فضفضة ~ مرحلة المراهقة | فضايح و آخطاء و نصايح

السلام عليكم ورحمة الله ،

دايم مواضيعي أغلبها موجهه لجيل العشرينات أو منتصف العشرين وظلمت المرحله العمريه إلي أصغر بسن المراهقه فهذي التدوينه لهم ان شالله ، هي تدوينة فضفضه بسيطه اتكلم فيها عن مرحله عمريه سابقه تخطيتها من سنوات قليله وكانت فيها بعض الاخطاء والسذاجاات البسيطه ممكن تفيدكم وتتعلمون منها ومن أخطائي في مرحله المراهقه والثانويه واشلون انتقلت بين المرحلتين ربما مايكون بشكل مفصل لكن لنقول روؤس أقلام ممكن تعطيكم أفكار أما اللي بعمري في منتصف العشرين وأكبر بس أضحكوو وتطمشووو :d

في البدايه خلوني أتكلم عن تجربتي ومرحله المراهقه بالنسبه لي طبعا هي فتره ابدا ماحبيتها في حياتي ربما حبيت عفويتها وطفولتها لكن في أمور ثانيه ماحبيتها من شخصيه و ستايل أو شكل . .

هالمرحله صعبه لكل بنت لانها تكون مابين الطفوله والنضج كـ إمرأه فيها أحس تخبط ربما وقتها ماأدركت هذا التخبط لكني الأن ولما أتذكر هذيك الايام فعلا فيها تخبط كثير ، كنت بنت ماعرف لنفسي ابدا وذكرت لكم سابقا ان ماكانت عندي سوالف البنات في العنايه والاهتمام كانت توجهاتي كلها لعب و خرابيط ماكنت اهتم في شكلي كان الستايل أو الشكل اللي اعتمده هو ستايل الـ امريكي اللي يسموون " الـ ستريت ستايل " اللي كأن لبسي أشبه في الاولاد اعتمد كنت على الجينز في كل يومي عارفين الجينز الوسيع اللي في فتحات وكأنه مونظيف " الـ ديرتي جينز " وتي شيرت واساور وسلسال خيط يكون وكان شعري قصير مابين البوي الطويل شوي والكاريه ، كنت مو عارفه شنو أبي فكان هذا أريح خيار وستايل ممكن اعتمده ماكنت أحب الاشياء الضيقه مثل الفساتين ماأحب الشعر الطويل المزعج حتى بالميكب ماكنت اعرف استخدمه اصلا ما كان عندي ميكب بس عندي قلوس الشفاف او اللي يجي لونه فاتح هذا كان أقصاي بالميكب ، ماكانت اهتماماتي ابد بالكشخه والزكرته ماكنت حتى أحب قعدات الحريم والجمعات اللي تصير لانها تحتاج كشخه وأنا ماحب هالشي ولا أعرفله . .

بعدها كبرت شوي وانجذبت لمراهقات الاجانب المشهورات مثل " هيلاري ديف | سيلينا غوميز | ليندسي لوهان " وهنا الخطأ الاكبر لاني كنت ابي اقلدهم في ستايلهم ولبسهم وهذا الشي مستحيل لان تربيتنا وعاداتنا ماتتماشى مع هاللبس رغم اني زعلت من هالعادات وحسيت اننا مظلومين في اللبس ومحتم علينا لبس معين مانبيه طبعا سويتها مناحه ذاك الوقت فعلا تصرف طفولي مني ، وغير مساله اللبس في ايضا ان هم يختلفون عني بكل شي يعني لاتركيبه جسمي مثل أجسامهم لان تفاصيل أجسادنا كـ عرب بشكل عام تختلف عن الأجانب أيضا لون البشره هذي الاشياء ماكنت أفهمها وكنت أعتقد ان أحنا مانقدر نكون ستايل وكوول وناعمين بنفس الوقت إلا اذا لبست مثلهم ، هالشي يمكن فهمته بعدين لما عديت هذي المرحله والسبب التفتح الكبير اللي صار ماشالله في العالم الافتراضي والكل صار يقدر يدخل عليه من كل مكان وكل زمان ، هذا الشي ماكان مسموح لي في وقت سابق أنا أسمحولي أهلي أستخدم الانترنت سنة ٢٠٠٦ متخليين كانو يسمحون لي ادخل عليه ساعه وحده باليوم بشروط طبعا :$ اما الحين ماشالله حتى الطفل اللي عمره سنتين عنده أيباد ونت ، فـ اقولكم النت والسوشيل ميديا ساعدوا كثيير بنات يتعلمون لنفسهم ويتثقفون ويعرفون اخر الصيحات للموضه واخر المنتجات والجديد في عالم الجمال وهي في غرفتها ، كثييير صرنا نشوف بلوقرز ويوتيوبرز في كل مجال تحبينه يعلمونك عن الازياء اللي تناسبك والميكب والمنتجات وكل شي ، من أكثر الأشياء اللي ثقفتني هي الأطلاع على مثل هالأشياء وتعلمت منها كثير بدايةً كانت المنتديات بعدها المدونات واليوتيوب ، من الأشياء المضحكه ان نزل علي الوحي فجأه وقت خلاص من هاللحظه ببدأ أهتم بنفسي وببشرتي ورحت وشريت كريم ترطيب من olay هو كريم ثقيل شوي وماكنت اعرف حتي اشلون الناس تحط كريم فقمت وخذيت كميه راااهيه من الكريم في يديني وحطيته في وجهي ووزعته المشكله ان الكميه كبيره والبشره ماقدرت تمتصه ووجهي صار قناع ابيض وجايه قاعده وسط اهلي بكل ثقه يعني ان البنت المهتمه ويسألوني هذا شنو اقول كريم ترطيب :) طيب لييش ابيض وجهك مسحيه عدل ! قلت لا هو هذي طريقته :€ وقعدت انتظره يختفي شوي يروح الابيض هذا ماكو فايده اخر شي خذيت منديل مسحته وزعلت ورديت على فازلين أمي والله إنه أزين هههههههههه 

جد النت والأطلاع غير شخصيتي كثييييير من الداخل والخارج تغير شكلي من عام تقريبا ٢٠١٠ بديت أهتم فيني كـ بنت بشكل صحيح حسيت خلاص حان الوقت اني اهتم في نفسي وأعرف أحلي نفسي لان الناس خلاص بدأت تنظر لي كـ بنت ناضجه ينتبهون لوجهي لشعري لـملابسي مو مثل الاطفال لو كانت وش لابسه محد ينظر لها أو ينتقدها  ، بديت اتعلم الميكب لانه كان عقده بالنسبه لي كان كانه مسأله كيمياء شنو الفاونديشن شنو الكومباكت مصطلحات معقده شوي شوي بديت أشوف فيديو تسوي ميكب واطبق كانت كوارث في البدايه ومرات اذا ضبطتها بس تطلع بشعه علي ماتناسب وجهي ومع الممارسه وتجربة اكثر من مره واكثر من ستايل وشكل وكنت كل مره اجي لأمي واقولها شرايك ؟ في الغالب مايعجبها بس تقول ماعليه جربي وغيري إلى ان عرفت شنو اللي حلو على وجهي وعيني وناسبني ، طبعا هذا مايجي بيوم ولا بشهر قعدت سنة ونص وسنتين وانا على هالحال بالذات ان موضه المكياج اختلفت قبل كانت الموضه فووول ميكب و رسمة العين الصقر وميكب ثقيل حاد الحين الحمدلله اتجهنا للبساطه والنعومه . .

في خطأ كبير ايضا صار معاي واتوقع كثير بنات صارت معاهم وهي لما بديت أتعلم ميكب واشوف وكل لوك كنت اشوف اليوتيوبرز يسوون اروح اشتري نفس المنتجات اللي استخدمتها في الفيديو ! انتو متخيلين كميه الميكب اللي شريتها مع كل فيديو اشوفه ، !! المشكله طااح بكبدي كله هالميكب عندي وانا للحين ماعرفت اتمكيج عدل شريت نفس الفونديشن مالها ونفس درجتها انتو متخيلين !! هذي سذاجه مني لاني بعدين توهقت في امور مثل درجة الفاونديشن ابدا ماناسبتني ومسالة البشره دهنيه او جافه او مختلطه هذي ماكنت اعرف عن بشرتي شي وهذا غير كميه فرش ماعرفت استخدمها الى الان بيني وبينكم مااحب استخدم فرش كل شي اسويه بأصبعي :d وغير هذا لما اروح مثل سيفورا تجيني الموظفه وتلعب على مخي وتدفعني مبلغ وقدره على اشياء انا ماابيها ولا استخدمها بس لاني وقتها كنت صغيره كنت استحي تقولي شي الموظفه ومااخذه فكل ماقالت شي خذيته وهي اكيد هذي وظيفتها لازم تروج للمنتجات اللي عندها وهي وشطارتها في الاقناع بس المشكله كانت فيني وفي خجلي مع ان المفروض مافيها خجل بس الحين اول ماتجيني الموظفه اقولها خليني براحتي مااحب اشتري وأحد فوق راسي يتكلم ويشتتني ، ،

 المهم لكل بنت تبي تشتري ميكب وتتعلم انتبهي من هالسالفه لاتجمعين منتجات وانتي بغنى عنها ومو كل ماشفتي فيديو شريتي الادوات اللي استخدموها بالميكب ، عندك اساسيات معروفه هي اللي تحتاجينها بالميكب والباقي خليها بعدين لما تحسي انك صرتي متمكنه وفاهمه اشتري على كيفك لان الخبيره لها ادوات بالميكب والمبتدئه لها ادوات فكل مستوى يختلف ، طبعا كتبت تدوينه سابقه عن هالموضوع بإسم ( اساسيات الميكب 10points to buy makeup ) اذا كنتي مبتدأ ومو عارفه شنو انتي محتاجه تشترين ميكب . . 

اما اللبس أيضا حاولت أجرب ستايلات على جسمي واشوف اللي يناسب لان شكل الاجسام تختلف واحيانا بعض موديلات الملابس تبرز اشياء سيئه بجسمك واحيانا ماتكون فيك هالاشياء بس الموديل اوحى ان مثلا عندك كرش كبيره وتظلمك في اللبس جربت كل شي وكل موديل " طويل | قصير | ضيق | وسيع | فستان | بنطلون | تنوره " الى ان عرفت الشي الحلو واللي ارتحت له ، لا تقولين ستايل ولبس فلانه حلو ابي مثله كل وحده فيها لها ستايل يمكن مايركب على احد غيرها ، انتي اخلقي ستايل ولبس خاص لنفسك بس قبل هذا أعرفي نوعية جسمك في التصنيف هو جسمك " شكل الكمثره | الساعه الرمليه | التفاحه | المثلث المقلوب | الموزه " أسماء ممكن تضحك شوي بس مهمه أنك تقرين عنهم وتعرفين انتي من ضمن أي تصنيف عشان تعرفين اللي يناسب جسمك وايضا كثير فيديوهات عاليوتيوب ومقالات في النت يساعدونك من هالناحيه اذا كان جسمك شكل الكمثره فيعطونك اشياء تناسب هذا الجسم ويقولون لك الاماكن اللي تخفينها واللي تبرزينها ، غير هذا في البدايه خليك في الـ safe side يعني الجهة الآمنه في كل شي في البدايه من ناحيه الميكب واللبس يعني لاتشطحين وتسويلك ستايل جاي من الفضاء خليك في الطبيعي والمتعارف عليه وبعد لاتشتطين زياده في الاهتمام وتشترين كريمات عنايه لليد وللرجل والصباح وللمسااء وقبل النوم وبعد النوم لااااا انتبهي لاياخذك الحماس في البدايه بعدها من كثر الاهتمام وكميه الكريمات تزهقين وتملين وتتركين كل شي ، الاهتمام حبه حبه من الصفر تبدئين في كريم واحد او اثنين فقط مده اشهر بعدها زيدي كريم معاهم شوفي نفسك لما تتعودين على الروتين الجديد والعنايه . . 

هذرتي طوووووويله اليوم ادري بس الموضوع كبير ومتشعب حاولت اختصر وأعطي الموجز والمهم كنقاط ❤️

وأخر شي بذكر لكم بنات يعجبني ستايلهم من لبس وميكب وممكن يفيدكم وتتعلمون منهم 

On #instgram 

@daneeda_t 💜 أزياءها جميله صحيح مو متحجبه بس لبسها محتشم أحب ستايلها وشخصيتها عسسسل 

@dalalid بلوقر تعلم ميكب وتعطي ريفيوهات عن منتجات وعندها قناة باليوتيوب ايضا لبسها محتشم بسيط 

@carlibel بنت اجنبيه عليها فيديوهات ميييكب رهييب احب دايم اشوف مكياجها باعتقادي هي اجمل اجنبيه تسوي مكياج وايضا عندها حساب ثاني للازياء بس مايناسبنا انا بس اشوف ازياءها من باب الألهام وممكن تعطيني أفكار لتنسيقات معينه 

@igorgeousta @amiraa88 ايضا شيوم وأميره ينزلون بس فتره والثانيه تنسيقات ولااا أحلى صحيح قليله مواضيع التنسيق بس لما ينزلون شي ذوووق

وبس

آشوفكم على حب ❤️