| مفضلتـي لـ شهر أبريل 4 |

السلام عليكم ورحمة الله ،

من المواضيع الشائعه بين المدونين واللي أحبها صراحة لما يكتبون عن منتجات يفضلونها . . 

بشكل عام مو شرط على الميكاب عن أي منتج يحبونه
الهدف اننا نتعرف على اشياء جديده او كنا نشوفها بس ولا مره جربناها
نقرا راي البنات في المنتج وطبعا موشرط ان المنتج عجب البنت وناسبها يعني يناسبنا
الناس أذواق وتختلف من شخص لأخر
بس حلو ان تكون عندنا فكرة عن هالمنتجات

أنا حبيت أسوي مفضلة بسيطه لي حق هالشهر ، هي منتجات تخص الميكاب أستخدمها من مده مو جديده علي بس حبيت اذكرها لكم . . 

| مفضلتي لـ شهر أبريل 4 | 

" باليت من سيقما "

ألوانه جميله و هاديه ، فيه ٨ ألوان شادو ( بين الاسود و الازرق والاخضر الداكن والبنيات و الابيض ) . . 

قلم ذو وجهين أزرق و أبيض . .

فرشتين ب فرشة وحده . . 

لاينر جل أسود و بني . . 

هذا الباليت المثالي صراحة لما تكونين مسافره أو بتروحين

 مكان يكفي تاخذينه حجمه صغير ومناسب و فيه احتياجاتك بعلبة وحده  . . 

" مرطب الشفاة من eos " 

منو مايعرف هالمرطب المشهوووور وكل نجمات هوليود يستخدمونه

حلو احب استخدمه ، أحلى شي فيه ريحته ودك تاكلينه ؛)) ترطيبه جيد ومناسب لي . . 

في ألوان منه ونكهات . . خذيته من أحد التاجرات بالانستقرام خذيت ٢ الاحمر و الاخضر 

شهره هالمرطب لكون الماركة منتجاتها كلها طبيعية

والحلو فيه شكله صغير مدور و كيوت هههههه 

" لاينر من ايربن ديكاي "

حاليا هذا اللي استخدمه بصراحة مافكرت استخدمه الا لما خلص اللاينر مالي كان من لانكوم ، عندي من هاللاينر اللون الاسود و التركواز و البني . . 

التركواز كان يجننن لونه بس ي خساره نشف بسررعه اهو مع البني مادري ليش ، بس الاسود لا ماشالله للحين صامد . . 

حلو لونه و خطته و ريشته .. بس صغير حجمه و بيخلص قريب . . 

عندي بعد من هالماركة أقلام كحل صراااحة جمييييله جدددا وألوانها تشوووق 

إذا في مجال راح أسوي بوست عن هالماركة ان شالله

" بلشر من توفيسد " 

حلوو للي تحب تسوي برونز لونه يجنننن وشكله يجننننن

تايقر بني على وردي على بيج ولمعه جميللله " مالكم شغل بالغبره اللي حوله " p: 

( الصوره من النت )

انزلت منه ٣ الوان للبرونز " على بني مشمشي و على وردي و على بيج وردي " مثل اللي بالصوره ، اتوقع الحين تغير شكلها لان انا ماخذتها من زمان و الحين شفت انهم غيرو العلبه . . 

" رموش HudaBeauty "

هالرموش مشهوره وكل الميكب ارتست اذكروها ويمدحونها ، للاسف مو موجوده بالكويت،

 وقبل شهر اسمحت لي الفرصه أروح دبي والحمدلله كنت حاطتها من ضمن قائمة المشتريات اللي ابيها . . 

شريتها من سيفورا دبي مول خذيت نوعين حسيته مناسبين للسهرات . .

 عندها ٣ أنواع من الرموش رغم اني سمعت انها ٥ أنواع بس هذا اللي لقيته بالمحل بس ٣ انواع . .

( الصوره من النت )

" أصباغ الأظافر "

الالوان اللي واقعه بغرامهم هالشهر ، هاللونين فصلت عليهم ههههه يجننووون عاد أنا كل شهر أفصل علي ألوان جديده أحب أغير حسب مزاجي و جوي ، لون النعناع او اقرب ماله التيفاني تقريبا من hello kitty  و لون النيود من Models Own

هذي مفضلتي لـ هالشهر 

ان شالله تكون عجبتكم 

وبسس :) 

آشوفكم على حب ❤