مفضـلاتي لــ [ March & April ]

السلام عليكم ورحمة الله ،

حزينه لتقصيري الشديييد في المدونه ماصرت انزل تدوينات كثير مثل قبل ، للاسف شي محزن بس السبب ان ماعندي شي جديد اقدمه او مفيد فـ موحابه انزل تدوينات بس لمجرد اني متواجده ، وايضا الانستقرام سرقني من المدونه هناك استمتع اكثر واسهل علي اكتب المعلومه وانزلها ، المهم ان شالله ألاقي مواضيع مفيده اقدر أقدمها لكم هنا وانتو اذا حابه اتكلم عن شي تقدرون تكتبونه لي . . 

موضوعنا الروتيني اللي اكتبه بين فتره والثانيه وهو عن مفضلاتي هذي الفترة شنو أحب استخدم من بيوتي و عنايه وعطور وأمور شخصيه . . 

ماسكارا توفيسد الشهيره 

اتوقع هذا اكثر منتج شهير من هالماركة ، ولان مسكراتي خالصه تقريبا قلت أجرب هذي الماسكارا ، بشكل عام المسكارا حلوه تعطي كثافه للرمش وطول بسيط مع انحناء للرمش بدون كساره الرمش ، حبيت سوادها وماتكتل وتنشف بسرعه وتقدرين تسوين طبقات منها عالرمش لكثافه اكثر ، فرشتها سلسه توصل للرموش الصغيره اول العين وتبرزها والاحلى انها تفرق الرموش ماتجمعها ، للتنويه الماسكرا اساسا اسمها better than sex بس بحكم عاداتنا بالخليج ولتهذيب المصطلح تم تغيير الاسم الى better than love فإذا شفتي الاسم الاول في أحد الدول هي نفسها الماسكرا بالاسم الثاني مجرد تغيير اسم فقط  . .

ماسك من قلام قلوو باللون الازرق

الماسك يعيد بشكل فوري الترطيب للبشرة الجافة بفضل النباتات النشطة في محتواه ومركب Dewdration و Hydrapack يحفظ الترطيب داخل البشرة فيما تحافظ السكريات المستخلصة من التفاح على حاجز البشرة الدهني الطبيعي ويحتوي على بيتا جلوكان الشوفان الذي يهدئ الإلتهاب و خلاصات العسل الخام و جذور الزنجبيل التي تعزز إشراقة البشرة وإزالة السموم بالإضافة إلى زيت جوز الهند لحماية البشرة من العوامل البيئية المضرة . .

يعني اذا كنتي تعانين من بشره جافه او مختلطه يساعدك في ترطيبها ويحافظ على بقاها رطبه بالاضافه اللي فوايد مكوناته واللي تساعد في مقاومه علامات التقدم بالعمر ، هذا النوع يختلف عن ماسكات قلام قلو لان جاي مثل العسل توزعينه عالبشره وتنطرين عليه بحدود الـ ٢٠ دقيقه بعدها تمسحينه بفوطه او منديل خشن يعني مو تغسلينه بماء وماينشف مثل باقي المسكات لا يتم لزج مثل ماهو ، ماانصح فيه للبشرة الدهنيه  . . 

لوشن من فازلين للجسم

من محبي ماركة فازلين صراحه ومااستغني عنه هذا الكريم او اللوشن كان بالسابق عصار وقوامه شويه ثقيل بس الحين اشوفهم منزلين بخاخ لوشن حبيته صراحه لان اسهل بالاستخدام و أخف ، وطبعا فازلين بريحه الكاكاو أحبها اكثر من اي ريحه ثانيه ماعرف ليش ، واكيد الغني عن التعريف الفازلين الصغير الاصفر اللي يكون جل ثقيل هذا ممتاز عشق الطفوله وترطيبه قوووي هذا انصح كل ام عندها طفل تحطه على وجهه وجسمه في وقت النوم فقط ترطيبه راح يفيد اطفالك بعدين لما يكبرون من مشاكل جفاف البشره . .

مقشر البشره من فرانك

مايحتاج اتكلم عنه كثير لاني كتبت عن هالمجموعه تدوينه هنا بالمدونه ، ولكن باختصار المقشر جميييل جدا وينظف البشره بعمق ومايسبب اي تحسس او احمرار وكميه بسيطه منه تغطي البشره بالكامل  . .

مرطب للوجه من ايفيان

منتج جديد علي وهو بخاخ ماء مرطب ومنعش للبشره تستخدمين اكثر من مره باليوم عشان تجددي شعور الترطيب والاشراقه جد احساس انتعاش مو طبيعي بوجهك وعادي تستخدمينه قبل الميكب او بعده لان يثبت الميكب ايضا ، تلاقونه في الصيدليات مثل بوتس وسعره رخيص . .

عطر رول من اليزابيث

هذا عطر للاخت ماري كيت و آشلي اولسون التؤام اللي طلعو في مسلسل فوول هاوس ، نزلو أول عطرين لهم باسم اليزابيث جيمس نيرفانا " الابيض والاسود " عندي الاسود وريحته اثقل من النوع الثاني تتكون من زهور الفايوليت و خشب الصندل والفانيلا ، غالبا ماحب الروايح فيها فانيلا بس هذا حبيته كـ رول ماعرف اذا لو اشتري العطر وابخ ريحته على ملابسي بتتغير وجهة نظري فيه الله العالم بس بشكل عام ريحته مقبوله وماحس انه ثقيل صراحه . . 

عطر مسك الجسم من القرشي 

تكلمت عنه في انستقرامي ماعندي شي اقوله غير ان كل بنت لازم يكون عندها مثل هالشي خاص للجسم ، بعد كل شاور حطيه على جسمك مو ملابسك ريحته مثل مسك العروس اللي عندهم او مسك الختام مو متذكره بس شي خيااال جد ريحته عروس تحسين . . 

نظارة دولتشي اند قابانا

أكثر نظاره حبيتها وحبيت قصتها للعين وحجمها ، انا عندي من قبل نظاره لـ شانيل و برادا بس كانو الستايل الكبير شوي بس هذي غير حجمها صغير عالوجه وسعرها ماذكر بالضبط بس بحدود الـ ٧٥ دك شاريتها من ألمانيا . .

وبس

آشوفكم على حب ❤️