Just Feelings ❤ مُجـرد مَشاعـر

السلام عليكم ورحمة الله ،

بعد نهاية كل يوم وبالتحديد الساعه ١٢ فجرا هنا تبدأ آوقاتي اللي أنتظرها كل يوم بشغف،

هنا تبدأ لحظاتي اللي أختلي فيها مع نفسي و أسوي أشيائي اللي أحبها من تدوين و تصميم و قعده عالانستقرام و متابعه الافلام ❤

 يمكن مو الكل يعرف هذا الشي عني ( أنا مـامـا جديده ☺ ) قبل ١٠ شهور من هذا الوقت الله أنعم علي بطفل صغير غيّر كل حياتي 

أحس إني صرت إنسانه جديده صحيح ان الزواج غيرني شوي بس الآمومه غيرتني كليا

ماصرت "فرح" البنت المدللـه الحساسه المعتمده على والدينها بكل شي ، سبحان الله انا بنت حساسه ومشاعري على قولتهم فياضه والدمعه على طريف ، مازالت فيني هذي الامور ربما بس صرت أشعر بقوة السيطره على مشاعري 

أتذكر أول ماولدت طفلي ماكنت متوقعه اني بتحمل الولاده وماراح أنهار " رغم اني انهرت حبتينشوي ههههه هذا وانا حاطين لي ابرة ظهر " ماحسيت بألم صراحة بس لما كانو يضغطون على بطني عشان ينزل الطفل ومن الخرعه قعدت أبكي لان قالولي ان الحبل السري ملتف حوالين الطفل ، هنا تذكرت وحده من رفيقاتي وهي تولد مات طفلها عشان جذي أنهرت وقمت أبكي بس الحمدلله ربي لطف بحالي وطفلي طلع بخير وسلامه 

وسبحان الله ماكنت أتصور إني بهتم في طفل أرضعه وأغيرله وأشوف احتياجاته ، أنا أكبر وحده من خواتي وأخواني ماعندي أحد متزوج وطفلي كان أول حفيد لأهلي ، فما تعودت أهتم بطفل صغير اصلا ماكنت أعرف اشيله 😅 

أصعب لحظات أتذكرها لما طلعت من الأربعين ورجعت بيت زوجي ، ماكنت ابي أرد لبيتي تمنيت اقعد اكثر كان موقف صعب كأن أول يوم زواج و مفارقه أهلي :"(

هنا تميت أنا وطفلي وجهاً لوجه هههههه لان كانت أمي تساعدني عليه لما كنت عندها ، هنا بدأ الجهاد وأنا المسؤوله عن الطفل مسؤوليه تامه ، لازم أعرف وقت رضعاته وما أنام وأخليه جوعان لازم أعطيه كل فتره يعني نومي مقطع فعلا كنت في حالة توتر وخوف أني ما اكون قد المسؤوليه . 

من الآشياء المضحكة أن أمي كانت كل دقيقه تتصل علي وتسأل عن طفلي وتقولي صوريه وطرشيه بالواتس اب بشوفه وأنا أضحك عليها أقول : لا الحمدلله انا وولدي على قيد الحياة :d 

محد يتخيل اشلون كنت أنتظر الليل يجي وينتهي اليوم بسلام وينام طفلي على خير وقتها أقوم أطلع الكاكاوياات اللي عندي و آحلى قهوه عربيه أو أنواع العصاير أجهزها و اتفرج على التلفزيون او أشغل فيلم هنا قمممة سعادتي . . ❤️

 سبحان الله الواحد مايحس بطعم الراحة إلا اذا جرب التعب ، قبل كنت ازهق من القعده اذا فاضيه وماسوي شي ، الحين الدقايق اللي يكون فيها طفلي نايم على خير وخلصت كل احتياجاته أحسها أغلى دقايق صرت ألقى الاستمتاع في إني قاعده وماسوي شي ، صار الوقت ثمين بالنسبه لي ، الساعات اللي أقضيها مع طفلي مهمه وسعيده الحمدلله فيها و الوقت اللي أخليه لنفسي و ارتاح فيه مهم بعد 

  • وإِنَّ لِنَفْسِكَ عليك حَقًّا • 

أول أشهر من عمر طفلي تقريبا قبل عمر الـ ٦ شهور كنت ما أصدق أمي تقول خليه عندي ينام وأنتي روحي بيتك ، أخليه عند أمي و خواتي وأنا أرجع بيتي وأنـــاااااام ، كان النووم أزمة بالنسبه لي كنت أتمنى أنام ٧ ساعات متواصله ، وقتها فعلا تعبت نفسيتي لاني متعوده اذا كنت في إجازة أنام ١٠ ساعات إلى ١٢ ساعه ، مايكون وراي لا دوام ولا طفل ولا شغل ولا شي 

بس مع طفلي #ربي_يحفظه نسيت النوم والراحة وكنت أقول معقوله بـ يتم الحال جذي  تعب في تعب 

بس والله ي بنات من صار بعمر الـ ٦ شهور و فوق و بدا يلعب ويضحك ويفهم ويعرفني ويعرف أبوه صرت ما استغني عنه دقيقه " مع أن طفلي طبعه شيين و مدلع وعنيد 😢 "

حتى لما أمي تقول خليه ينام عندي ماخليه ، يا انا وياه والا ماخليه بروحه و الحمدلله عدت الأشهر الأولى على خير ، صج العمر هذا بعد متعب من ناحيه أكله والطفل تزيد حركته لازم انتبه له اكثر وغيره بس أرحم عالاقل أنام زين ، وصرت متعلقه فيه حييييييل وصار أجمل شي بحياتي عسى ربي مايحرمني منه ويرزق كل محروم يارب 

صايره أحب أسمع سوالف الأمهات عن الاطفال وتجاربهم عشان استفيد و هم الواحد لما يسمع ناس مثل وضعه وظروفه يرتاح شوي ، خصوصا كأمهات جدد محتاجين نعرف تجارب الامهات الثانين عشان نتعلم 

صحيح اشتقت للعزوبيه وحياتي اللي كنت أنا محورها الأساسي ولا شغله ولا عمله ، اطلع بالوقت اللي أبيه و أنام بالوقت اللي يعجبني و طوول الوقت منسدحه ولا اتحرك والناس تخدمني ويسوون أكلي وكل شي 

بس مافي شي يتم على حاله لازم الواحد يكبر وتتغير حياته وأوضاعه وظروفه ، هذي سُنة الحياة والحمدلله والشكر على كل نعمه 

مادري ليش كتبت هالبوست 

أعتبروها نوت حقي بعد سنوات أقراها

أعتبروها مشاعر حبيت أشارككم فيها 

وبس ☺

آشوفكم على حب ❤