My Phillip Lim Bag | ❤ شنطتـي الجديـدة

السلام عليكم ورحمة الله 

غالبا ما تسحرني شنطه وأتعلق فيها وأبيها بأي طريقه، هذا اللي صار معاي

 مع شنط فيلب ليم mini pashli 

من آول ماشفتهم سحروني وعشقتهم وألوانها كانت مُحيره شنو أختار

من بينهم الفواتح وإلا الغوامق ، كنت حاطه في بالي بأخذ اللون "الزيتي - الأخضر الداكن "

بس بالصدفه شفت شنطتي هذي لونها عجبني داخله ٣ ألوان بالشنطه " الأسود و الأزرق و الأبيض "

خذيتها وأنا متخوفه من الأبيض أنه يتوصخ ويتغير لونه والله يستر

بس أشوفها مناسبه للعبايه أو البدلات والفساتين 

طبعا أكيد خذيت الحجم الميني الصغير فيها كمية كيااااته ❤

وتناسب سفر وطلعات فيها مشي طويل لانها مريحه وعلاقها طويل تلبسينها كروس

وأفكر استخدمها لـ الدوام علشان مابي آخذ أغراض واجد معاي بالشنطه 

طبعا شنطتي الكيوت شريتها من النت من موقع Nordstrom.com 

كان عليها خصم ممتاااااز جدا بحدود الـ ٤٨٠ دولار

الحين سعرها بالموقع فوق الـ ٧٠٠ دولار

والشنطة حجمها من داخل أشوفه مناسب لاحتياجاتي " محفظة / عطر / موبايل " وممكن مناديل و ميكب بسيط مثل روج ، ما أحتاج لأكثر من هالأشياء هذي 

وفيها سحاب عالجنبين عشان يعطيك توسيع أكبر اذا احتجتي ، ومثل ما ذكرت معاها علاقه طويله تلبسينها بالكتف وممكن تستغنين عنها وتمسكين الشنطه بدونها

نزلت من هالموديل ٣ أحجام " ميني / ميديوم / لارج "

طبعا أنا ماحبيت شكل الموديل عالاحجام الثانيه حسيت شكلها بشع ، الموديل حلاته ميني صغير . . وإلا شرايكم !

أما الألوان كثييييييره وكل لون أحلى من الثاني وجد حيروني في البدايه إلى أن أخترت الجميله هذي 

وهذي صورتها على العارضة

وبس

آشوفكم على حب ❤