سوالف ~ يومياتي مع الغربة

السلام عليكم ورحمة الله ،

احترت كثيير وين اكتب هالتدوينه هنا أو في الأنستقرام وفكرت ان الانستقرام ممكن بيوم وليل ينتهي وكل شي فيه يضيع فقلت مافي الا المدونة اقدر احفظ فيها آشيائي اللي حابه أتذكرها بعد مدة طويله ومافي مانع احط كم شي في الانستقرام 

تدوينتي اليوم هي يوميات حابه اوثقها لنفسي للزمن يومياتي مع الغربة وحابه أشارككم فيها ، راح تكون على شكل سلسة  "ربما" اكتب فيها عن يومياتي من مشاعر ، مواقف ، أحداث أفضفض فيها لي ولكم بعفوية وبدون تكلف . . 

في يوم " ٦/مارس " بحكم ظروف اضطريت للغربه مع زوجي وطفلي الصغير لأول مره 

أبدا ماتوقعت انها بهذي الصعوبه صحيح انا مازلت في بدايه أيام الغربه ولكن في مخيلتي كنت اعتقد ان الغربه شي جميل ولكن الصراع اللي عشته قبل حتى اسافر بايام او باسبوع كان جدددا صعب ضغط نفسي كبير علي ، اشلون بسافر واترك امي واهلي للعلم انا متعلقه بأمي وماتذكر تركتها فترة طويله حتى لما تزوجت انا كنت عندها بشكل يومي لغايه الآن لان بيتي قريب منها وطفلي دايم عندها لانه اول حفيد فكانو اهلي متعلقين فيه ، كان الفراق هو اصعب شي عشته فراق اهل وبيت وبلد وخايفه من لحظة الفراق كيف بتكون كنت احاتي هالموقف اتذكر اني سلمت على امي وانا عيوني تحت يعني مشغوله مابي اشوفها وتطيح دموعي ومن نبره صوت امي حسيت فيها وحاولت اتمالك نفسي عشانها عشان ماازيد عليها وابين لها ان الامر عادي 

، جاء وقت السفر وكانت أول مره أسافر بطفلي متخوفه وكنت احاتي اكون ناسيه شي يحتاجه خصوصا بالطياره ومسافه اكثر من ٦ ساعات لان كانت طيارتنا تنزل بالاول على ألمانيا بعدها نطير بطياره ثانيه للتشيك فالطفل يحتاج أطعمه خاصه ملابس وتغييرات للحفاظ وأمور كثيره صحيح كانت رحلة متعبه وطويله بس الحمدلله ربي يسرها . . 

خلوني أكلمكم عن مدينة تبليتسه مدينه منغلقه شوي يعني أغلبها مصحات علاجيه ومستشفيات عشان هالشي بتشوفون كميه خليجيين هنا موطبيعيه ويقولون لكم بالصيف الاعداد تزداد بشكل كبيير ، هنا مافيها مولات فخمة فيها تقريبا مولين او ٣ مولات متواضعه تلبي احتياجاتك البسيطه من ملابس وقطنيات ومواد غذائيه وصيدليات جماليه ، بس عندك مجال تزوري المدن القريبه منها تلاقيها أكبر وأفخم وحتى من ناحيه تمشيه أحسن لان تبليتسه نقدر نقول بدائيه ليست مدينة سياحيه . . 

بالفتره الوجيزه اللي تميت فيها هنا زرت العاصمة التشيكيه " براغ " تبعد ساعه عن مكان أقامتي كنت أروحلها أيام الويكند بحكم انشغال زوجي فما يكون عندنا وقت كافي نروح مدن ثانيه لاني ماحب اتأخر عن البيت بعد الساعه ٦ هنا تبدأ تظلم الدنيا وأحب أكون في البيت هالوقت ماأطلع بعده ، بالغالب اذا ماعندنا شي وشفت طفلي مل من خنقه الشقه لان شققهم صغيره نوعا ما أخذه ونطلع مكان قريب أما بحيره أو مول أو حديقه . . 

الأجواء عندهم بارده إلى الأن صحيح بدأت تدفى شوي قبل كانت درجات الحراره بين الـ ١ و الـ ٧ الحين لا وصلت الـ ١٤ مرات وهذا شي طيب ، لاني خايفه على طفلي من البرد والهوا البارد وسالفه الصخونه والتعب ، بس عندهم شي جدددا رائع وهي التدفئه المركزيه يعني من نشغلها خلاص المكان كله يدفى هي مثل الدفايات اللي تعطي حراره مهما كان الجو في الخارج بارد وثلج داخل السكن ماتحسين بالجو البارد ابد . . 

هنا المطاعم الله يديم النعمه ماتنوكل بالذات المطاعم العربيه أولا طعم سيئ ثانيا أسعار مبالغ فيها صراحه وعشان هالشي فضلت أطبخ في البيت اشتري من السوبر ماركت اللي احتاجه وأسويه في البيت لان صج مافي أحلى من أكل البيت تحسين بالأمان حتى انه نظيف وطازج مو أكل بايت ومدري وش يحطون فيه ، طبعا السوبر ماركت عند الاجانب بشكل عام يشوووق تشوفين أشياء ماشفتيها من قبل ، جاني الفضول أجرب كل شي بس المشكله في لحم الخنازير وانتو بكرامه وزيت الخنزير و الكحول تلاقونهم دايم في أكلهم " الحلويات والعصاير و البسكوت و الالبان والحليب " والأصعب من هذا أن هنا لغتهم تشيكيه مايكتوب ابدا بالانجليزي وانا توهقت ابي افهم شنو محتويات هالمواد مو قادره ، واكتشفت برنامج خطيييير في الايفون حق اللي متوهقين مثلي في هالسالفه اسمه " google translate " نزلوه من الآب ستور هذا الله يسلمكم عنده الماسح الضوئي يعني مثلا في كلام ماعرفتي تقرينه في علبه دخلي على هالبرنامج وصوري الكلام اللي بالعلبه ويترجملك اللي بكتوب باي لغه كانت :)) جدددددا فادني هالبرنامج تشوفوني في السوبر ماركت امشي واصور واترجم :d 

اليوم بتاريخ ٣١/٣/٢٠١٥ صحيت الصبح وقمت غسلت وجهي وصليت بعدها رحت أصحي طفلي وفتحت الستاره إلا اشوف اجمل منظر ممكن الواحد يصحى عليه وهو " الثلج " كانت الدنيا كلللها أبيض والثلج يتساقط من السما ياللله ي جمال هذا اللون ، طبعا هذي المره الاولى اللي اشوف ثلج يتساقط بحكم اكيد بيئتنا الصحراويه لكني رحت وشفت جبال ثلجيه في أوروبا لكن كسقوط ثلج ماشفت ، جد فرحت بالثلج وكأني طفلله وصحيت زوجي عشان يشوفه معاي وننزل طبعا عطاني هذيك النظره :$ بس الحمدلله ماخليتها بخاطري انتظرته لما صحى بعدها نزلنا صحيح ذاب الثلج شوي لان بعدها جات امطار وذوبة الثلوج بس كان شي حلووو وسعيد ❤️

عاد تبون الصج ! اشتقت لـ أهلي اشتقت لـ بلدي اشتقت لـ بيتي لكل شي احس جاني حنين من بدري يمكن المده قصيره اللي قضيتها بعيده عنهم شهر تقريبا لكن لما اتعب من شي اتذكر والدتي " الله يخليها لي " كانت تساعدني فيه اكتشفت انها كانت مريحتني في امور كثيره حاسه اني ضايعه بدونها وكل شي بعاتقي الحين وانا اللي حامله كل شي بروحي يخوفني هالشعور ، ، 

سبحان الله مهما كنتي في مكان جميل حتى لو كان اجمل من المكان اللي عشتي فيه من ناحيه جوو وطبيعيه وكل شي ، بس مافي مثل لما يجي أخر الليل تحطي راسك على فراشك وفي بيتك وفي بلدك هنا فعلا الراحة والأمان 

وبس

آشوفكم على حب ❤️