ريفيو عن شنطتي بولغري + تنسيق ناعم لـ جمعـة بنات

السلام عليكم ورحمة الله ،

شنطتي اللي واااقعه بغرامها هالفترة من ناحية لون وشكل تصلح للمناسبات شكلها كلاسيك رسمي انثوي وفيها لمسه شبابيه والأفعى معطيه فخامه بشكل خورافي 

انا اتكلم عن شنطة بولغري Serpenti Forever شنطة من جلد العجل باللون الأخضر الزمردي مع حجر مطلي بالذهب ، حجم الشنطه ميديوم ولها طريقتين للبس اما كتف تسحبين العلاقه او السلسله تصير طويله او تخلين علاقتها قصيره وتحطينها بيدك ، من الداخل فيها قسمين وجيوب كثيره وتجي معاها مرايه ، في منها أحجام و ألوان وكل موسم نفس الشكل ينزلون للشنطه بس لون جديد وسايز جديد . . 

[ . . عيوبها بالنسبه لي . . ]

• الشنطه جلدها حساس ويتوسخ بسرعه وممكن تحصلين فيها شرخ عالجلد وانتي تو لابستها فهي تحتاج لعنايه شديده لازم تحافظين عليها اذا تبين تدوم لك مده تحطينها بكيستها وتنتبهين لعلاقتها او سلسلتها عشان ماتأذي الشنطه وماتنفع تكرفينها ابد خليك معاها ناعمه ولطيفه . . 

• الشنطة قااسيه وماتتمدد بسهوله يعني لما اجي افتحها من الداخل بصعوبه شوي وماتقدرين تحطين اشيا كثيره داخلها لانها ماتتوسع للاشيا يادوب بس احط ايفوني حتى العطر مااقدر احط ولا المحفظة فـ خليتها للمناسبات بس . . 

[ . . مميزاتها بالنسبه لي . . ]

• حجمها الميديوم أفضل سايز بالنسبه لي صحيح احترت بين السايز السمول بس هو في اختلاف بالشكل بسيط عن الميديوم ، شنطتي كلاسيك اكثر ومسكتها وسلسلتها اجمل من السمول . . 

• اللون خووورافي جد أكثر شي خلاني أتمسك بالشنطه بالرغم من عيوبها لونها وشكلها الجذاااب ، في ألوان ثانيه مثل الاصفر والوردي و البنفسجي والازرق بس حسيت الاخضر هادي وأكثر أناقه . .

الشنطة خذيتها شهر مايو اللي فات من برلين بسعر ١٨٠٠ يورو وبالخليج أغلى شفتها بالكويت بـ ٨٠٠ دك

حبيت أدخل تنسيق بسيط لكم مع الشنطة وبالرغم من اني قليل ما اكتب عن الفاشن واللبس والتنسيقات مع اني احب هالنوع من التدوينات عن الفاشن بس مشكلتها اللي تواجهني التصوير لان مواضيع التنسيقات تحتاج صور واضحه للقطع وعرضها بطريقه حلوه ، ان شالله اكون وفرت الاشيا اللازمه عشان تطلع لكم الصور باجمل شكل . .

في بنات جد يكسرون خاطري لما تلبس لبس أكبر من عمرها وهي توها بالـ عشرينات بس لانها مثلا متزوجه أو عندها اطفال خلاص ماينفعها هاللبس لا بالعكس عيشي عمرك وألبسي اللي يعجبك ويناسب جسمك ويبرز جماله ، لحد يقيدك باللبس وتسمعين لفلان و فلان والا انتي خلاص كبرتي على هاللبس لا جد عيشي عمرك شوفو عجايز الاجانب كل وحده متشببه وعايشه يومها ويوم غيرها ههههههه ما اقول ان هذا الصح انا مع ان الوحده تعيش شبابها بس بحدود طبعا وانا اعرف ان في عادات تقييد البنت في اللبس بحسب بيئتها مافي مشكله تقيدي اذا كنتي في مكان فيه رجال محارمك أو ناس من بعيد بس اذا كنتي بوسط بنات لا خذي راحتك ، والاهم من هذا كله اعرفي لجسمك وشنو اللي يناسبه لان الازياء عالم كبير وخياراته كثيره وكل جسم يحتاج تفهمينه وتعرفين مزاياه وعيوبه عشان تقدرين تختارين من القطع اللي يناسب لاخفاء أو ابراز ملامح . . 

وتنسيق اليوم بسيط وناعم يصلح لجمعة بنات أو مناسبة صغيره أو عيد ، ويناسب البنت من عمر ١٨ سنه الى آخر العشرين ، أحسه جد بناتي أنثوي ناعم صحيح ماراح يبين جماله عالمانيكات مثل الجسم بس حاولو تتخيلون الشكل كامل . .

فستان بيج "سكري" قصير إلى تحت الركبه بشوي 

التفاصيل اللي فيه جميله والخامه اللي اعتقد انها دانتيل معطيه فخامه ناعمه للقطعه عموما الدانتيل عششق وفخم واللون الاسود جميل وهادي مع وجود لمعه بسيطه اضافة للفستان بريق وجمال . . 

ماحبيت ألبس سلسله أو عقد لان شغل الفستان اعتقد كافي ولان بعد منطقه الصدر متغطيه بالكامل فـ مايحتاج اضافه تفاصيل على الرقبه . . 

حلق الاذان احترت بين نوعين أما حلق طويل دام مافي عقد فـ ممكن نبرز الحلق كـ مجوهرات أو حلق صغير ناعم فيه كريستاله مع  ذهبي حواليها . . 

الساعه اخترتها تكون فخمه كلاسيك وداخل معاها اللونين الذهبي والفضي بحيث تتماشى مع الكل وممكن نزين اليد بالاساور اللي تعجبك بجانب الساعه بس انا اعتمدت البساطه واخترت اسواره ناعمه خيط بلون غامق بجانب الساعه و في اليد الثانيه لبست اسواره ذهبيه ، واكيد الخواتم ذهبيه في اليدين . .

الشوز هنا هو اللي معطي الفخامه صراحه حييييل حابته ودخول الكريستالات فيه كأنه حذاء أميرات :)) لونه بيج فاتح وغالبا هاللون يتماشى مع غالبية التنسيقات وتستفيدين منه كثير لازم يكون هاللون في دولاب كل بنت . .

الشنطة تكلمت لكم عنها فوق ، بس في نقطه ماحبيت فكرة انها تكون هالشنطة للطلعات مثل السوق وغيره " رغم ان في بنات يستخدمونها بالسوق " بس عن نفسي اشوفها ماتنفع اولا الشنطه شكلها وقصتها للمناسبات لانها ماتشيل اشياء كثيره ثانيا النوع هذا من الشنط قلت لكم حساس بسرعه يتعرض للتلف وللبقع فأفضل تكون للمناسبات فقط ، وبالنسبه للون حبيتها كثييير مع التنسيق لانها اضافة تغيير وكسر للالوان اغلب اللوك ذهبي وبيج فـ حلو انك تحطي الشنطه لون مغااير تماما مثل أحمر أو بنفسجي أنا حبيت ادخل اللون الأخضر وجدددا عجبني التداخل بالالوان . . 

صبغ الاظافر اخترت يكون لونه أخضر غامق عشان يكون طقم مع الشنطه :d حبيت أبرز اللون الاخضر عالصبغ والشنطه . . 

وهذا اللوك بالكامل ان شالله عجبكم وتفاصيل اللوك تحت 

الفستان من ~ Orsay ( التشيك )

الشوز من ~ kurt geiger ( كاديفي مول - ألمانيا )

الشنطة من ~ بولغري

الساعه من ~ أوميقا

الحلق من ~ جيفينشي

الاسواره الخيط من ~ كارتييه

الاسواره الذهبيه من ~ آل في

الخواتم من ~ محل اكسسوارات عادي 

أتمنى اشوف تعليقاتكم تحت وفي الانستقرام يهمني راييكم 

آشوفكم على حب 💜