Memo Paris عطـري الجـديد

السلام عليكم ورحمة الله،

كلنا نجزم على عشق العطور بأنواعها ، ولكل عطر حكايه خاصة في ذاكرتنا ، منها عطور عشقناها لاجل أصحابها وعطور عشقناها لذكريات المكان اللي تأخذنا له . .

اليوم معاي ماركة عطور أول مره أجربها وماسمعت عنها كثير ومن قريب للامانه عرفتها وممكن اغلبكم مايعرفها مثلي ، وبتكلم لكم عنها وعن عطري الجديد وبعض المعلومات . .

بس قبل لا ابدأ أذكركم في تدوينه كتبتها عن ( طرق لتثبيت العطور وبعض الافكار العطريه ) 

ضغطي عالرابط عشان تنتقلو للتدوينه 

Memo Paris by Clara

هي ماركة فرنسية لصاحبتها كلارا 

كلارا تسوي عطورها على روايح أماكن ومدن تأثرت فيها وسحرتها بجمالها ، وتقول كلارا ان لما تشم ريحة اي عطر تتذكر المكان ماتذكرها بالشخص ، دايم عندها العطور ترتبط ذكراها في اماكن وريحة المكان وتقول كلارا انها تحرص على ابتكار عطور حصرية واستثنائية لا يمكن العثور عليها في كل المراكز التجارية ، عطورها تعتبر من عطور ( النيش ) يعني كمية الكحول فيها قليله جدا لذلك سعرها يكون غالي دايم عن باقي العطور ، اخذت هذي الماركة الشكل الزجاجي الاسود الانيق مع اللون الذهبي ويحمل كل عطر رسومات تعبر عن معنى العطر ومكانه . .

Marfa Memo 

أجدد اصدارات عطورها هي Marfa المرفأة وهي مدينة في غرب تكساس ومستوحاه من ( نبتة عين مسك الروم ) لذلك شكل العطر على عين وهو من العطور المميزه وأكثر واحد عجبني من المجموعة ريحته جد فخمه بس مو المزعجه للانف لانها تتكون من الزهور البيضاء والمسك والصندل ويناسب الرجال و النساء ، مقدمه العطر براعم البرتقال و اليوسفي | قلب العطر مسك الروم والصبار الأمريكي و الإيلنغ | قاعده العطر تتكون من خشب الصندل وأخشاب الأرز والمسك الأبيض و الفانيلا . .

دايم ريحة المسك والصندل فيها فخامه بس النوع الناعم مو مثل ريحة العود والعنبر احيانا تكون خانقه لبعض الناس،

حاليا اكتب لكم وعندي العطر اشم ريحته ، ريحته تذكرني بشي للان ماعرف شنو احيانا احس ريحته باودر وريحة الفانيلا بارزه رغم اني ماحب ريحة عطور الفانيلا لكن هذي ممزوجه بالمسك والصندل بطريقة جميله ، هالعطر يناسب البنات اللي ماتحب العطور الشرقيه كثير اما اللي تحب العطور الثقيله مثل العود والعنبر ماانصحها فيه ابد ،من وجهة نظري العطر ريحته تناسب كل وقت صباح او مساء ولكن لان سعره مرتفع شوي فالافضل تحفظينه للمناسبات مو للاستخدام اليومي . .

العطر يجي بعلبه كبيره وفخمه والعطر شكله راقي ينفع كهدية مميزه ، وكل عطور الماركة هذي نفس الشكل الاختلاف فقط بالصور اللي بالوجه وهي اللي تدل على معنى العطر وريحته ، للامانه عطورهم مميزه وقويه اذكر اني شميت اكثر من ريحه وكانو روايح جدا قويه منها ريحة ( الليذر = الجلد ) وكانت هذي من اشهر الروايح عندهم ولكن اعتقد هالريحه تناسب الرجال اكثر

 تحصلون هذي الماركة في بلومينق ديلز و هارفي نيكلز او المحلات اللي تبيع عطور النيش

اخذو جوله على عطورها وشوفو اللي يناسبكم 

العطر خذيته من بلومينق ديلز دبي

حجم 100 ملي بـ 910 درهم اماراتي

 يعني 75 دينار كويتي تقريبا

وبس

آشوفكم على حب 💜