A few of my favorite things #2

السلام عليكم ورحمة الله ،

موضوع الكل اتوقع يحبه وينتظره من كل البلوقرز وهي المفضلات لـ هالشهر أو لـ هالفتره هذي لأن صعبه أكتب كل شهر عن مفضلاتي بالغالب بتكون نفسها ومتكرره فـ الاحلى اني بين كل كم شهر أجمع لي أفضل منتجات أو أشياء حبيتها وأكتب عنها

مفضلاتي لهذي الفترة ❤️

❤️ بي بي كريم من بينفت 

هالكريم عجييييب من أحلى الأنواع اللي أستخدمتها توزيعه سهل ويتجانس مع البشره بطريقه حلوه وملمسه مخملي والفينشنق ماله مات مطفي انا بشرتي مختلطه اقرب الى الدهنيه حسيته في المناطق الدهنيه مثل الانف زين مااحتاج احط فوقه بودر عشان اثبته ، وحاليا قرب يخلص احتمال كبير أرد أشتريه بس بعد ماأخلص كمية البي بي كريمات الهاااائله اللي عندي سعره تقريبا ١٤دك مو ذاكره عدل . . 

❤️محدد شفايف Soar من ماك

انا مو من عادتي استخدم محددات او اشتري ابدددا مااحب المحدد بس مره شفت لون حلو على وحده وسالتها قالت هذا محدد شفايف من ماك قلت متاكده مو روج قالت لا بس محدد كان اللون رهيييييب وعلى طول رحت وشريته وانا من ذاك اليوم الى الان واااقعه في حب هالشي اللون رووعه ويعطيك لون واضح لشفايفك مايحتاج روج فوقه وبالغالب شفايفي تكون جافه فأستخدم مرطب بعدها استخدم المحدد يطلع أحلى سعرها بحدود الـ ٨دك اتوقع . . 

❤️عطر طرحة العروس من دار الطيب 

بتصدقوني لو اقولكم هذي العلبه الـ رابعه من العطر ؛)) أعشششق هالعطر الرييييحه مو طبيعيه راااقيه ورسميه هي شرقيه بس خفيفه جايه على فرنسيه شوي وهالعطر أنصح فيه العرايس شي فخخخم وناعم فعلا موقادره اوصف لكم جماله لاااازم تجربونه والأحلى ان سعره بـ ٢٠دك بالنسبه لريحته يستاهل اكثر . . 

❤️عطر قلامور من فكتوريا سيكرت 

عطورات الجسم عند فكتوريا سيكرت أغلبها جميله اذا مو كلها بس هالعطر أحلاهم هو مع واحد ثاني موذاكره اسمه قبل فتره كان عندي وانتهى حلوين بعد ماتاخذين شاور تبخين على جسمك تقريبا سعره ٨دك . . 

❤️جاكيت أبيض وأسود 

اعتذر ناسيه اسم المحل ، هالجاكيت شريته للسفر الحلو فيه فري سايز فضفاض قصته كلوش من عند الصدر والاكمام وسيعه موديله قصير شوي من قدام وأطول من الخلف جدددددا حبيييته من لون وموديل وكل شي عملي ويدفي وشكله راقي عاللبس يمكن مايبين عدل بالصوره بس باللبس شي جمييييل سعره بـ ٣٤دك . . 

❤️بجامتي الكيوت من H&M

أحب البجامات الكيوت واللي عليها رسومات " بعيدا عن الحلال والحرام " بس أحب هالبجايم وبالذات هاللون الرمادي أعششششقه مع الابيض خفيفه ناعمه وبارده لاني انا توهقت هنا جهزت للسفره كله لبس شتوي بس بالسكن داخل حررر مشغلين التدفئه فالجوو حار وماتحملت لبسي رحت وشريت هالبجامه من اتش اند ام في براغ سعرها رخيص ماكان غالي تقريبا ١٠دك . .

❤️شوز سبورتي 

من ذاكره اسم المحل في الكويت " ذاقيت مول " كان للشوزات اول ماشفت الشوز طار عقلي من جماله حسيت اني احتاجه بالسفر والحلو فيه كعب بسيط والاهم انه جدددا مريح باللبس والمشي لمسافات طويله ، طبعا كان في اكثر من لون من اسود وسلفر وقولد وزيتي بس اخترت هاللون مادري شنو لونه بالضبط تعطينه على زيتي على نحاسي لامع شي من هذا القبيل سعره بـ ١٥دك . . 

❤️سليبرز ميكي 

العشق ميكي مااقدر اقول الا انه كيوت وجميل . . 

❤️خمرية من الجزيره للعطور 

مثل العطر او دهن العود تنحط ورا الاذن والشعر تعطي للشعر ريحه فواااحه تجنننننن تناسب المتزوجات والريحه ثابته وحلاتها بعد الشاور تحطينها على شعرك من ورا وتتبخرين سعرها اعتقد بـ ١٠ دك . .

❤️شنطتي الصغنونه من Guess 

احتجت بالسفره شنطة صغيره عمليه ناعمه وكنت في البدايه ماخذه معاي وحده قديمة كانت عندي بس كبيره شوي وسافرت فيها وبعدها شفت هالشنطه في براغ من محل قيس سرقة قلبي الوانها واخذتها حجمها مناااسب وخامه الشنطة قاسيه ماتتكفس او تموت اذا مافيها اغراض بالداخل لاتتمت واقفه مثل ماهي وحتى الوسخ صعب يلصق فيها خامتها ماعرف شنو بس عارفين القاسي ملمسها كانها حجر سعرها تقريبا ٤٠دك . . 

❤️أسواره من Guess 

احب احط اساور في اليد اللي فيها الساعه تعطي شكل يجننننن وهذا السوار خذيته ايضا من براغ هاللون غرامي بنفسجي مع السلفر طالعين يجنننووون وهي عمليه ومريحه وتنفع للاستخدام اليومي كان عليها خصم صارت بـ ١٥دك . . 

❤️زيت جونسون للاطفال

هالزززيت المفضل لعندي لعدة شهور مااستغني عنه رغم اني اعرفه من زمان بس ماجربت استخدمه كنت اكتفي بالمرطبات البي عندي بس لما فكرت اجربه ندمت اني مااستخدمته من زمااان ترطيييييبه جدددددا قوي ويخلي بشرتك مثل الاطفال ناعمه وملمسها رطب . .

وبسسسس

هذي مفضلات حاليا ان شالله عجبوكم واستفدتوو من بعض الاشياء 

وآشوفكم على خير ❤️