ريفيو : حبوب الشعر [ برايورين ] ونتايج الشهر الأول من الاستخدام

السلام عليكم ورحمة الله،

ذكرت لكم قبل شهر أني بديت أستخدم حبوب الشعر Priorin وهي اشهر حبوب الشعر والكل يمدحها بالفترة اللي فاتت وقربت الزجاجه الاولى تنتهي وحبيت أشارككم بهذي النتايج الأوليه . .

. . [ معلومات عن المنتج ] . .

برايورين Priorin مستحضر يتكون من مجموعة من الفيتامينات المستخلصة من مكونات طبيعية عشبية لعلاج تساقط الشعر ، وتنشيط فروة الشعر ، تنشيط الدوره الدمويه في الجلد . .

مكونات برايورين :

– يحتوي على خلاصة حبة الدخن الذهبية (140 مجم) الغنية بالفيتامينات التي تستخدم في الطب الشعبي لعلاج مشاكل الشعر .– زيت جنين القمح (271 مجم) الغني بفيتامين ه والعديد من الأحماض الأمينية الغير مشبعة .– بانتوثينات الكالسيوم (10 مجم) الذي يتحول لحمض البانتوثانيك المفيد لفروة الرأس .– سيستين (3 مجم) .– مكسبات طعم (فانيللين) .

ارشادات الاستعمال :

– يراعى الاهتمام بنظافة الشعر ، وتدليك فروة الشعر بصفة يومية خلال استعمال برايورين .– تناول غذاء متوازن حيث أن الطعام الغير صحي من مسببات تساقط الشعر وضعفه .– ينصح عدم استعمال برايورين خلال فترة الحمل والرضاعة لأسباب وقائية .– الدواء ليس له أي أعراض جانبية .

طريقة الاستعمال :

– يستعمل 2-3 كبسولة من برايورين للبالغين يوميا بعد الأكل مع قليل من الماء .

– الأطفال من سن 6 سنوات وما فوق يتناولون كبسولة يومية فقط .

– يبدأ التحسن في الشعر بعد عدة أسابيع ، ولكن يحتاج العلاج لفترة تتراوح بين 3 إلى 6 شهور حيث أن نمو الشعر بطئ .

– يبدأ ظهور خصلات صغيرة للشعر خلال الأربع أسابيع الأولى من العلاج .

– الأربع التالية يخف تساقط الشعر بنسبة 60% ، وتطول الخصلات الجديدة مع حيوية ملحوظة .

– بعد أربع أسابيع أخرى يتوقف تساقط الشعر بنسبة 75% ، ويكتسب الشعر لون وبريق صحي جميل .

– بعد ستة شهور يكتسب الشعر صحة كاملة ومظهرا مرضي للغاية .

. . [ الحين خلينا أنقل لكم تجربتي الشخصيه ] . .

حاليا لي شهر وأنا أكل حبوب الشعر أكلها مرتين باليوم بعد الاكل وباقي الحين جم يوم وأخلص العلبه ، لان العلبه فيها ٩٠ حبه فأكليها على مرتين باليوم راح تكفي معاك شهر ونص ، نجي الحين حق النتايج اللي شفتها بعد الاستخدام 

> بالنسبه للتساقط وأنا اعاني من هالمشكله كثيير أمممم ماشفت شي ملفت صراحه وماحسيت انه خف التساقط مثل ماهو شعري ماشفت قوة فيه ولا لمعان ونضاره وصحه وحسب مايقولون ان النتايج هذي تبين بعد ٨ اسابيع من الاستخدام وأكثر . .

> حسيت ان الـ بيبي هير اللي هي الشعرات الصغيره اللي تشوفينها اول شعرك لاحظت انها طاالت اصلا انا توني ألاحظ أن عندي بيبي هير ماعرف هي كانت موجوده بس قصيره عشان هالسبب ماشفتها او بالاساس هي مو موجوده الله العالم بس اللي شفته ان عندي شعرات طويله جديده بالذات من عند الجبهه بدايه منبت الشعر

> أما الأظافر أنا أظافري فيها اصفرار وخطوط وغير هذا ضعيفه اللي لاحظته بعد الحبوب ان الخطوط اللي بالظفر خفت مو مثل السابق لكن الاصفرار موجود بس احس كأنها صارت أقوى الظفر شوي بالرغم من ان الفتره اللي فاتت أظافري كنت أقصها ماشفت قوتها وهي طويله راح تبان أكثر 

> اللي يقولون تسمن الحبوب بالنسبه لي ماحسيت بأي تغيير بوزني مثل ماهو ولافتحت شهيتي بزياده ولا اي شي من هذا الكلام ، طبعا الاجسام تختلف مو عشان قالو تسمن يعني راح تسمنك او لاني قلت ماتسمن يعني ماراح تسمنك هذا يعتمد على نوعية جسمك فلازم تجربينها بنفسك 

> أي نتايج ثانيه وتغييرات عالـ وجهة أو الجسم وغيره ماشفت شي وهو مو مذكور انه يحسن من بشرتك او شي من هذا القبيل بس تأثيره الشعر والأظافر 

ملاحظة : في بنات شافو نتايج أفضل من نتايجي من أول شهر وهذا يعتمد على كمية الضرر و النقص اللي بجسمك ، يمكن أنا نقصي كبير ومشاكلي يره فعشان هالشي أحتاج إلى أكثر من شهر وأكبر من هالجرعه ان ممكن ازيدها أخليها ٣ حبات باليوم بدل الـ حبتين ، أن شالله حابه أكمل على هذي الحبوب مدة ٣ شهور عشان تعتبر مثل كورس علاجي بعدها أشوف النتيجه النهائيه وأحكم عالمنتج من وجهة نظري وان شالله بعد كل شهر راح أذكر لكم التطورات الجديده 

وبس

آشوفكم على حب ❤️