أفضل فاونديشنات عندي + آخطاء تجنبيها عند وضع الفاونديشن

السلام عليكم ورحمة الله ،

كلنا ندور على الفاونديشن السحري اللي يخفي كل العيوب ويصفي البشرة ويعطي وجهنا حيويه وصحة مثل فاونديشن نجمات هوليوود ، فـ دايم تلاقونا نبحث شنو فاونديشن النجمة الفلانيه ويطلع اللي مستخدمته هذي الفنانه عندنا وجربناها بس ماطلع لنا بنفس نتيجه بشرة نجمات هوليوود ، لان هذا يعتمد على أمور ثانيه غير الفاونديشن راح اذكرها لكم تحت . . 

أولا خلوني أذكر لكم 

. .  [  أفضل فاونديشنات عندي حاليا  ] . . 

١) فاونديشن من Catrice | Nude illusion

اكثر فاونديشن واقعه بغرامه هالفترة 

ماركة ألمانيه جربت عندهم اكثر من منتج من أحلى منتجاتها فاونديشن الوهم او الخيال بمعنى أنه خفييف عالبشره مع تغطيه مُثلى واضاءه ناعمه وتركيز ناعم للحصول على بشرة متوهجه صحيه مع ترطيب و حمايه وتبقى مده اطول على البشرة ، نهايتها طبيعيه مطفي بس بإضاءه ناعمه للوجه ، وجد ماتحسين انك حاطه فاونديشن لان خفيف عالبشره كأنه بي بي كريم ، توزيعه واندماجه سهل وبسيط مع الفرشه ويدوم مده طويله ومايتقطع وانا بشرتي فيها مناطق دهنيه مزعجه في بعض الفاونديشنات تلمع واحتاج بودره اثبتها اما مع هالفاونديشن حطيه بروحه بدون بودره عشان اجربه والنتيجه جميله جدا لان نهايته مطفيه بس على اناره واضاءه ناعمه للوجه ، ينفع للاستخدام اليومي وبالنسبه لتغطيته يخفي عيوب البشرة البسيطه بشكل جميل مادري اذا وحده بشرتها تعبانه راح يقدر يخفي الاثار بس تغطيته ميديوم الى لايت تقريبا ، خذيت درجة البيج بالعاده اخذ اللايت احب يكون افتح مني بشوي بس حبيت هالدرجه تناسب طلعات الصباح والدوامات وهالماركه اسعارها مناسبه للكل وجدتها ممتازه تلاقونها في بعض الصيدليات الجماليه انا ماخذته من برا بس لقيت هالماركة في السوبر ماركت " جيان " . . 

٢) فاونديشن من Nars | All Day Luminous 

أول فاونديشن اجربه من نارس كنت أقول فاونديشن آستي لودر دبل وير أروع فاونديشن جربته للمناسبات كنت غلطانه الحين أقول نارس وبس ، خذيت درجة بنجاب اللون مناسبني جدا وخفييف عالبشرة مو حاسه بوجود طبقات تغطيته متوسطه وتزيدينها عن طريق وضع طبقات اكثر ، بس اشوف طبقه وحده كافيه وتغطيتها حلوووه وسهل التوزيع عن طريق الفرشه او البلندر ، انا احط قبله برايم ميكب فورايفر للبشره الدهنيه عشان مايدهن ، احيانا ممكن بعد ٤ او ٥ ساعات تبان دهون خفيفه عالبشرة بس مجرد ماتحطين باودر تختفي ، ثباته متوسط بس غالبا انا استخدمه في المناسبات فـ المده اللي يثبت فيها كافيه اني اخلص من المناسبه وارجع البيت . .

٣) فاونديشن  L'oreal | Infallibel Matte 

جاتني فتره عانيت من كثرة افراز بشرتي للدهن ، كل مااستخدم فاونديشن تبان اللمعه على طول ، جا هذا الفاونديشن في وقته مذكور انه يعطي شكل مطفي للبشرة ، وعلى فكره في اكثر من فاونديشن يحمل نفس الاسم بس الشكل يختلف المهم استخدمته على بشرتي فعلا ساعد على الحد من افراز الدهون بالبشره فاختفت اللمعه ، الفاونديشن يناسب البشرة المختلطه والدهنيه وهو ثقيل شوي فاخذ نقط صغيره اوزعها على كامل وجهي ، تغطيته متوسطه وتقدرين تزيدين في الطبقات لتغطيه اكبر ، سهل الدمج والتوزيع ويدوم لك مده جيده جدا 

٤) فاونديشن من Maybelline | Fit Me

من اخف الفاونديشنات اللي جربتها واللي ممكن استخدمه يوميا ، سائل جدا وتغطيته خفييفه مايناسب البشرة الدهنيه واللي فيها مشاكل احس مايغطيها ، احب استخدمه لمشاوير الطلعات القريبه او ممكن لجمعه عائليه لان يعطي لمعه للوجه مو مطفي بس احتاج اثبته في بورده ضروري والا راح تزيد هذي اللمعه في وجهي بشكل سيئ ، بالرغم اني بالفتره الاخيره ماصرت استخدمه كثير لان بشرتي صايره دهنيه اكثر بس احب احيانا اللوك اللي فيه لمعه طبيعيه وحياه . .

. . [  عشان تحصلين على فاونديشن مثالي  ] . .

• لا تستخدمين الفاونديشن على بشرة غير صحية 

مستحيل مستحيل يطلع عليك الفاونديشن حلو وانتي بشرتك اساسها غير صحي حتى لو كانت تغطيته كبيره لايمكن يجمل بشرتك ولايحسن من مظهرها اذا هي اساسا بشره تالفه ماتعتنين فيها لا بترطيب ولا تقشير ولا اي عنايه تراكم جلد ميت عليها او بقايا مكياج هذي كلها تأثر على نتيجة المكياج ، فأساس كل شي العنايه والاهتمام سواء في وجه او جسم او شعر . . 

• أختاري الدرجة المناسبه لـ لون بشرتك والنوع المناسب

اكرررره شي حركة " المقنع " اللي يجي لون وجهك شي ولون رقبتج وجسمك شي أخر دايم اختاري الاقرب الى لون بشرة وجهك ، اغلبنا يرتكب خطا اختيار الفاونديشن ليش !! 

لان تلاقون البنت تختار الدرجه الاقرب الى لون بشرة يدها تقارن عن طريق وضع درجات الفاونديشن في يدها وتختار على هذا الاساس وهذا غير صحيح لان لون بشرة الوجه غالبا تختلف شوي عن لون اليد وهذي لاسباب كثيره منها اهتمامنا الاكثر منصب للوجه نهتم فيه اكثر من كريمات و ترطيب وحمايه من الشمس وماسكات ونهمل اليد ، عندك طريقتين لاختيار الفاونديشن اما تاخذين عينه صغيره من اللون اللي شاكه فيه وتجربينه على وجهك في المحل نفسه او في البيت او اطلبي من المختصه بالمحل تحدد لك الفاونديشن المناسب لك ، وطبعا والاهم اختاري النوع المناسب يعني بشرتك دهنيه اختاري فاونديشن مطفي عشان ماتفرز بشرتك دهون زياده واذا بشرتك جافه اختاري الفاونديشن اللي يعطيك ترطيب واضاءه صحيه هذا الشي فعلا احرصي عليه واعرفي بشرتك شنو نوعها عشان تعرفين تتعاملين معاها . . 

• وجود البرايمر قبل الفاونديشن مهم

سواء بشرتك دهنيه او جافه او عشان يدوم معاك الفاونديشن مده اطول وهو نظيف استخدمي البرايمر المناسب لـ بشرتك ، في انواع كثيره ومن ماركات مختلفه منها واشهرها برايمر من ميكب فورايفر منزلين انواع كثيره وجربتها شخصيا كانت حلوه . . 

• مشاكل في بشرتك استخدمي مصحح العيوب والكونسير

لكل بشره تعاني من حب شباب او احمرار او سواد تحت العين ضروي استخدمي " كوركتر " اللي هو مصحح العيوب قبل الفاونديشن عشان يخفيها ويوحد لون الفاونديشن مايقلب لون رمادي . .

• احرصي على استخدام البودره المضغوطه 

بعد ماتحطين الفاونديشن وبعد ماتنتهين من مكياجك طبطبي على وجهك في البودره عشان تثبتين كل شي ، وايضا اختاري اللون المناسب لايكون اللون مغاير عن لون الفاونديشن لون اغمق او افتح منه لا اختاري بنفس درجته . .

وبس ان شالله فادكم الموضوع لو شي قليل

وآشوفكم على حب 💜