Wednesday, June 8, 2016

الشلل الدماغي للاطفال ونقص الاكسجين + رحلتي مع علاج طفلي


السلام عليكم ورحمة الله ،


الموضوع اليوم غير عن كل المواضيع ويمكن مايهم اغلبكم 
لانه موضوع طبي بتكلم فيه عن حالة طفلي وعن هذا المرض اللي يسمى طبياً [ شلل دماغي ] اعرف المسمى مخيف وكبير جدا ولكن لازم نعرف ان هالمرض هذا متفرع الاقسام ومافي حاله تشبه الثانيه ، حابه في هالموضوع افيد الامهات اللي مثلي ومثل حالة ولدي في البدايه كنت تايه مع المرض وكنت احاول افهمه واجمع معلومات عنه عشان يكون عندي علم في المرض والتطورات 


• البداية كانت كـ التالي : 
في وقت حملي كل اموري تقريبا كانت سليمه والوضع طبيعي حالي حال اي حامل ، وفي وقت الولاده صارت ربكه شوي ونقص عند الجنين الاكسجين لمده تقريبا 40 دقيقه ، بعدها تمت الولاده طبيعي من خلال جهاز الشفط وطلع طفلي لونه ابيض جدا و من غير مايبكي ، وثاني يوم سالت الدكتور عن طفلي قال طيب واموره كلها طيبه ومااحتاج ياخذ اكسجين او اي شي ، وقتها انا مااهتميت في الموضوع كثير دامه طيب وشفته بخير هذا المهم . .

• متى اكتشفت الخلل :
من اول ماطلع طفلي وهو صياح وبكى مايسكت وقلت يمكن هو من النوع الصياح لان في اطفال سبحان الله تجيك هاديه واطفال مزعجه ، ولان هذا طفلي الاول وماعندنا اطفال صغار بالعايله ماانتبهت لـ التطورات وماعرف اصلا شنو الطفل المفروض يسوي بالشهر الثاني والثالث والرابع بس لما وصل عمره 4 شهور او اقل قمت الاحظ رجفه في احد يديه ورجلينه هنا خفت ورحت للدكتور اسال عن سبب الرجفه ، وقتها الدكتور قال هذا توه صغير ومانقدر نحدد اذا فيه شي او لا لان ممكن تطلع منه حركات عفويه لان ماله ادراك للامور انتظري عليه يكبر شهرين بعد ونشوف شنو التطور لان احتمال هذي الرجفه من علامات الصرع بس قال مو اكيد دام نظر طفلك سليم ومايرتفع لفوق ان شالله مو صرع . .

في عمر الـ 6 شهور رجعت للدكتور وشاف الرجفه للحين موجوده وايضا الطفل للان مايعرف يقلب على بطنه ولا يحبي ولا اي حركه منه وكأنه طفل للحين بالشهر الثاني ، قالي انتظري لـ عمر الـ 9 شهور يمكن نشوف تطور لان ممكن بعض الاطفال كسول وحركاته تجي متاخر ، انتظرت ايضا 3 شهور ثانيه ورجعت له قال احتمال نقص الاكسجين اللي صار في الولاده يكون سبب لازم نروح عند دكتور متخصص اعصاب ، ورحنا عند دكتورين اعصاب عشان اتاكد اكثر واسمع كلام الاثنين شنو ، واحد من الدكاتره ماتعب حاله كثير وقال الطفل مافيه شي مجرد هو كسول بطيئ يعني ، اما الثاني قال انا شاك في شي بس انتظرو الى عمر السنه وسووله اشعه للراس ، انتظرت الى عمر السنه وسويت اشعه للراس ورجعنا لنفس دكتور الاعصاب [ مستشفى مبارك ] وقال ان الاشعه طلعت [ ان راس الطفل صار فيه عطب في مكان الذهن والحركه ] هذا من نقص الاكسجين طبعا ، لله الحمد في حالة طفلي هذا العطب ثابت وكل حالات الشلل الدماغي ثابته يعني مايصير اسوء مع السنوات ولايصير افضل لكن ممكن مع العلاج الطبيعي الصحيح المستمر يطور قليلا ويحسن ويصحح من هذا الخلل جسديا لان عطب الاعصاب اللي صارت بالراس لايمكن اصلاحها . .

بعدها على طول بدينا في العلاج الطبيعي في الكويت [ مركز الفهد ] خذينا علاج مدة 4 شهور بعدها سافرنا علاج للخارج في التشيك وقعدنا هناك ناخذ علاج مده 6 شهور ، كان علاج التشيك جددددا متعب وقوي ومكثف ولكن نتايجه كانت طيبه لله الحمد ولكن مابينت هذي النتايج الا بعد 3 شهور ، بعدها رجعنا الكويت وريحت طفلي شهر بدون علاج لاني حسيته تعب من بعد علاج التشيك ورجعت واصلت علاجه في [ مركز موريس ] واستمريت معاهم تقريبا 7 شهور تقريبا وبعدها جيت الان دبي ، علاجهم للامانه ضعيف مو نفس مستوى التشيك ولكن هذا المتوفر حاليا لي . .

حالة طفلي تندرج تحت مسمى [ شلل دماغي ] يعني بعض خلايا الراس صابها خلل او شلل وهذا يعتمد حسب نسبة الشلل هل هي كبيره او صغيره و أين اثر هذا الخلل في اي مناطق من الراس هل الذهن او الحركه او السمع او البصر او الذاكره او الحس او العقل بالكامل ،هذي كلها مناطق وتختلف نسبه الضرر فيها وغالبا وبنسبه 60% تصاحب مريض الشلل الدماغي اكثر من اعاقه . .

لله الحمد انا طفلي يعاني من [ تأخر ذهني وحركي ] يعني راح يمشي باذن الله وبيصير كل شي اتمناه ولكن يحتاج وقت كبير مو نفس الاطفال الطبيعيين وايضا اذا مشى مستقبلا ماراح يكون مشيته طبيعيه لهذا السبب يحتاج علاج طبيعي من الان يمكن يخفف من الخلل اللي بيصير في مشيته وايضا العلاج الطبيعي يريح اللي فيهم اعاقه حركيه مثل طفلي ويساعده لاكتساب مهارات ، مثلا عمر طفلي تقريبا بيكمل 3 سنوات وتو يتعلم يقعد لكن للان مايحبو بس ممكن يزحف على يدينه وممكن في عمر اكبر يحتاج عمليات مع علاجه الطبيعي اللي لازم يستمر عليه مدى الحياه  ، لله الحمد هذي نتيجه طيبه بالنسبه لي ، والحمدلله حمدا كثيرا لان حالة طفلي افضل من غيره بكثثير . .

• نصيحة لكل والدة طفل معاق :
مهما كان طفلك يعاني من اعاقه كبيره او صغيره كوني متفائله واحمدي الله دايم ، لاتهملين في العلاج الطبيعي ابدا ومهما كانت متعبه الامور جاهدي الان عشان ترتاحين بعدين ، كل مابديتي من عمر صغير راح تلاقين نتايج اسرع باذن الله 


يارب يفيد هذا الموضوع ناس محتاجه لهذي المعلومات
ومااتمنى منكم سوى الدعاء لطفلي 


واشوفكم على حب 💜

16 comments:

  1. الله يخليكي له❤️ ربنا يحفظو لك وتتحسن الامور �� انتي ام كذا ����قدوة ليا حقيقةً �� احب تدويناتك واتطلع لها دائماً،

    ReplyDelete
  2. الله يشفي طفلك و ييسر مل اموره و يعينك و يرزقك من حيث لا تحتسبين و يفرحك بشوفت طفلك و هو يمشي عن قريب

    ReplyDelete
  3. الله يحفظه لكِ و يتم عليه عافيته يارب 🙏🏽

    ReplyDelete
  4. الله يخليه لك ويقر عينك فيه يارب ويشفيه .. حبيت صبرك وتفائلك ربي يقويك ويحقق مرادك

    ReplyDelete
  5. الله يحفظه و يتمم عليه العافيه يارب

    ReplyDelete
  6. ربي يشفيه ويعافيه وتشوفيه في افضل حال
    هدعيلك وهدعيله في الايام الكريمه دي يفرحك بشوفته وهو معافي

    ReplyDelete
  7. ربي يشفيه ويعافيه وتشوفيه في افضل حال
    هدعيلك وهدعيله في الايام الكريمه دي يفرحك بشوفته وهو معافي

    ReplyDelete
  8. الله يشفيه يارب و يفرحك بيه..
    أنا بنتي مشابهه لهذي الحاله بس للحين ماتشخصت تشخيص نهائي
    فيها رجفه في الأطراف و ماتجلس و لا ترفع راسها زين.. عمرها ٨ شهور و حركاتها
    كأنها ٣ شهور... بس إدراكها سليم.. اخر شي قاله الدكتور ان في ماده في المخ يسمونها
    الماده البيضاء و هي مسؤوله عن النمو.. عندها ناقص و هذا بيسبب لها تأخر في الحركه و المهارات الحركيه
    و لسا باقي لنا تحاليل و كشوفات عشان التشخيص النهائي.. لما قريت موضوعك حسّيت في تشابه كبير في الأعراض
    بس الاختلاف إن ولادتي ماكان فيها أي مضاعفات بس بعد الولاده بنتي جاتها حراره (على قولتهم) و التحاليل طلعت سليمه
    دايما احتار و قلبي يعورني عليها و مرات ابكي بس دايما اقول الحمدلله
    الحمدلله على كل حال.. الحمدلله دائماً أبدا
    الله يقدرنا و نعمل كل شي بيدنا عشانهم.. الله لا يوري احد مكروه بعياله و حبايبه

    ReplyDelete
    Replies
    1. نعم هذي هي الماده البيضا اللي متضرره عند طفلي واذا تبين نصيحتي من الان ابتدي علاج طبيعي ارجوك عشان تكسبين وقت ونتايج اسرع والله يشفي مرضاكم ومرضانا ومرضى المسلمين

      Delete
    2. أمين يارب الله يسهل الأمور.. ان شاءالله الله يقدرني و أسوي كل شي اقدر عليه عشان بنتي
      الله يعافيها و يفرحني فيها!
      بس انا مستغربه، بنتي مامرت على ظروف ولاده صعبه و لا نقص أكسجين
      و باقي لنا تحاليل كثيره عشان كذا ماعطونا تشخيص نهائي
      بس الأعراض كلها مطابقه لأعراض بنتي سبحان الله
      الله يشفيهم و يعافيهم يارب

      Delete
    3. الله العالم شنو ظروف بنتك ربما في شي اخفوه عنك المستشفي عشان يحمون نفسهم من اي مساءلات او ولدتي قبل موعد ولادتك او امور وراثيه او انور اخرى عموما هي نفس حالة طفلي ولكن تختلف الاضرار من طفل للثاني وللحين ماراح يبين معاك شي الا بعد عمر السنه

      Delete
  9. ربي يشافيه ويعافيه وتشوفينه باحسن حال يا رب ...

    ReplyDelete
  10. ماكو شي على الله بعيد .. ربي يشافيه و يتمم عليه صحته و يفرحج فيه
    يكفي انج تعلمتي و ثقفتي نفسج بخصوص حالته ليت كل الأمهات جذي يهتمون
    ربي ياجرج يا قلبي و جميع الأمهات

    ReplyDelete
  11. الله يشفيه ويعافيه ويقر عينك بيه ياحي ياقيوم ،، يااااارب يرزقك الأجر والصبر ويفرح قلبك بكل خير <3

    ReplyDelete
  12. الله يشفيهلك و شكرا على مشاركتنا تجربتك الي اثرت فيا جدا, و انا عندي ابن اختي يعاني من الكهرباء في المه اضافة الى متلازمة بارتر و الي قاهرني في الموضوع انو. اختي توفت من سنة رحمها الله و رغم ان ابوه يتابع علاجه اللكن وجود الام مهم . و الحمد لله و لا. اعتراض على قضاء الله

    ReplyDelete
  13. تويوتا راش 2022| 5 أشياء عليك معرفتها بجانب الأسعار قبل الشراء
    تعرف على العيوب والمميزات واختار من المناسب لك
    https://www.almuraba.net/news_view_480036.html

    ReplyDelete