روتيني الجديد في عنايتي بوجهي و جسمي

السلام عليكم ورحمة الله ،

كل بنت لازم تعتمد على روتين معين تتبعه للعنايه في بشرتها ، والروتين هذا مو شرط يكون مثل فلانه لا انتي اخلقي الروتين اللي يناسبك انتي تعرفين لنفسك ولوقتك سويلك جدول بسيط تمشين عليه مده اقل شي شهرين حتي تشوفي نتايجه ايجابيه كانت أو سلبيه بعدها تقدرين تسوين تغييرات كليا او جزئيه لروتينك تحطين منتجات جديده تجربينها او تشيلين منتجات ماحبيتيها او حسيتيها اثرت عليك سلبا . .

قبل فترة كتبت لكم عن روتيني للعنايه في بشرتي وإلي اتبعته تقريبا شهر ونص بعدها اضطريت اسافر وماخذيت كل اغراضي من باب اولا ان ماكان عندي الحيز الكافي اني اشيل كل احتياجاتي ثانيا قلت من باب التغيير ممكن اشتري هناك منتجات اجربها واتبع روتين مختلف قليلا . . 

هذا روتيني الجديد للعنايه في بشرة وجهي وجسمي منتجات سامعه عنها سابقا وقلت اجربها دامها توفرت عندي الآن ، طبعا قبل كل شي الروتين او عنايتك في بشرتك ماتتبع قوانين معينه لك كامل الحريه في الاختيار من منتجات وعناصر كثيره او قليله ، انا ما احب الحووسه الزايده لاني ازهق وملوووله بسرعه عشان هالسبب روتيني بسيط مافيه تكلف بأمور كبيره يمكن لما تقرونه بتحسون حووووسه وطويله ومتعب بس بالتطبيق ابدد سهل وبسيييييط لابعد حد ، وانتي هنا مو مجبوره على انك تشترين مثل منتجاتي لا ممكن بس تاخذين فكره عن أسلوبي في العنايه واذا عجبك انتي طبقيه بمنتجات متوفره عندك ، وطبعا لي حاليا اسبوعين من اتبعت هذا النظام او الروتين للعنايه وان شالله اذا شفت نتايج حلوه كتبتها لكم في بوست قادم . . 

عنايتي في بشرتي وقت الصباح ❤️

أولا : كل صباح لما أصحى من النوم أغسل وجهي في صابونه عشان انظف وجهي وأهيأه للكريم لان اذا وجهك فيه بقايا ميكب أو بشرتك دهنيه مانظفتيها ماراح تكون قادره على امتصاص الكريم | عندي حاليا صابونتي خذيتها معاي من الكويت وهي صابونة البابايا مشهوره والكل اتوقع يعرفها تحصلينها عند الحواج والاماكن البسيطه هذي وسعرها يمكن ١/٢ دك بس تجننننننن تحسين بنظافه من قلب وفوق هذا تساعد على تفتيح البشره . .

ثانيا : لـ منطقه العين ولأني اعاني من سواد تحت العين بسبب السهر والتعب نصحتني موظفه " كيلز " باستخدام هذي المنتجات 

( اللي عاليمين لتحت العين واللي عاليسار لكامل الوجه )

LINE-REDUCING EYE-BRIGHTENING CONCENTRATE

صممت التركيبة بتراكيز عالية مع نسبة 10.5٪ من فيتامين C النقي (إل-حمض الأسكوربيك) فإنها تحد من ظهور الهالات السوداء تحت العين، ما يساعد على تفتيح منطقة العين ومنحها إشراقة نضرة ومع الاستخدام المستمر يساعد مستحضرنا على معالجة بعض أكثر علامات شيخوخة البشرة وضوحاً والتخلص من تجاعيد محيط العين وزاوية العين الخارجية . . 

هذا الكريم بمجرد ما اوزعه على منطقه تحت العين عن طريقه الطبطبه ياخذ لون كأنه كونسيلر وبنفس الوقت يعالج المنطقه الداكنه ويساعد على تفتيحها | يستخدم مره وحده في اليوم صباحا نقط بسيييطه جدا كافيه . . 

ثالثا : بعدها أحط فوقه على البشره بالكامل هذا الكريم

Powerful Strength Line Reducing Concent

تحتوي هذه التركيبة المركزة الفعالة على تراكيز عالية تصل إلى 10.5٪ من فيتامين C النقي (إل- حمض الأسكوربيك) المعروف بألفته الرائعة مع البشرة وقدرته القوية على تحسين مظهر شيخوخة البشرة وباستمرار استخدامه مع مرور الوقت، يتمتع هذا المستحضر بتأثير مذهل وتدريجي على الخطوط الرفيعة حول الشفاه وتجاعيد محيط العين بالإضافة إلى بقية تجاعيد الوجه والخطوط الرفيعة كما تبدي البشرة تحسناً ملحوظاً في ملمسها وإشراقها . .

أوزعه بيديني بشكل متساوي ومااحتاج كميه كبيره مجرد كميه صغيره تفي بالغرض وسهله في التوزيع وتمتصه البشره بسرعه ، هو بس مشكلته كأنه دهني الكريم احس وجهي يتلامع من الدهن ولما اجي احط فوقه فاونديشن احسن يلمع من الدهن اللي يطلع في الخد والجبهه والانف فاضطر اطبطب كل شوي عليه بالبودره ، مضطره اكمل في الكريم هذا لان الموظفه قالت راح تلاحظين نضاره وحيويه في وجهك وصفاء مع الاستخدام فحابه اشوف هالنتيجه | يستخدم مرتين في اليوم صباحا ومساءا على بشره نظيفه أكيد . .

عنايتي في جسمي وقت الصباح ❤️

بعد ما انتهي من وجهي انتقل لجسمي ومن اهم الاشياء عندي ان بشرة جسمي تكون ناااااعم ملمسها اكره لما مسامات الشعر احس فيها ابد ماحب هالشعور فألجأ دايم للترطيب وازيل شعر جسمي باستمرار مع ان شعري ماطلع كثير لاني مسويه ليزر 

أولا : منتج جديد شفته في محل دوغلاس وحبيت اجربه وهو مرطب جوز الهند كل صبح بعد ما اصحي من النوم أستخدم هذا المرطب واوزعه بجسمي بالكامل والبس ملابسي، رييييحه الكوكونت او جوز الهند قوووويه وواضحه جميل جدا ودك تاكلينها وناعمه مو الريحه المزعجه ابد ، ترطيبها متوسط مو العالي حييل شوي تحتاجين وقت عشان توزعينها بشكل صحيح لها ثقيله وصعبه التوزيع راح تصير معاك مثل الماسك الابيض فحطي كميه قليله عشان تقدرين توزعينها والبشره تمتصها بشكل جيد وممكن بعد دقايق تعيدي عليها طبقه ثانيه اذا تبين ترطيب اكثر ، واذا كنتي تبين ترطيب اكثر وبياض استخدمي كريم فيتامين سي معروف هالكريم بفوايده عالبشره من نعومه ونضاره ويفتح الاماكن الداكنه ، مرات انا احط كريم جوز الهند بعدها احط فوقه كريم فيتامين سي . . 

نقطة بديله | اذا كنت في عطله وماعندي طلعه ومشاوير استخدم زيت اللوز للجسم من لوكستان هالزيت مفيد وترطيبه قوي وريحته تجننننن بس عيب انه ياخذ وقت على ما تمتصه البشره لانه زيت فـ يبيلك تكوني قاعده ماوراك شي ، انا هالزيت عندي منه علبه صغيره جايني مع مجموعه جد جد حبيته و احتمال اشتريه رغم انه شبيه او مثل مفعول زيت جونسون اللي ايضا استخدمه فـ ممكن الاستغناء عن احدهم  ، اما اذا كانت بشرتك جاافه حيل انصحك تستخدمينه مرتين صبح وليل غذي بشرتك بالترطيب . . 

بعد ما انتهي احب استخدم عطر الجسم من لوكستان بريحة الزهر الياباني جمييييله ريحته ناااعمه ومنعشه . .

هذا بالنسبه لروتين الصبح ❤️ وكل نهايه يوم أحب أخذ شور يريحني بعد تعب النهار وارتاح نفسيا وانا نايمه بعد شور احس بسعاده طبعا بالشاور لك الحريه مره اكتفي بالشاور جل ومرات اسوي تقشير لبشرة جسمي ووجهي حسب المزاج ، وبعد ما انتهي من الشور تبدأ العنايه 

عنايتي في بشرتي وقت الليل ❤️

أولا : حاليا عندي عينه من كريم منتصف الليل لتحت العين من كيلز قاعده اجربه قبل اشتريه وعندي كميه من العينه جيده اني ممكن اشوف نتيجه عليها | يستخدم مره وحده بالليل قبل النوم عن طريق الطبطبه . . 

ثانيا : استخدم مصل او زيت منتصف الليل من كيلز وكتبت عنده تدوينه سابقه كنت وقتها استخدمه بروحه بدون روتيني هذا والى الآن مستمره فيه مع روتين يساعد على رؤيه نتايج أوضح ، الزيت خفيييف ماتحسين فيه تمتصه البشره بسرعه بعكس الكريم الثاني اللي دهني وهذا المصل او الزيت يستخدم مره وحده ليلا . . 

ثالثا : انتظر دقايق بعدها استخدم 

Powerful Strength Line Reducing Concent

اللي استخدمته سابقا في النهار واوزعه على بشرتي بالكامل 

اذا غسلت شعري استخدم لشعري وهو مبلل زيت الأرقان اخذ نقطه صغيره وامسحها بشعري بالكامل وامشط شعري عشان يتوزع الزيت طبعا ماتحسين بالزيت ابد ولا يلمع شعرك ولا شي ماله اثر باين ولا حتى ريحه وهذا اللي حببني فيه ، للامانه ما لاحظت فرق مع استخدامي له مع ان صارلي شهر ونص بس انا استخدمه مرتين بالاسبوع يمكن هو لازم يوميا بس انا صراحه ما اغسل شعري يوميا اصلا مو زين للشعر انك تغسلينه كل يوم يسبب تلف عموما مازلت مستمره عليه لان ماعندي بديل استخدمه ممكن اذا شريت شي جديد اجربه واستغني عن هذا الزيت  . .

أما لـ عنايتي في جسمي وقت الليل ❤️

أولا : استخدم زيت جونسون للأطفال على كامل جسمي وهذا من اجمل الاشياء اللي استخدمتها وتكلمت عنه مليون مره في السابقه فعلا ي بنات نعومه ونظافه وانتعاش خصوصا بعد الشاور وتكونين شايله كل شعر جسمك ومسويه سنفره خفيفه هنا تحسين بالنظافه فعلا وملمس كأنه بشره الأطفال بعدها استخدم بودره مخلوطه بـ مسك " صنع اليد " لمنطقه الأبط وسبريه للجسم من فكتوريا أو باث اند بودي وما انسى المسك السائله وتكلمت عنه في تدوينه سابقه مسك القرشي " مسك العروس و مسك العود ومسك الختام " في سفرتي ماجبت إلا اثنين من المسك العروس و العود وجد صرت ما استغني عنهم في مل مكان اروحله لازم معاي عليهم ريحه جناااااااان وفواحه لو حاطه نتفه تحسين ريحتها ماليه جسمك كله  ، اخذ نتفه واحط ورا اذني وخلف شعري واماكن النبض وبين الصدر ، ولاتكثرين لان المواد العطريه هذي ممكن تسبب لك سواد في بشرتك وأخيرا أحط كريم اليد من لوكستان بعدها ألبس بجامتي وأحلا نوومه وراحه نفسيه ❤️

صوره جماعيه :) 

وبس

ان شالله عجبكم الموضوع اذا عجبكم اتمنى اشوف ردودكم هنا و هناك في الانستقرام هذا هو الدليل ان التدوينه او التدوينات بشكل عام عاجبتكم لاتحرموني من تواصلكم وكلامكم الطيب

وآشوفكم على حب ❤️