أستخدامات زيت جوز الهند + مشترياتي من موقع آي هيرب

السلام عليكم ورحمة الله،

أكيد كلكم سمعتو وشفتو الضجه الأخيره على زيت جوز الهند واستخداماتهم للعنايه بالبشرة والشعر وينفع لكل شي ، أنا مثلكم انعجبت من كثرة الريفيوهات اللي انكتبت عنه ومافي بنت ماصار عندها هالزيت شي موطبيعي اصلا أتوقع أنا أخر بلوقر جربته :/ الكل يمدح فيه وسويت بحث كبير عنه مافي احد تكلم سلبي عن هالمنتج جد شي حمسني انا بعد ودي اجربه بالذات انها تخص العنايه وأحب مثل هذي الامور ولما بحث لقيت انواااع كثييره من هالزيت من ماركات مختلفه في موقع آي هيرب و أمازون واخترت آي هيرب اللي هو مخصص بالاشياء الطبيعيه والعنايه وخذيت نوع مغاير عن اللي خذوه أغلب البلوقر حبيت اجربه . . 

قبل كل شي خلوني اعرفكم على هالزيت هذا . . 

[ . . ماهو زيت جوز الهند . . ]

هو اشبه بدواء معالج كـ مضاد للبكتيريا ومضاد للفطريات ومضاد للالتهابات وقتل بعض الفايروسات ويسهل عمليه الهضم لديك ، في الاسواق توجد أنواع من هذا الزيت ويفضل اكيد استخدام الزيت العذري الصافي اللي مايكون مكرر وعليه اضافات . . 

عشان تفرقين بين الزيت العذري البكر والغير عذري او المكرر 

الغير عذري : مايكون له طعم ولا ريحه والفوايد بعضها منزوعه منه بسبب عمليه التكرير .

العذري " البكر " : هو اللي مامر على عمليه تكرير ومحتفظ بطعمه وريحته وحتى لما تستخدمينه بالطبخ راح تحسين بنكهته .

طبعا أستخدامات زيت جوز الهند كثيره سواء بالطبخ او بالعنايه في البشره او لشعرك او حتى تاكلينه مباشره راح يفيد جسمك من الداخل . . 

[ . . في مجال الطبخ . . ]

>> أستخدمي زيت جوز الهند بدل الزبده والزيت النباتي في الطبخ

>> ممكن يكون كبديل للسكر في التحليه

>> بديل للكريمة فوق القهوه 

[ . . في مجال التجميل . . ]

>> زيت للشعر

اذا كان شعرك جاف وتعبان وخفيف وعندك مشاكل مع قشرة الرأس بحاجة الى شيء لتعزيز الزيوت الطبيعية في شعرك وفروة الرأس وزيت جوز الهند يعمل بشكل جيد لهذي المشكله . . 

>> مرطب للبشرة

اكيد الجسم مثل الشعر يحتاج لترطيب وزيوت مستمره تغذيه وهذا الزيت مثل ما ينفع للشعر ايضا ينفع للبشرة على وجهك يدك رجلك جسمك بالكامل رطبيه عن طريق زيت جوز الهند ، ممكن يكون دهني وثقيل شوي عالبشره في البدايه بس دقايق وتمتصه البشرة . .

>> يمنع ظهور حب الشباب 

الترطيب المستمر والتغذيه الصحيحه للبشره تخفف من ظهور حب الشباب . .

>> التخلص من الانتفاخ حول العينين

كثير منا نواجه هذا الشي لما نصحى من النوم نلاقي تحت العين منتفخ ، قبل النوم اخذي كميه من الزيت وحطيها تحت عينك طبعا الزيت أمن جدا ولما تصحي الصبح راح تلاحظي قل الانتفاخ . .

>> غسول وجهي طبيعي

عشان تحصلين على غسول طبيعي عميق كل صباح او كل مساء اخذي كميه متساويه من زيت جوز الهند وزيت الخروع وغسلي وجهك . . 

>> بدل كريم الحلاقه

اذا كنتي تستخدمين الموس لإزاله شعر جسمك استخدمي زيت جوز الهند حطيه على جسمك نص ساعه بعدها احلقي وبعد الحلاقه ايضا . . 

>> مقشر للوجة

اخلطي زيت جوز الهند مع بكربونات الصوديوم بنسبه متساويه وصغيره وقشري وجهج بلطف . .

>> مقشر للقدم

اخلطي زيت جوز الهند مع ملح البحر الخشن . .

>> التخلص من علامات التمدد

كثير منا يعاني من علامات التمدد " السيلوليت " بعد الحمل غالبا او بسبب ضعف مفاجي للجسم او زياده ، اخذي من الزيت ودلكي على اماكن التمدد راح يقلل من ظهورها مع الزمن واهم شي انك تحرصين انها ماتطلعلك مره ثانيه عن طريق الترطيب المستمر . .

>> الحد من ظهور البقع

كثرة التعرض للشمس احيانا تصبغ في الجلد وتصير بقع اغمق من بشرتك وهذا الزيت ايضا يساعد على حماية بشرتك من هذي التصبغات والبقع . . 

>> مرطب للشفاة

مثل ماهو مرطب للجسم فاكيد تقدرين تستخدمينها على شفايفك وترطبيها . . 

>> ماسكارا صحيه 

اصنعي مسكرتك الخاصه والصحيه بمواد طبيعيه 

اخذي ماسكارا فارغه ونظيفه وحطي فيها القليل من زيت جوز الهند و زيت او جل الصبار وشمع العسل وفحم أو مسحوق الكاكاو . .

>> العناية بالرمش

اهتمي برموشك وقللي استخدام الماسكرا كثرتها تسبب تساقط وقبل ماتنامي اخذي قلييل من زيت جوز الهند وحطيه على رموشك وطبعا تكون رموشك نظيفه بدون ميكب . . 

>> تسريع نمو الشعر

زيت جوز الهند يساعد على تحسين الصحة العامة وقوة شعرك حطيه على شعرك ودلكي فروة راسك . .

>> برايمر قبل الفاونديشن

يستخدم ايضا الزيت كـ برايمر مثبت قبل الفاونديشن يرطب بشرتك ويصفيها عشان يطلع الفاونديشن بصوره حلوه . . 

>> مزيل مكياج

عشان تزيلين مكياجك حطي زيت جوز الهند على بشرتك وانتظري دقايق بعدها اخذي منديل ومسحي وجهك . . 

>> قناع للوجه

اخلطي زيت جوز الهند مع العسل لما يتكون عندك خليط سميك وحطيه على بشرتك مدة ١٥ دقيقه بعدها اغسليه . . 

 [ . . سوي مقشر القهوة الشهير " فرانك " . . ] 

بدل ماتصرفي فلوسك على مقشرات لماركات غاليه او حتى لو مو غاليه دامك تقدرين تسوينها في البيت سويها واحفظي فلوسك ، كل اللي تحتاجينه ~ 

• نص كوب قهوة مطحونه

• نص كوب سكر خشن

• نص كوب زيت جوز الهند

واذا عندك زيوت معروفه فوايدها مثل فيتامين سي ضيفي ملعقه صغيره على الخليط عشان تزيدين من فوايد المقشر . . 

[ . . تجربتي الشخصية . . ]

زيت جوز الهند خذيت ٢ من موقع آي هيرب الواحد بـ 11$ تقريبا زيتي جدا وريحته فوااحه بشكل واضح ولطيفه للي يحبون ريحة جوز الهند كأنها " كاكاو البونتي " 

أستخدمته لشعري ولجسمي بعد الشاور ووجهي أحيانا قبل النوم ، كترطيب عاالي جدا ويحتاج وقت بسيط عشان تتشربه البشره ذكرني بـ زيت جونسون بس جوز الهند تحسونه زيتي اكثر مثل زيت الزيتون ، بالنسبه للشعر مالاحظت أشياء سحريه للآن ولا تتوقعون أشيا من هذي لان نتايجه تحتاج وقت مع الشعر لانها تعتمد على أمور ضروريه أكثر من مجرد زيت ، الزيوت مهمه للشعر ولكن تدخل معاها أموور جانبيه مثل الوراثه و التغذيه وروتينك مع شعرك ، وبحكم انه زيت طبيعي فهو آمن من أي مواد ثانيه ، حطيت الزيت على شعري بالليل ونمت ولما صحيت غسلته حسيت ان الريحه عالقه شوي بالشعر المفروض تكون المده من ساعتين الا ٥ ساعات مو اكثر بس مع العطور والخمريات يمشي الحال . .

[ . . مشترياتي من موقع آي هيرب . . ]

آغلب اللي خذيته من الموقع زيوت وأغلب التقييمات عاليه والردود ايجابيه 

• زيت جوز الهند 

خذيت اثنين واحد لي و لاختي 

• صابونه افريقيه 

تنظف الوجه بعمق وتحتوي على صبار وفيتامين اي

• ماسك طين البحر الميت

خذيته لان طين البحر الميت يمدحونه ومبدئيا حبيته 

• ماء ورد

لازم يكون عند كل بنت هذا الماء لبشرتها تحطها كل يوم وعادي من اي ماركة تاخذونه 

• زيت الخروع

معروف هالزيت من ايام جداتنا والكل يعرف فوايد للشعر والبشره 

• زيت الجوجوبا

من الزيوت المهم واللي لها فوايد واستخدامات عديده

• زيت الآرقان

اشتهر بالفترة الاخيره بكثره ويستخدم للشعر والبشرة ايضا

وبس

آشوفكم على حب 💜