رحلتي إلى تركـيـا | My trip to Turkey

السلام عليكم ورحمة الله ، 

مسآگم سعـادة يارب 

ان شالله تكونون بخير و سلامـة 

قبل كم شهر كانت زيارتي الآولى لـ تركيا 

اللي رايح لـ لبنان راح يلاحظ ان في تشابه بين البلدين من ناحية الطبيعة ، بس تركيا على جمال أكثر . . 

رحلتي كانت لمدة ١٠ أيام ، حاولت كثر ماأقدر أكتشف هالديره و أزور أماكن كثيره . .
بما ان الدراما التركية طغت علينا فصار عند الكل فضول يروح الديره
انا عن نفسي عشقت بحرهم من قبل اشوفه من مسلسلاتهم
ويوم شفته عشقتتتته أكثر وأكثر ، سبحان الله له سحر وجمال هالبحر

وصلنا تركيا بحمدالله وسلامته وكنا رايحيين على الخطوط التركية

كنا حاجزين سواق خاص لنا يكون معانا طول الرحلة وكان اختيار موفق لنا واريح من التكاسي ولعوزتهم ،
كنا نروح اكثر من مكان باليوم وكنت اخلي اكياس مشترياتنا بالسياره وننزل وفعلا شي مرريح بدل ما اشيلها معاي كل مكان .

 قضينا أول ليلتين في " اسطنبول "

في فندق " مرمرا تقسيم "

فندق ممتاااز جدددا وجمميل ومووقعه في وسط ميدان تقسيم الشهير . . 

زرت في هالمدينه الجميله عدة أماكن :

بما ان أول يوم كنا تعبانين شوي من الرحله فـ قررنا نرتاح بالفندق شوي وبعدها نزلنا للشارع تحت نستكشف الأماكن وناخذ لنا كوب شاي يعدل المزاج D;

 ، كان الشارع تحتنا دايم زحمه وحركة ليل ونهار فيه المطاعم والكافيهات و ساحة كبيره واسعه و حديقه جميله ، بعدها اتصلنا عالسايق عشان نطلع لأحد المولات . . 

" جواهر مول "

من أكبر المولات في اسطنبول حسب ماسمعت وشفت ، مول جميل صراحه وكبييير وفيه كل شي ،

اتذكر ان ما مدانا نشوفه كلله فقلت لازم نردله مره ثانيه ، لما رديتله مره ثانيه كنت مروقه وفريته كله محلاته تووونس

 واذا تبون هدايا و صوغات للاهل اخذو منه ينفعكم وكل شي فيه . 

اليوم الثاني خصصناه لجولة جديده علي ،

زرت قصر " دولمة باجيه " اعتقد اسمه جذي ، هو قصر لاحد السلاطين في العصر القديم و صار متحف يجونه الزوار من كل العالم . . 

كانت جولة ممتعه بالقصر و كنا مع مرشد سياحي فكان يقولنا قصة هالقصر واشلون تم بناءه وعن السلطان و حريمه . . 

يقولكم ٧ سنوات يبنون في هالقصر و ١٠ سنوات ديكور يعني ١٧ سنه على ماخلص القصر . 

برا القصر في قعده عالبحر حيييل حلوه و المناظر المطله عليه روووعه 

اليوم الثالث من الصبح رحنا لمدينة " بورصه " عن طريق ناقله بحريه تبعد مسافه ساعتين تقريبا وكانت تجربه ممتعه واحنا بالسفينه والنورس يطير حوالينا والناس تحذفله

خبز مشهد يجنننن ويخوف بنفس الوقت خفت من الطيور لا تجيني لانها حيل تقرب منا قلت يمكن وحده تدعمني بالغلط هههههه 

وصلنا بورصه و ريحنا شوي عقب انطلقنا نتجول بالسياره ونستكشف المدينه . .

رحنا مولاتهم هناك بس طبعا مولات اسطنبول افخم و اجمل وأكبر ((( لحد يسألني عالاسامي مو قادره اتذكر ))) 

في اليوم الثاني كانت الرحلة الأكثر إثاره وجمال وهي رحلتنا لـ " جبل اولوداغ "

الرحلة طويله شوي واحنا نصعد الجبل وكل ماله يبرد الجو ، تحت كان الجو زين مو ذاك البروده بس انا كنت حاسبه حسابي و ماخذه جاكيت حاطته بالسياره  ،

وفعلا لما وصلنا للجبل كان بارد درجة الحراره تقريبا ٧ . .

الصدمة كانت لما وصلت الجبل اطالع يمين اطالع يسار ماكووو (((( ثــلج )))) ليشششش :/ وانا اللي حاطه احلام و بشوف الثلج و بتزلج و بسويلي رجل ثلج افاااااااا

صج شي محزن خيبة أمل صراحة  :( ، عموما انا لقيت جم بقعه ثلج مادري بتذوب والا وش سالفتها بس لحقت عليها وشفتها ؛) 

وصعدنا التلفريك صغير ومايخوف كنت احسب المسافه بعيده بس كانت قريبه و شي جميل وانتي صاعده و

تشوفين الجبال حوالينك و طبعا قبل لايوصل التلفريك كان بانتظارنا مصور في النهايه عشان ياخذ لنا لقطه واحنا بالتلفريك 

، نزلنا من التلفريك و كان في مقهى بسيط خذينا شاي يدفينا وتجولنا بالجبل و

اخذنا بعض الصور لنا و للمناظر اللي حوالينا .. و بعد ماخلصنا من فوق نزلنا مره ثانيه بالتلفريك وكان بعد في مصور يصورنا واخذنا الصور طبعا ..

بعد مانزلنا شفت " دباب أو بقي / بعد شنو يسمونه " عاد اشتهيت اركبه و ركبته ومشيت فيه حوالين المكان ،

كان وناسه ركووبه صراحه وفيه مثل الكشك او البوتيك الصغير يبيعون هدايا تذكاريه ،

وبعد هاليوم الطويل نزلنا من الجبل و توجهنا لمطعم مشهوور يسمونه الخليجيين " حجي دايخ " وهو اسمه بالتركي " حجي ضاي " لا تسالوني ليش يسمونه جذي ! . .

فعلا مذاق الاكل عنده مو طبيعي يجننننن و بالذات لحم العجين شي خووورااافي ، عقبها عاد ردينا الفندق نرتاح ..

ثالث يوم في بورصه رحنا جوله للشلال والقريه القديمه و الشجره القديمه اللي لها اكثر من ٦٠٠ سنه

كانت جوله أسرع سريع ماطولنا بس تغدينا عند الشلال وخذينا بعض الهدايا من البائعين اللي عنده . . 

بعدها رحنا لبيت الحرير و هذا للي يبي هدايا و صوغات وهالسوالف من قماش وغيره

 يلقاها  خصوصا للحريم الكبار يحبون هالسوالف .

اليوم الاخير لنا في مدينة بورصه كان لـ مولاتها رحت اكثر من واحد للامانه كانو عاديين حتي والله مااذكر اساميهم لاني كنت اقول للسواق ودنا افضل المولات هني . .

 وفي طريق عودتنا لـ اسطنبول مرينا على مصنع الحلقوم الحلا الشهير عندهم وخذيت هدايا للاهل ،

 لايفوتكم طعمه يجنننن ونكهااات كثيييييره عندهم . . 

ردينا لـ اسطنبول و ما أحلاها خصوصا بحرها و القعده قدام البحر

شي يفتح النفس جمال بحر ومنظر النورس والبيوت في الجهه الثانيه ونهر البسفور منظر ولا أحلى وفيها كميه رومانسيه هالمدينه يذكروني بـ مسلسلاتهم . . 

جولتنا اليوم خصصناها لـ " جزيرة الاميرات " عن طريق مركب مده نص ساعه تقريبا او اكثر شوي . . رحلة البحر ممتعه جددددا 

هي ٣ جزر المركب ينزل عند وحده وحده ، احنا رحنا لاخر جزيره واكبر جزيره

اول مانزلنا صادفتنا محلات الايس كريم

عليها طعم ي بناات يجننننننننن وشكلله يشوووق 

وخذينا جولة سريعه عالـحصان يمشي فينا حوالين الجزيره  بـ نص ساعه تقريبا

رغم ان الجزيره مو نظيفه و فيها بعض الروايح الشينه وحتى ماطولنا فيها

 لان كان المركب يحرك الساعه ٣ و الساعه ٥ والحين الساعه كانت ٢ ونص فقلنا نشوفها عالسريع و نلحق عالمركب عشان يمدينا الوقت نروح أماكن ثانيه .. 

عقب ماردينا من الجزيره رحنا أحد المولات ( اعذروني صج ناسيه اسامي المولات ) المهم تغدينا فيه وخذينا جولة فيه وتشرينا

اليوم قبل الاخير لنا في تركيا رحنا لـ " مدينة ترابيا "
 مدينه جميله والبحر حوالينها والقعده عنده جدددا رائعه ،

 خذينا جوله بالسياره في هالمدينه و نزلنا في أحد الكافيهات قدام البحر

واحنا رادين قالنا السواق بوديكم لـ " شارع البطاطا " صراحه ضحكنا قلنا ليش اسمه جذي
 قال انتو ي العرب مسمينه جذي كل ماركب واحد خليجي معاي قال ودني شارع البطاطا ههههه
طلعو مسمينه البطاطا لان يبيعون فيه بطاط ههههههه
المهم قلنا يالله نروح ونشوفه ، اهو شارع بسيط فيه محلات ايضا بسيطه حوالينه طول الشارع
وفيه مطاعم وبطاط كثير ينباع هناك مالومهم يوم سموه " شارع البطاطا "

 بعدها ردينا فندقنا ريحنا شوي وانطلقنا لـ " الاوت ليت " في اسطنبول جميل وكبير بالهوا الطلق
 استانسنا فيه صراحه مرتب و شي راقي وذرب . .

وكان معانا وقت قلنا بنروح لـ " فيالاند " اهو مول ومدينه العاب ،
 مدينه الالعاب كانت مغلقه لان كان الوقت متاخر بالليل بس تجولنا بالمول كان حلو لا بأس فيه صغير نوعا ما محلاته موجديده اغلبها مكرره بس يعني ماكان عندنا مكان نروحله غيره . .

من الاشياء المميزه عندهم الخبز التركي يمي يمي طعمه عجييييييييب
من كثر حلاته شريت مجموعه و خذيته معاي الطياره هههههههه
بس اهو حلاته تاكلونه حاااار وفررررش

في اليوم الأخير لنا وبما ان طيارتنا الاقلاع الساعه ٦ الليل
جهزنا الشنط و نزلنا تحت بالشارع نتمشي و رحنا للحديقه اللي قدام الفندق وقعدنا فيها

 بعدها رحنا أحد المولات قعدنا فيه وتغدينا ليما وصل وقت عودتنا والاقلاع ورجعنا لديرتنا بخير وسلامه . . 

عالسريع تكلمت لكم عالسفره حاولت اتذكر كل شي بس السموحه الذاكره خانتني في بعض الاشياء واسامي المولات ^_^"

هل أفكر أزور هالديره مره ثانيه ؟ 

اي ليش لا . . بس طبعا وقتها ماراح اضيع وقتي بالمولات لانها عاديه جدا ، راح اجرب ازور مدن ثاني واشيا جديده . . 

سلبيات هالديره ؟

امممم مابي أظلمها بالعكس جميله بس فيها عزكم الله الكلاب بالشوارع بشكل كبير منتشره وعادي يمشون جنبك . .

وسمعت ان اصحاب التكاسي بعضهم تعاملهم سيء مع السياح ويغشونهم

 وانا بصراحه ماعرف عن هالمعلومه لاني انا كان معاي سواق خاص طول الرحله ماجربتهم . .

وبسسس 

ان شالله كان بوست مفيد لو شي بسيط 

وآشوفـكم على حب ❤

‏