فضفضة | الدوام و الروتين

السلام عليكم ورحمة الله وبركاته ،

موضوعي اليوم محتاره من وين أبدا فيه ،

ومادري اشلون بنسق الكلام والمقدمه شنو بقول فيها ، بصراحه انا قليل ما اعرف انسق كلامي بس بتكلم بعفويتي وان شالله توصل لكم ..

قومـة الصبح الكل يعااني منها ، وراج دوام و قايمه من الساعه ٦ الصبح و طالعه ، تلقون النفسيه والمزاج سيئ و السب واللعن من صباح الله خير ، بيني وبينكم هذي جذي حالتي اقوم زهقانه وكارهه الحياه وليش اداوم ودي اغيب ودي استقيل ، الف شغله وشغله تجي بالي وأخرتها امري لله وادوام وهناك حاطه ايدي على خدي من الروتين والملل وما استفدت شي غير تعكيرة المزاج علي وعلى اللي حولي وأرد من الدوام بنفس المود والنفسيه واصله حده ومالي خلق اسوي شي وهذي حالتي كل يوم دوام ..

انا بطبيعتي حركيه ماآحب الروتين أكره شي بالحياة هالروتين بس الدوام يحكم عليك هالأجواء 

شنو استفدت ؟؟ شنو الحل ؟؟ حياتي بتم جذي ليمتى ؟؟

هذا حال گل موظفه ، لكن في حال كنتي طالبة أتوقع الامر أخف شوي لأن محاضراتج مو شرط تكون الصبح ممكن تكون متأخر حسب .. 

المهم بعدها قررت آحسن من مزاجي وآتقبل قومة الصبح بكل صدر رحب و سعاده وأغير جو الدوام شوي ، لان السالفه مو سالفه جم يوم او جم شهر او حتى سنة ، الدوام شي انتي محتاجته سنوات ..

خطوات بسيطه سويتها ، عشان اخلي الدوام مكان جميل آروح له 

آولا : تغيير جو الدوام 

أخذت معاي كوبي المفضل للدوام
، الصبح أول ما أجي أسويلي قهوه او شاي في هالكوب و حاط علبه جميـلة فيها محفزات السعاده ( من كاكاو و بسكوت و اشياء آكلها مع القهوة أو الشاي ) . .

يعني سويلك " كافيه خاص لك " لانواع القهوة والشاي اللي تحبينهم ..

وحسبي حساب اللي معاك تضْيفينهم بكوب شاي او قهوه " كل مشروك مبروك " كلمة جدتي فديتها 

زيني مكتبك بالورد مثلا او الشموع عطي جو حلو لنفسك . .
حطي فواحات لها روائح ورد ، أنا خذيتهم من سنتر بوينت روائح باردة تناسب جو الصباح خفيفه

لا يكون مكتبك جامد وميت ازرعي الحيويه فيه حطي كوشيه ملونه عالكرسي / مفرش جميل 

خلي كل من يمر جهة مكتبك تنفتح نفسه من المنظر والروائح

ثانيـا : أذكار الصباح 

دايم عودي نفسك بدل الـ ( تأفف ) آستغفري ربك .. هذي الآذكار تعلمتها وحفظتها وتعودت عليها من والدي الله يطول بعمره كان من وانا صغيره وهو موديني المدرسه الصبح يقول هالآذكار بصوت مرتفع و من كثر ما اسمعها حفظتها وعلقت براسي ان كل مااصحى الصبح وانا بالسياره اتذكرها واقولها .

سبحان الله لها سحر هالاذكار تحسي بأمان وراحة قلب وبال ، ابسط شي قولي وانتي بالسياره رايحه للدوام 

" أصبحنا وأصبح الملك لله والحمدلله لا إله إلا هو وحده لا شريك له ، له الملك وله الحمد وهو على كل شي قدير "

بعدها طول الطريق وانتي رايحه حتى توصلين استغفري

 " أستغفر الله وأتوب إليه " 

وشرط مهم قوليها وانتي مؤمنه بربك و متفائلة ، لا تكوني يائسة حتى لو كنتي فعلا جذي تفائلي وكوني مقبله للحياة .

ثالثـا : آكسري الروتين 

الدوام غالبا يكون روتين كئيب ميت ثقيل الوقت مايمشي ، وغالبها مايكون في شغل طول الوقت يعني ممكن يجيك شغل ساعه وحده بس والـ ٦ أو الـ ٥ ساعات الباقي حاطه ايدك على خدك ، في مثل هالحـالة شتسوين !!

أملي هالوقت بشي مفيد وتحبينه ، مثلا أنا أحب التصميم فتلقون معاي على مكتبي كراسة صغيرة وقلم رصاصه عشان أرسم وأحط فيه أفكاري . . 

حطيلك كتيب صغير تحطين فيه أفكارك / رسوماتك / شخابيطك . . وحتى تقدرين تفرغين فيه طاقتك السلبيه وتفضفضين عن نفسك . . 

عندي أنا المدونة شاغله وقتي وتفكيري حاليا تلقوني كل يوم أفكر بالتدوينه الجايه و أحضر لها من ناحية الكلام والصور ، في الصبح ماشالله تجيني الأفكار وأدونها عشان أشتغل عليها . 

هذي أمور بسيطه أسويها والحمدلله مرتاحة منها وحاسة بتغيير في مزاجي ولله الحمد في تقبل للوضع و تصافينا انا والدوام هههههه

وفي أفكار كثيره وأمور ثانية تقدرين تبتكرينها و تخلين مكان عملك مكان تشتاقين له

وفي الاخير اللي حابه اوصله لكم ان اذا كنتي كارهه شي معين حاولي بأي وسيلة تتقبلينه وتستبدلين هالكره الى تقبل و ترضين فيه . . 

وبس :)) 

أشوفكم على حب  ❤️