ريفيو~ منتجات البشره من ماركة فرانك " Frank "

السلام عليكم ورحمة الله ،

قبل فترة أحد المتاجر في الانستقرام تعاون معاي وقدم لي هذي المجموعه من فرانك للبشرة واللي اشتهر بالفترة الاخيره بسنفرة القهوه للجسم وكون مواده طبيعيه زادت رغبه الطلب عليه، واليوم بنقل لكم تجربتي لهذي المنتجات استخدمتها مده ٣ اسابيع وهي كافيه عشان اتكلم عنها بشكل عام 

تتكون المجموعه من ٣ منتجات 

[ غسول للوجه ~ سنفرة للوجه ~ مرطب للوجه ]

> غسول الوجه [ سعرها في الموقع ٢٠ دولار ] :

غسول يومي للبشره مرتين صباحا ومساءا بعدها تغسلين بماء فاتر ، تشيل الشوائب وتسكر المسام وتنظف بعمق ومناسب للبشره الحساسه . .

تتكون من ~ القهوه وزيت جوز الهند واللوز وبذور العنب والفحم 

. . [ تجربتي مع الغسول ] . .

استخدمه مره باليوم اخر الليل ريحه الفحم باينه ولون الغسول اصلا غامق لون رمادي ، انا نوع بشرتي مختلطه وماتعاني لله الحمد من مشاكل كثير ، هذا الغسول اخذ كميه بسيط منه واوزعه على وجهي بالكامل ينظف وجهك بسلاسه اذا ماكنتي حاطه ميكب او ميكب خفيف لكن اذا ميكب سهره ثقيل او مثلا روج ثابت مايتنظف بسهوله تحتاجين اكثر من مره تنظفي بالغسول وتفركي بقوه ، نظافته جيده ماحسيت بتحسس او جفاف زايد لان بعض الغسولات تجفف بشرتك بزياده هذا ماحسيت معاه بالجفاف ممكن لان وجود الزيوت في تركيبته ، كمية العلبه كبيره وراهيه تكفي مده طويله وكميه بسيطه من الغسول كافيه لوجهك كامل ، تقييمي له ممكن اعطيه ١٠/٧

 هل لازم يكون عندك ! امممم لا عادي أي غسول انتي مرتاحه عليه يكفي 

> سنفرة للوجه [ سعرها في الموقع ٢٠ دولار ] :

تستخدم ٢-٣ مرات اسبوعيا بعد ماتغسلين بشرتك تحطين السنفره وتسوي مساج بشكل دائري لكل وجهك مده دقيقه بعدها اتركيه عليك مده ٣ دقايق واغسليه ، لـ حب الشباب و جفاف الجلد والشوائب . .

تتكون من ~ القهوه وزيت جوز الهند واللوز وبذور العنب بالاضافه للطين الابيض والعسل 

. . [ تجربتي لسنفرة الوجه ] . .

أستخدمه كل يومين تقريبا اسنفر وجهي قبل ما انام ، اكثر منتج حبيييييته حبييييييته من المجموعه ، يسنفر الوجه من قلب وينظف حسيت ودي استخدمه كل يوم بس ماينفع ، لما اوزعه على بشرتي واسوي مساج دائري خفيف واتركه دقايق طبعا وهو في وجهي حسيت بنغزات او لسعات في بشرتي ماعرف ليه ! ، بعدها غسلت وجهي واختفت هذي اللسعات بس شويه احمرار في وجهي عند جهة الخد لدقايق وبعد الترطيب يختفي ، جد من زمان مو مستخدمه سنفره للوجه وجات هذي في وقتها حسيت بنظافه وانتعاش تحسين الوجه يتنفس واذا عندك ماسك بارد مثل ماسكات Lush حطيه بعدها يبرررد عالبشره وانتعاااااش مو طبيعي راحه فعلا، والحلو في المجموعه هذي ماتجفف البشره حيل لان فيها زيوت وايضا الكميه وحجم المنتج يجنننن ويدوم معاك لان ماتحتاجين كميه كبيره ، وتقييمي لهالمنتج ١٠/٩

هل لازم يكون عندك ! بالنسبه لي اي وبس يخلص ناويه اشتري عليه ان شالله لان جد السنفره مهم اسبوعيا تنظفين فيها بشرتك . . 

> مرطب الوجه [ سعرها في الموقع ٢٢ دولار ] :

يستخدم مرتين صباحا ومساءا على بشره نظيفه ، تحطين كميه بسيطه وبحركه دائريه توزعينها على بشرتك . .

تتكون من ~ حبوب القهوة و زبده الكاكاو والشيا ايضا فيتامين إي و زيت جوز الهند واللوز

. . [ تجربتي مع مرطب الوجه ] . .

يوميا استخدمه قبل النوم بعد مااحط سيروم كيلز ، كميه بسيطه جدا تغطي الوجه كامل ، كـ مرطب يغذي الوجه ويرطبه جيدا جدا ، محتوياتها تحمس الواحد له من فيتامين إي وهو معروف يعطي حيويه ونضاره للوجه والشيا اكيد ترطيب ونعومه ، بشكل عام ترطيبه حلو وناعم عالبشره يمكن مالاحظت زياده فيه لاني استخدم اشيا ثانيه معاه ، بس خفيف عالبشره بسرعه تتشربه ويتوزع بسهوله ويرطبها وريحته جيده . .

وبس هذي كانت تجربتي الشخصيه مع المنتجات

ولاحظت ان مافي بلوقر عربيات جربوها فـ ان شالله فادكم هالريفيو ولاتنسون تعليقاتكم هنا وبالانستقرام لانها السبب الاول والاخير لاستمراريتي 

وشكر خاص لصاحبه حساب ( @posh_q8 ) 

على هذي الهدية الجميله 

واشوفكم على حب ❤️