السلام عليكم ورحمة الله ،
رجعت لكم مع الجزء الثاني من رحلتي إلى آوروبا
انطلقنا من جديد إلى مدينتنا الجديده
( آشانسي ) مدينة نمساويه جميييله حبيت هدوءها و عزلتها وتطل على بحيرة جمييله جدااا
مافي اماكن سياحيه قريبه منها بس قدرنا نزور " متحف الشوارفيسكي " كانت جولة سريعه فيه
يعرضون لنا تاريخه و منحوتات ومجسمات مسوينها من الشوارفيسكي
وباقي الأيام قضيناها نتجول بالاقدام حوالين المدينه
وركبنا سفينه خذتنا في جوله على مدن قريبه منها بس مانزلنا فيهم بس شفناهم واحنا بالسفينه .. أنصح فيها لمحبي الهدوء والعزله
بيني وبينكم أنا مزاجيه شوي مالي جو معين ،
حيييييل استمتعت بأجواء الريف والهدوء والعزله وان مافي مولات بس بحر وجبال وطبيعه
بس عقب مده حسيت بملل نفس الجبال ونفس البحيرات نفس الاجواء بغيت شي جديد ،
اشتقت لحياة المدينة والمولات وقعّدت القهاوي
والعكس صحيح من كثر مو انا عايشه وسط مدينه ومباني عاليه وزحمة وازعاج أحن لأيام الريف واقول لنفسي اشلون زهقت منها
أنا شخصيتي فيها تناقض من ناحية إني أحب الهدوء والعزله مع هذا ما أقدر أعيش بدون جمعة ناس و حركة :)
ماعلينا مني الحين خلوني أكمل لكم الرحلة
بعدها محطتنا ماقبل الأخيره كانت " زلمسي " المدينة النمساويه النابضه
رغم زحمة الخليجيين وانا للامانه مكان فيه خليجيين ماحبه لعدة اسباب منها خزني واخزك
بس المدينة حلوه حسيت فيها حركة عكس المدن اللي قبلها ، عرب كثييييير ماشالله ومطاعم عربيه اكيد وفيها قهاوي و محلات تسوق
أول يوم في هالمدينة خليناها استكشاف رحنا محلاتهم وجربنا مطاعمهم وتمشينا فيها
ثاني يوم رحنا لـ شلال " نسيت اسمه بس شلال معروف قريب من زلمسي "
وبعد مانزلنا من الشلال وقفنا واخذنا استراحة في كافيه كان عند مدخل الشلال
في زلمسي تقدرون تاخذون جولة في المراكب الصغيره او السفينه وتاخذكم لـمدن قريبه اذا حابين تنزلون فيها
أكثر شي اشتقتله ❤ الوافل ❤ كان في رجل معاه عربة صغيره
و يسوي الوافل مع النوتيلا شي لذييييييذ رغم إنو بسيط بس لاني فعلا اشتقت للنوتيلا وقتها
وقمت وشريتلي فراولة وقطعتها وزينّت الوافل
فندقنا في زلمسي كان من اجمل الفنادق اللي سكناها ، موقعه على البحر وإطلالاته قمة بالرروعه
وكل شي قريب عنده محلات وسوبرماركت ومطاعم و حدايق وهو الفندق راااااقي فعلا
اسمه ( قراند هوتيل )
شوفو موقعه كأنه داخل في البحيره يجنننننننن
أنا كنت أقعد عالبلكونه مسويه قهوتي واتفرج عاللي رايح واللي جاي :))
عندهم في كل سوبرماركت " مخبز " يسوي الخبز والفطاير والدونات وآشياء لذيييذه
والريحة من أول ما أدخل أشمهاا ريحة الفطيره وهي طالعه من الفررن يمي يمي
كنت حابه أروح لقمة " كابرون " ولكن بسبب الاجواء مانفع نروحلها ، فقلنا نروح لشي قريب مافي غير " الزحليقة الصيفيه "
للاسف ماصورتها لكم بس تقدرون تشوفونها من النت
جربناها للمرة الثانيه و ماعندي مانع أجربها مليون مره :))
أوروبا بشكل عام حلو الواحد يتمشى بالسيارة ويكتشفها واذا وصلتي مدينة أركنو السياره وتمشووا بالأقدام
ماشالله الجو عندهم يساعد عالحركة صحيح شمسهم أحيانا حارة بس أكيد مو نفس شمسنا
وبعد لاتنسوون كريمات الحماية من الشمس لان معروفه شمس أوروبا تصبغ اللون على طول
أنا رديت الديرة لونين هههههههه رغم اني حاطة حمايه من الشمس لوجهي بس إيدي ماحطيت صراحة نسيييت :d
وآخر محطاتنا خصصتها " للتـســوق وبسسسسس "
وكانت إلى مدينة ( ميونخ ) مدينة ألمانيه ومشهورة بالتسوق
طبعا تختلف هالمدينه عن باقي المدن اللي زرناها حتي بطبيعتها
مافي جبال وبحيرات و جوهم حار شوي وقتها
كنت مجهزه لسسته طويللله من اسامي محلات ومولات بس أحس ما كان في وقت كافي
هي صحيح ٤ أيام بس انتو عارفين ان في أوروبا الساعه ٧ كل شي يسكر
فـصعب الواحد يروح أكثر من مكان في اليوم
عموما أول يوم وصلنا ما كان معانا وقت كافي تقريبا ساعتين وتسكر المحلات
و دام سكنا قريب من الشارع الشهير للتسوق " شارع المارين بلاتز " فبعد ما حطينا الشنط بالفندق نزلنا عالشارع و كان ززززحمة خليجيين وعرب من كل شكل
حاولت أشوف المحلات عالسريع وأعرف شنو البضايع وشنو اللي أبيه واللي ما أبيه
لو تشوفون شكلي أركض أركض عشان ألحق ههههههه
بعد هالشارع هذا مايحتاج تروحون أي مول أو أي مكان ، عقب حوستي اكتشفت ان كل شي في هالشارع أحلى المحلات و أفضلها
وهالشارع يوديك لاكثر من شارع وطول الشارع بتشوفون محلات يمين ويسار، يدخلكم على شارع الـ " كارلز بلاتز " و شارع " ماكسمليان " هذا شارع الماركات كللله ماركات شانيل و رولكس و أل في وغيرهم
في شارع الـ " كارلز بلاتز " بتحصلون مول فيه ماركات اسمه " operpollinger "
حلو هالمول فيه ماركات عالميه و فيه ماركات ألمانيه حصريه
ثاني يوم رحت لآوت ليت " Ingolstadt Village "
رغم ان آوت ليتاااات ميونخ صدمت توقعاتي ، كنت أحسب بتكون مثل آوت ليت لندن بمثل قوة الماركات اللي هناك
في هذا يمكن آحلى شي محل الـ " فالنتينو " و " فيرزاتشي " و " تودز "
وخذيتلي كم شغله منهم شوزات من تودز و ساعات
وثاني آوت ليت زرته " metzingen "
كان جميل فيه محلات حلوة
" برادا " جيمي شو " بولو " بربري "
وغيرهم من الماركات ، في محل حلويات و شوكولا ألماني لذيييذ ويصلح كـ هدايا
بس تأكدو أنه خالي من الكحول ، عندهم قسم بدون كحول
والآوت ليت كل واحد رحتله بيوم بروحه لان المسافه بعيد شوي بالسياره وعلى ما نتمشى فيه ونرد فندقنا إلا ظلمت الدنيا
ثالث يوم لنا واللي هو قبل سفرتنا بيوم رحت لـ مول " ريم آركادا "
حلو المول و غالب محلاته موجوده بشارع المارين بلاتز بس مافي مانع من زيارته أكيد
وبعد ماردينا من المول رحت للشارع واستكشفته بالكامل " دار دار زنقه زنقه " ههههههههه
صج هالشاااارع عششق ماتشبعييين منه
عندهم محل " دوغلاس " الخيالي ❤
مثل دبنهامز عندنا او فيسز كللله عطور و ميكب
أتذكر اني شريت عطورات حصرية عندهم و ميكب و خرابيط ثانيه وطلع حسابي بحدود ٧٠٠ دينار كويتي مايقارب الـ ٩٠٠٠ ريال سعودي
جد انصدمت من المبلغ وأنا أشتري ما حسيت لاني شريتهم على دفعات ، بس لما شفت كشف حسابي طلع هذا المبلغ اللي صرفته في هالمحل ؛|
حسيت اني زودتهااا بالعطور بس شسوي كل شي عجبني لو بيدي اخذ المحل كلله
عندهم محل " كاف هوف " بعد حلوو تقريبا ٥ أدوار كل شي تبونه عندهم من ملابس نساء واطفال وميكب وعطور وكل شي
خذيته منه فساتين ناعمه و بلايز
وأكيد محلات " اتش اند ام " و " فور ايفر ٢١ " بضااعتهم أحلى بكثييييير من اللي عندنا مدري وش السر !!
فور ايفر ٣ ادوار من حلاته ماقدرت اطلع منه الا ماخذه جم قطع
يوم جيت أحاسب بغيت أبكي من طوووووووووول الطابور اللي ناطرين يحاسبون
قعدت نص ساعه يالله وصل دوري :"(
ومثل ماقلتلكم مايحتاج تروحون مولات هالشارع يغنيكم عنهم
بس تحتاج يومين و ثلاثه عشان تشوفونها عدل وعلى مهلكم
لان في بعض المحلات تكون مخشوشه على جنب وماتبين ويكون حجمها صغير هذيلا عندهم أشياء ماتتخيلونها شي حصررري و شغلات مميزه جددا
بالنسبه للاسعار مافي فرق كبير بينهم وبينا يمكن فرق ١٠٪ او ٢٠٪ أرخص
هذا كل اللي قدرت آتذكره
ان شالله يكون وافي وكافي و مرجع بسيط
لكم اذا بتسافرون لـ هالدول
وإذا حابين تشوفون صور أكثر للرحلة وبعض مشترياتي
أدخلو على انستقرام المدونة
@_lecristal
وحسابي الشخصي للتصوير
@_whiteberry
روابطهم موجودين أعلى الصفحه على اليمين
و آشوفكم على حب ❤
No comments:
Post a Comment