Thursday, May 12, 2016

فضفضة ~ عنايتي الشخصية + بعض النصايح " للمتزوجات "

السلام عليكم ورحمة الله،



كان ودي من زمان اكتب في أمور تخص البنات المتزوجات بس حسيت ان المواضيع راح تكون ثقيله شوي وحساسه فقلت أبتعد عنها أحسن وغير هذا ماعندي حاليا الوقت والطاقه عشان اكتب مواضيع كبيره مثل هذي ، قلت خليني أتكلم في موضوع الكل اعتقد يدركه وكل زوجه تدرك مدى أهميه النظافه الشخصيه قبل كل شي واكيد كل وحده واسلوبها وطريقتها الخاصه ، وماننكر ان في بنات وان شالله قله مايعرفون طرق الاهتمام المطلوبه كونها متزوجه وان العنايه الداخليه اهم بكثير من الشكل الخارجي وكلاهما مطلوب اكيد يعني ماينفع تهملين جانب عن جانب أخر كلهم مستوى واحد


هنا اليوم أتكلم لكم عن اسلوبي الخاص ومنتجات أفضلها دايم ، وانتي عندك الخيار أما نفس منتجاتي أول منتجات أخرى . .

الشاور اليومي مهم جدا مو شرط انك تغسلين شعرك كل يوم أو يكون شاورك طويل وسنفره وحركات لا الشاور الطويل خليه مره أو مرتين بالاسبوع هو اللي تكونين فيه فاضيه وتاخذين راحتك بسنفرة جسمك وغسل شعرك واشيا تحبينها بالشاور ، لكن الشاور اليومي مايحتاج اشيا واجد هو بس شاور استعدادي عشان تصحصحين وتنظفين جسمك من التعب أخر النهار والتعرق ، انا دايم أفضله بالليل احب أنام على نظافه وريحه حلوه وجسم مترطب ومرتاح ، ماحب الشاور الصبح احس ماينفع لان بعدها بيصير جهد وتعرق فمحتاجه تنظفي نفسك ، فـ الشاور اليومي مهم لكل بنت بالذات المتزوجه والاهم من هذا مابعد الشاور . .



. . [ روتين ما بعد الشاور اليومي ] . .




>> غسول المنطقه الحساسه 
بعد ماخلصتي شاور وتنظفتي زين أستخدمي غسول للمنطقه الحساسه ، الغسول يومي للمنطقه عشان ينظفها حتي تصير المنطقه مطهره واذا صار " جماع " بعدها يفضل ايضا بعد ماتخلصين تستخدمين الغسول واكيد شاور للطهاره ، انواع الغسول للمنطقه الحساسه كثيره وفي منها مناسب للكل وفي منها خاصه للحوامل وللمرضعات يعني تاكدي انتي شنو وضعك واختاري الغسول اللي يناسبك ، او بامكانك تستخدمي غسول افضل من اللي بالصيدليات وهو متوفر عندج في البيت ( غسول المره والملح ) جيبيلك حوض ونقعي فيه ( كسرة مره وملح ) معقم طبيعي وغسول رائع بس مشكلته انه يحتاج وقت هالعمليه لان لازم تجلسين بالحوض كم دقيقه بس ممكن تحطين كسرة المره في بطل ماء وكل مادخلتي الحمام اغتسلي فيه . . 




>> مسك الطهارة / المسك الاسود
هذي الخطوه مهمه للمتزوجه ولان المنطقه الحساسه تتعرض كثير للالتهابات والافرازات والروايح الكريهه هذا المسك مهم لهذي المنطقه فهو مثل العلاج سبحان الله يحميك من الالتهابات وينظف المنطقه وايضا يعطيك ريحه نظيفه ، اول ماتفتحين المسك ماراح تعجبك ريحته غريبه شوي وثقيله ولكن بمجرد ماتحطيها عالمنطقه من الداخل شوي راح تطلع ريحه مقبوله طبعا المسك الاسود هذا انا خذيته من القرشي ، اهم شي تاكدي انك تاخذين النوع الاصلي من مكان مضمون ، ومسك الغزال وصانه عليه رسولنا الكريم لما فيه من فايده للمرأه . .

حديث عن عائشة رضي الله عنها إن امرأة سألت النبي صلى الله عليه وسلم عن غسلها من المحيض ، فأمرها كيف تغتسل ،

قال : خذي فرصة من مسك فتطهري بها 
قالت: كيف أتطهر بها ؟
قال: تطهري بها 
قالت : كيف؟
قال : تتبعي بها أثر الدم

من الحديث الشريف تتبع اثر الدم يعني لما تنتهي من الحيض مكان اللي يخرج منه الدم هنا تحطي المسك ، وهذا المسك مايستخدم يوميا لااا يستخدم عند انتهاءك من الحيض ، واحيانا انا استخدمه مرتين بالشهر بس ماعرف مدى صحه طريقتي ، وطريقه الاستخدام تؤخذ قليل من المسك والافضل بالاصبع نقطه بسيطه ومكان الفتحه تدخلينها شوي للداخل راح تحسين بحرقه بسيطه بس تزول بسرعه ، المسك ترا نوعين في اللي لون يجي ابيض فاتح وفي الغامق للمنطقه الحساسه ماينفع المسك الابيض انتبهي اخذي المسك الاسود فقط . .





>> مرطب الجسم
في كل بوست وكل موضوع عنايه لازم اقول الترطيب مهم مهم مهم مهم البنت بدون نعومه ملمس جسمها ولاااااشي معلش انا اشوف ان لما زوجك يكون قاعد عندك ويمسك ذراعك ويلقاها ناعمه هنا تكمن الانوووثه لان الريحه اكييد بتكون ريحتك زينه الله يخلي العطور وحتى الرجال الحين كل واحد ريحته ازين من الثاني لكن النعومه هي اللي تميز البنت وانوثتها ، مو يصير جسمك وجسم الرجال واحد كله خشونه وشعر تحت الجلد وحبوب ، فـ كل يوم بعد الشاور رطبي جسمك باي مرطب يعجبك ، عندك لوشن الفازلين جميل وسهل ومتوفر عندك لوكستان زيوتهم اللي للجسم خيااااال ترطيب ولا أحلا وريحه أجمل ، انا الاقرب لقلبي هو زيت جونسون صراحه عشششق وترطيب ولا عالي ، المهم تختارين اي نوع مرطب بس حاولي تبتعدي عن لوشنات الجسم الي بريحه مثل باث اند بودي وغيره لاننا مانبي ريحه الريحه بعدين بنستخدم عطور للجسم . .





>> زيوت عطريه 
هذا النوع من الزيوت مااستخدمه يوميا ممكن ٣ مرات بالاسبوع او في اوقات انا حابه ألبس وأتزين لزوجي ، وأحط الزيوت في الجزء العلوي من جسمي فقط ، لان هي ترطب وبنفس الوقت تعطي ريحه عطريه حلوه ، عندك اللي من أصغر علي هذا يجنن عندي منه الجل هذا والعطر ماله ويعطي لمعه حلوووه للجسم وملمس مخملي وممكن بعدها اتعطر من نفس العطر عشان توضح الريحه اكثر ، والثاني زيت بعطر بدون لمعه هو يجننننن وترطيبه حلو ونعومته روعه . .




>> عطور الجسم
أروع عطر جسم الى الان جربته مسك الجسم من القرشي ياااخي هالمحل سعاده كل شي فيه ياخذ العقل من عطور وبخور وانواع المسك شي خياااااال ، عندهم المسك اما في زجاج صغيره يكون مثل الزيت انتي توزعينه على جسمك واماكن النبض وأما عطر تبخينه على جسمك ، الريحه مااقدر اوصفها شي جميل ناعم تحسين بانتعاش جد جد اللي ماجربته تروح وتدعيلي :d ، وعندك مزيل العرق شي ضروري استخدمي اي نوع يعجبك انا بالسابق استخدم بودره مسك وحاليا اول مره استخدم مزيل عرق من نيفيا ومرتاحه عليه ، بعدها لك الخيار تتبخرين اذا حابه وتعطرين ملابسك بعطر انتي تحبينه ، اهم شي ان جسمك اعتنيتي فيه . .

في مشالله اشوف بنات عنايتهم أكثر من هذي ويسوون أمور كثيره ماشالله عليهم بس أنا صحيح بسيطه عنايتي ومافيها شي جديد بس مرتاحه عليها وسهله حتى وانا مسافره الحين ماخذتهم معي لانها صارت اساسيات بحياتي و روتين تعودت اسويه ، وانتي كـ زوجه لازم يكون عندك مثل هالروتين بس باسلوبك انتي وبشطارتك وبمنتجات انتي مرتاحه عليها حتى اللي مو متزوجه انتي اهتمي عشان نفسك ، وبس حاولت انقل لكم شي ربما البعض غافل عنه او مايعرفه فيارب اني ساعدت فيها بنات وعطيت أفكار . .






آشوفكم على حب ❤️

22 comments:

  1. حبيت التدوينه رغم اني مو متزوجه * لوووول * ♥♥ . بس يهمني اقرا هالمواضيع

    فعلا عنايتك بسيطه ومختصره وتقريبا نفس خطواتي اللي اسويها بعنايتي اليوميه ..

    شكرا لك فروحه ♥

    ReplyDelete
    Replies
    1. شكرررا من ذوقك حبيبتي وهالتدوينه للكل 💜

      Delete
    2. شكرا لك طرح رائع للموضوع

      Delete
  2. تدوينه مفيدة وجميله شكرا لك 💜💜 بس ايش نوع الزيت الصغير في العلبه 🙊💕

    ReplyDelete
    Replies
    1. قصدك اي زيت ! جونسون !! او الجل الزيتي من اصغر علي

      Delete
  3. حبيت التدوينه مرره تقريبا مفس نظامي بإختلاف واحد
    الغسول الحميمي غلط يستخدم كل يوم لأن كثرته تقتل البكتيريا النافعه
    اذكر وحده من صاحباتي كانت تتألم بشكل فظيع من الالتهابات
    و قالت تستخدمه مرتين باليوم انهبلت
    .. مسك عبد الصمد شهادتي فيه مجروحه 😭
    عمري ماحبيت و لا راح احب ريحة زيه منعش جدددداً

    ReplyDelete
    Replies
    1. الغسولات حسب مااعرف انواع بعضها يومي وبعضها لا فهي حسب ماهو مكتوب لك عالعلبه وشكرا لك عالمرور 💜

      Delete
    2. تدوينة جميلة ما شاء الله حبيتها ربي يوفقك و ييسر امورك

      Delete
  4. تدوينة مفيدة يعطيك العافية

    ReplyDelete
  5. ماشاءالله عليج عنايتج مرتبه
    احنا البنات بطبيعتنا نحب الزين .. و مثل ما قلتي ضروري الترطيب اليومي

    يعطيج العافيه

    ReplyDelete
  6. القرشي مثل ماقلتي المحل هذا سحر , ومانستغني عنه بالمسك الأسود خاصه
    أما العطر أول مره أشوفه لازم أشتريه إن شاء الله من وصفك أحسه خيال ..

    ReplyDelete
  7. مشكورة جدا على هذه التدوينة . احنا في الجزائر ما نستعمل المسك و العنبر نستعمل فقط العطور العادية و اختي الكبرى لما ذهبت لليمن للدراسة صارت عندها هذه العادات و جابت منتجات مثلها . و الان كل شء متوفر لكن صراحة لا نستعملها لكن بعد ما قرات تدوينتك و الحديث المذكور فيها راح أجربها ان شاء الله

    ReplyDelete
  8. ممتاز https://flatermasr.takeefatmasr.net/price-of-water-filter-2019/

    ReplyDelete
  9. يرجى زيارتنا او اضافة رابط كلية التربية للعلوم الانسانية / جامعة تكريت / العراق
    http://cedh.tu.edu.iq/

    ReplyDelete
  10. https://www.albarqawi.info/community/index.php?page=online&show=1

    ReplyDelete
  11. جميل جدا حبيت كلشي
    تسلم ايديك

    ReplyDelete