السلام عليكم ورحمة الله ،
كثييييير طلبو مني هالبوست وحاولت أبسط الشرح كثر ما أقدر
طريقة الطلب من النت " التسوق الالكتروني "
الكل توجهه للطلب والتسوق عبر النت لسهولته و من ناحيه الراحه فهي اكيد مريحه والأسعار أرخص خصوصا ان غالبية المواقع تسوي خصومات رهيييبه كل فتره ،
تتسوقين حول العالم وأنتي في غرفتك وتختارين البضاعه اللي تناسبك وألوانها وقياساتها وتدفعين عن طريق الفيزا
و أول خطوة في موضوع التسوق من النت
* أستخراج فيزا التسوق من النت
تروحين لأي بنك وتطلبين منهم يطلعولك فيزا للنت ويحتاج كم يوم على ماتجهز الفيزا
* شركة الشحن
في اختيارات كثيره لشركات الشحن انتي اخذي فكره عن كل شركة واسعارها و كم صندوق تفتحلك ، الشركات المعروفه " آرامكس / فيدكس / دي آش آل "
أنا أخترت شركة " بوستابلس " مو الكل سمع عنها لكن اللي عجبني فيها ان اسعارها أرخص من آرامكس
جربت التعامل معاهم مع كم شحنه وكانت جيدا جدا ويوفرون لك ٣ صناديق بريد
في " أمريكا / بريطانيا / الامارات "
بس بمجرد ما دفعت ( ٧ دنانير ) تقريبا ( ٩٢ ريال ) مره وحده ادفعها اشتراكي عندهم يكون مدى الحياه ويفتحون لي صناديق البريد
بعكس الشركات الثانيه اللي تدفعين رسوم شهريه أو سنويه
* تعبئه البيانات في الموقع
بعد ما تفتحين صندوق بريد في آمريكا مثلا راح يعطونك عنوان الصندوق أحفظيه عندك زين
بعدها روحي لـ الموقع اللي تبين تشترين منه
مثال www.nordstrom.com
سويلك حساب جديد في الموقع SignUp
هذي خطوات التسجيل بالصور ونفس الطريقه في كل المواقع
حطي أسمك بالضبط مثل ماعو مكتوب في بطاقه البنك
بعدها تجيك صفحه تعبي فيها بيانات الفيزا
( الرقم و الكود )
الحين تقدرين تتسوقين ماعليك الا تختاري الشي اللي حابه تشترينه واضغطي على add to bag يعني يحطها لك بحقيبة التسوق
بعد ماتخلصي تسوق وتختاري اللي يعجبك
يجي دور الدفع ، روحي عند كلمة bag او my bag واضغطيها راح يطلعلك كل اللي اخترتيهم وراح يقولك سعر مشترياتك بالكامل كم بيكلف عليك
لـ دفع حساب مشترياتك اضغطي على كلمة CheckOut بعدها تظهر لك صفحه فيها عنوان البريد اللي راح ترسل له المشتريات
وبيانات فيزتك وممكن يطلع للتأكيد " كود الفيزا " مثل رقم سري للأمان
بعد ماتكملين الأشياء اللي محتاجينها من بيانات تضغطين على كلمة Order تعني مثل أطلبها لي الأن
راح يقولك الموقع ان تم الشراء وشوي ويجيك رساله عالايميل ان تم الطلب من هالموقع مع بيانات الطلب
و ايضا راح يتم الخصم من حسابك بالبنك
وبسس انتهيينااا
ان شالله كان الشرح واضح
انا شرحي كان على موقع نوردستروم
بس كل المواقع تقريبا نفس الطريقه
ماكو اختلاف الا يمكن بسيط في المسميات
وآشوفكم على حب ❤
بوستابلس فيها خاصية تجميع الشحنات مثل muys ?????
ReplyDeleteوشنو احسن شركة شحن فيدكس والاdhl ??
وثانكس
بوستا بلس مافيها تجميع شحنات ، الكل يمدح الفيدكس و ال دي اتش ال بعد يمدحون
Deleteعندي سؤال عن الشحن دايم الاسعار تكون ثابته او تجي اوقات ينخفض السعر
ReplyDeleteحسب ما اعرف السعر ثابت مافي مثل التخفيضات يعني
Deleteبما انك قد سافرتي للندن ممكن تنزلين بوست
Deleteعن الشوبنق هناك ومكياج حلو اشتريه من هناك وعن لندن عموما❤️
موضوع لندن موضوع كبيييير وبتكلم كثيير فيه بس اذا عندك شي معين عشان اتكلملك فيه بتفاصيل اكثر قوليلي
Deleteانا مسافره لها الشهر الجاي عشان كذا حابه تكلمين عن الشوبنق هناك والاوت لت
Deleteوعن الميك اب براندز والسكين كير الي مو موجوده عندنا ❤️
وياليت تقولين لي وين احجز اوتيل بلندن محتاره 😢
وشكرا حبيبتي ❤️❤️❤️
ابشري من عيوني بحاول ❤
Deleteماشاء الله موضوعك رائع وراح يساعد كثير ❤
ReplyDeleteviabox.com الطريقة الافضل لشحن مشترياتك من امريكا باقل تكلفة
ReplyDeleteقبل لا تشتري من أي موقع أي منتج .
ReplyDeleteأفضل لك راجع منتجاتك و عندي لكم موقع لمراجعة المنتجات بكل سهولة حيث أن تصميم الموقع جميل جدا جدا هذا هو الموقع https://www.bestmontag.com/
تشوف كل المنتجات و كيف تحصل عليها