرها ماء وكحول . .

التواليت  Eau de Toilett : نسبة زيت العطر فيها أعلى من الكلونيا وتكون مخلوطه من الكحول فقط بدون الماء وأكثر عطرية من الكلونيا طبعا . . 

العطر Eau de Parfum : نسبة زيت العطر أعلى من التواليت والكلونيا ومخلوطه مع الكحول وعطريتها فواحة وواضحه بس في درجة أعلى عطرية منها . . 

العطر المركز Parfum : هنا أعلى كمية راح تتواجد من زيت العطر وقليل ماتكون مختلط معها كحول ورائحتها فواحة أكثر وتركيز أكبر وبالغالب تتواجد في زحاجات عطر صغيره الحجم مع سعر أغلى . . 

اذا عندك عطور ريحتها ماتثبت وتطير بسرعه هذي كم طريقه جربيها عشان العطر يثبت معاك لأطول مده ، بس نقطة بالنسبه للعطور الرخيصه غالبها مايثبت لان كميه الكحول فيها اكثر من العطر يعني ممكن يحطولك ربع الزجاجه عطر والباقي يملونها كحول وماء أما العطور الغاليه فهي تكون نقيه أو مافيها كحول إلا ماندر وهذي تكون ثباتها أكثر و أطول . . 

• حطي نقطة فازلين على أماكن النبض وبعدها رشي العطر راح تدوم لك الريحة مده أطول وثبات أكثر لان الزيت يمتص العطور ويثبتها بالجسم

• حطي على جسمك لوشن بدون رائحه ورشي عليك العطر

لان يقولك البشرة الدهنيه تحتفظ بالعطور مدة أطول من البشرة الجافه عشان هالسبب نحتاج ترطيب للبشرة بس يكون بدون ريحة اللوشن عشان ماتختلط الروايح وماراح تضبط

• رشي العطر مباشرة على جسمك بعد الشاور وقبل ماتلبسين ملابسك 

صحيح ان اغلبية عطورنا فيها كحول ودايم اسمع ان اذا كثرتي رش العطر على جسمك راح يسودك وهذا بسبب الكحول الموجوده بالنسبه للعطور ، هذي مو مشكله بالنسبه لي اياً كان العطر اللي استخدم لان انا هذي ما اسويها الا بالمناسبات وان شالله ماتأثر على جسمي بس لاتسوونها بشكل يومي او بعد كل شور لا ما أنصح عندك عطور سبري خاصه للجسم بعد الشاور هذي خفيفه وحلوه . .

• لاتفركين العطر بين المعصمين 

هذا الحركة أغلبنا يسويها نحط العطر في معصم اليد بعدها نفرك المعصمين ببعض لاعتقادنا ان هالشي بينشر العطر أكثر بس خطأ هالحركة بتطير ريحة " النوته الأولى " وتسرع بإنتهاء ريحة العطر . . 

والمقصور بالنوته كل عطر مكونه ريحته من ٣ نوتات 

النوته الأولى او الافتتاحيه :

هي الريحه اللي اول ماتبخين العطر تشمينها وتوصل لـ الأنف بسرعه

النوتة الوسطى :

هي الريحة الاساسيه للعطر اللي بعد ماتبخين العطر ويبرد شوي تشمين هالريحة وهي اساس العطر وتثبت مده طويله 

النوته الاساسيه :

تسمى قاعدة العطر هذي مهمتها كالحارس لأنها تعزز ثبات قلب العطر وتظهر إذا انتهى وتلاشى وعادة ماتكون مكون ثقيل مقارنة بالنوتات السابقة

• أختاري المناطق الدافئه بجسمك ورشي عليها العطر

عشان تصير ريحتك مميز وخاصه فيك ويمتزج العطر مع جسمك رشي في مناطقك الدافيه مثل الرقبة ، ثنية اليد ، الركبة من الخلف ، مفصل رجلك . . 

• لرائحة أخف رشي العطر بالهواء وامشي وسطه

هالطريقه اذا حابه ريحة ثابته وخفيفه ومتساويه على جسمك رشي العطر قدامك بالهواء وبعدها امشي بخفه تجاه العطر راح تثبت فيك الريحة . .

• عشان تحصلين على شعر معطر 

لاتبخين العطر على شعرك مباشره لان هذا ممكن يسبب تلف للشعر لوجود الكحول في العطر ، اخذي فرشة الشعر ورشي فيها العطر بعدها مشطي شعرك فيها هنا تخففي من اثر التلف وتحصلين على شعر معطر او الافضل انك تستخدمي عطر الشعر الخاص او خمرية للشعر . .

[ . . أفكار تفيدك  . . ]

>> سويلك لوشن معطر 💜

دايم لما تخلص عطورنا تبقى منها كميه بسيطه في الزجاجه صعب نرشها واصلا العطر ماصار يرش او يبخ شي فـ نرميها على طول ، هالمره أخذي هالفكرة البسيطه اذا بقى من عطرك شي افتحي زجاجه العطر وجيبي أي لوشن عندك بدون ريحة وحطي بقايا هالعطر في علبه اللوشن وهنا تحصلين على لوشن معطر و ايضا استفدتي من أخر حياه في العطر هههههههه

>> سويلك عطرك الخاص 💜

بقايا العطور اللي في الزجاجات جمعيها واحتفظي فيها وحاولي تبتكرين روايح مميزه مثلا ( عندك بقايا عطر كوكوشانيل و عطر ديور ) اخذي نتفه من العطرين وامزجيهم مع بعض في راحه يدك وانتظري اذا شفتي ان الروايح تجانسو وطلعولك ريحه حلوه جميله هنا قومي واخلطيهم في زجاجه عطر واحده اما اذا ماضبطت الريحه جربي عطر اخر تمزجينهم في يدك وشوفي الروايح اللي ترضيك ، طبعا بالنسبه لزجاجات العطور في بـ سيفورا احجام صغيره والوانها تشوق ممكن تاخذينها وتفيدك تكون لشنطتك وايضا تناسب حجم المزيج اللي سويتيه لبقايا العطور وهنا انتي الكسبانه حصلتي على ريحه جديده واستفدتي من بقايا العطور . .

وبما ان في موضوع العطور خلوني أقولكم عن مفضلاتي من العطور هالموسم لان اعتقد من زمان ماحطيت لكم مفضلات للعطور ، طبعا امر طبيعي كل فترة تفصلين على عطور معينه لان اصدارات العطور لاتنتهي ، وأنا صايره الفترة الاخيره أحب العطور اللي فيها عنبر او روز مادري ليه . . ! 

عطر عنبر ديور

هذا العطر عرفته اول مره في لندن ٢٠٠٩ اعتقد او ٢٠١٠ في السلفرجز كان حييل منتشر والعرض عليه كثيير اعتقد تو كان نازل وشميت اكثر من شغله بس العنبر عجبني اكثر شي وقتها خذيته من هناك هذيك السنه ومن يومها احبه وكنت ادوره عندنا بس مالقيت وقبل سنه او سنتين نزل بالكويت وصار متوفر بس طبعا بسعر أغلى بس هذا اللي عندي خذيته من التشيك سعره ارخص شوي و خذينا منهم ٣ عطور من ديور عطر عنبر و عود اصفهان و ليذر عود ، بالنسبه لعطور العود عندهم حيييييييل ثقيله ماتحملها اصفهان حلو حق مناسبه مع بخور صحيح احسه يخنق اول ما ارشه بس نطرو عليه شوي يبرد ويصير اخف بس هو رسمي جدا وينفع حق شتاء اكثر ، اما العنبر حبيته وهو المفضل عندي من بين عطور هالمجموعه مركز وثاااابت بشكل رهيييييب اشم ريحته علي يومين جد ثباته يجننننن عشان هالسبب سعره غالي يوصل بحدود الـ ٩٥ - ١٤٠ دينار كويتي حسب الحجم ومثل ماقلت لكم العنبر من الروايح المفضله عندي . . 

عطر كوكو نوار شانيل

هالعطر شدني شكله قبل ريحته حبيت لونه والسواد معطيه فخامه وأناقه وريحته أسرتني شي ناعم على فخم يصلح للمناسبات والجمعات ريحته تجي ورد على ياسمين على مسك شي جمييل جدا حبيته . .

عطر بلاك اوبيوم إيف سان لوران

عطر زهري شرقي حييييييل جذبتي ريحة الفاكهة اللي فيه مع اني مو كثير مع ريحة الفواكة القويه كانها ريحة حلاوه احسها تتفع للبنات الصغار صحيح منعشه بس ماتعجبني كثير بس هالعطر الحلو فيه انه داخل معاه ريحة زهر ياسمين وفانيلا معطيها ريحه نهاريه انثويه منعشه احسها تنفع للصباحات . . 

عطرين من لورد 

ماركة حسب ماعرفت انها بريطانيه جابتلي صديقتي عطرين لما سافرت الرياض جد جد مغرررررمه في روايحها بشكل كبير وللاسف ماعندي معلومات كافيه عن هذي الماركة اللي اعرفها انها موجوده في الرياض بالحياة مول وفي غرناطه اعتقد جد ودي اروح واجرب كل عطورهم ، عندي هالعطرين خيااااال تصلح للمناسبات والجمعات روايحهم مادري اشلون صايره حاولت اصيد الريحه بس عجزت احس مالها شبيه شي زهور اعتقد الوكاد انها من مفضلاااتي من مده ويااليت بنات الرياض يزودوني بمعلومات اكثر عنها لان كان مالها أفرع حتى مالقيت لها حساب عالنت  . . 

وبس

آشوفكم على حب 💜