Review : Midnight Recovery Concentrate | زيت الليل من كـيلز

السلام عليكم ورحمة الله ،

العنايه في البشرة وماأدراك ما العنايه :( جد أتأزم نفسيا لما تجي فتره ماأستخدم شي أحس أني مقصره في حق نفسي ودايم أحس ان بشرتي بتخرب وبتصير سيئه ، رغم اني طول فتره حياتي ومراهقتي مااستخدم شي ابددددا لبشرتي مو لأنها بيرفكت وممتازه لا بس لان اهتماماتي كانت رايحه باتجاه أخر تماااما سابقا كنت أذا بهتم في بشرتي وبحط شي على وجهي طبعا بعد ما أمي مسكينه تترجاني أهتم بنفسي حدي أذا اهتميت حطيت فازلين :$ هذا أقصى ماعندي ، طبعا الحمدلله عديت هالمرحله من حياتي من قريب بس لما تخرجت من الكليه حسيت أني لا أنا لازم أهتم بنفسي خلاص انتهت مرحله الطفوله والاهمال بالنسبه لي وأيضا أهتماماتي تغيرت كليا من وقتها بدأت رحلتي في البحث عن أفضل المنتجات للبشره وأحب أشوف شنو البنات يستخدمون واشلون طريقتهم بالاهتمام

في البدايه ممكن يكون تخبط ماتدرين هالشي يناسبك او لا لاني كنت أقلد البنات وهذا شي خطأ لان كل بنت تختلف عن الثانيه وأسوي بحث في النت وبعدين أقرأ وأتثقف عن البشره وأسرارها وبديت أعرف لنفسي شوي شوي بس فيني طبع الكسل إلى الآن مسيطر فيني خصوصا لما فجأه يجيني حماس وشغف العنايه وأشتري منتجات تكفي لـ ١٠ بنات وأخر شي اتعب من كثرهم وما أستخدم ولاشي فيهم ، عشان هالسبب قمت أتركد وأهدي من نفسي شوي وعرفت اني شخص كسول وماأحب أستخدم منتجات كثير ، فحاولت أبحث عن منتج جيد ويغنيني عن أستخدمات منتجات أخرى ، وأجرب منتج إلى نهايته بعدها أشوف عجبني ناسبني أو لا وأنتقل لمنتج أخر بعده . . 

منتج اليوم أو ماركة اليوم بالذات كانت في خاطري من مده طووويله بس للاسف هالماركة مو متوفره عندنا في الكويت كانت موجوده سابقا في الـ ٢٠٠٨ اعتقد بس بعدها اختفت وانشالت ماعرف شنو الاسباب صراحه . .

اللي كان محمسني لتجربة هالماركة أنها متخصصه للعنايه وكل من جربها يمدحها أو عالاقل مايذمها وقريت تدوينات كثيره عنها جدا مشجعه صراحه ، طبعا الحمدلله اسمحت لي الفرصه وأنا هنا بالتشيك لتجربتها طبعا أنا حصلتها في مول في مدينه ألمانية #دريزدن بجانب التشيك 

❤️معلومات عن الماركة 

كيلز شركة أمريكة تأسست في نيويورك في سنة 1851 وجميع وصفات الأدوية متوارثة جيل عن جيل ، وطبعاً تتميز بأن منتجاتها تعتمد على الأعشاب والطبيعة بصورة أساسية 

وتقدم لكم أفضل منتجات للعنايه في البشره والحسم والشعر . . 

Midnight Recovery Concentrate

هو أكسير نباتي فعال لاحتوائه على مشتقات طبيعية المنشأ بنسبة 99.8 % ، فيعمل طوال الليل على تجديد بنية البشرة وإصلاحها وتجديد حيويتها للتألق ببشرة أكثر شباباً عند الصباح. ويُعرف مزيج الزيوت النباتية الأساسية المجددة بخواصه العلاجية والموازنة والمضادة للأكسدة، ويعمل خلال الليل أثناء نشاط البشرة الطبيعي لإصلاح البشرة بشكل كبير حين يحل الصباح ، فهو يجدد صحة البشرة بفعالية بين عشية وضحاها، ليمنح بشرة أكثر نعومة وتألقاً عند الصباح ويعد من بين أفضل منتجات البشرة في العالم . . 

❤️ مكونات الزيت حسب ماهو مذكور بالموقع

- يعد زيت زهرة الربيع فعالاً في إصلاح حاجز البشرة وتعزيز إشراقتها. 

- يساعد زيت الخزامى الأساسي على تهدئة البشرة الملتهبة أو المتهيجة بينما يساعد على تقليل ظهور البقع الداكنة ليتسق سطح البشرة بصورة أكبر بينما تتألق بلون أفتح وأكثر إشراقاً. 

- السكوالين عبارة عن دهون نباتية شافية مع ألفة عالية مع البشرة لترميمها وتجديدها على الفور . . 

❤️طريقة الأستخدام 

زيت للاستخدام اليومي ليلاً | ممكن استخدامه كمحلول تقليدي منشط للوجه من خلال تطبيقه فوق البشرة بقطعة قطن . . 

طبعا هذا حسب ماهو مكتوب في الموقع لكن موظفه المحل تقول طريقة استخدامه على بشره نظيفه بعدها في راحة يدك حطي نقطتين فقط من الزيت ووزعيه على بشرتك عن طريق الطبطبه مو تمسحينه مثل كريم المرطب لا بس تطبطبين على وجهك بعدها روحي نامي . . 

❤️تجربتي للمنتج مدة شهر من أستخدامه 

اول شي أنا بشرتي مختلطه مايله للدهنيه ، أغسل وجهي بصابونه بابايا بعدها مثل ماقالتلي الموظفه أحط نقطتين وأطبطب على وجهي بعدها للامانه مااستخدم كريم ليل اكتفي بالزيت فقط وماظن هو مطلوب اساسي نحط كريم بعده ، استخدمته كل ليله يمكن بس ٣ ليالي فوتته ونسيت ، المهم ٣ يوم أو ٤ يوم من أستخدامي للزيت طلعت لي حبتين بالجبهه كبااار :$ ماعرف شنو السبب هل هو من الزيت أو من تغير هرمونات لان انا بشرتي مافيها حبوب فقط منطقه الجبهه وممكن تطلع حبه كبيره أو أكثر حسب النفسيه والمزاج لان اتوقع بشرتنا تتأثر بالمزاج وبالهومونات والنفسيه فما أعرف اذا كان للزيت علاقه أو لا ، وبعدها باسبوع خفت الحبوب الكبيره شوي . .

بالنسبه لـ رأيي بعد شهر من الاستخدام أنا حبيييت المنتج أولا المنتج جدا خفيف زيته مو المزعج أو اللي يلمع لا بمجرد ماتطبطبين تحسين انها تشربته البشره لان الكميه بسيطه وفوق هذا لما اصحى الصبح أحس بنعومه في بشرتي ، المنتج يعد بالنعومه وتجديد البشره وازاله التصبغات وبالنسبه للتصبغات انا فيني شوي احس لون بشرتي مو متوحد مادري اذا هذا اللي يعنونه بالتصبغات بس حسب ماعرف عندهم منتج ثاني متخصص لتوحيد اللون وناويه اشتريه مع كم شغله عندهم ، أنا كسوله شوي وماحب الحوسه وكثرة المنتجات اللي استخدمها وهذا ناسبني لسهولة استخدامه وعلبته شكلها جمميييل جدا ويجي على شكل قطاره تضغطين عالمنتج وينزل وكميته راهيه وتكفي مده طويله لان نستخدم بس نقطتين منها كل يوم ، طبعا متحمسه أكمل فيه وان شالله أشوف نتايج أفضل وأوضح . . 

سعر المنتج 40€ يورو بحدود الـ 13KD 

وبس

آشوفكم على حب ❤️