يوم في حياتي | A day in my life

السلام عليكم ورحمة الله ،

حسيت أسم التدوينة كأنها أسم فيلم ههههههههه أولا كل عام وأنتو بخير ومبارك عليكم الشهر ❤️

موضوع جدييد جدا ما شفت بلوقر عربية طرحت هالتدوينه من قبل وسعييده بفكرتها وان شالله تسعدكم وتتعرفون من خلالها على يوم من أيامي في الغربه وتقريبا كل ايامي متشابهه هنا على نمط واحد اللهم اختلافات بسيييطه لاتذكر 

يوم في حياتي ~  

هي تدوينه تابعه نقدر نقول لسلسة تدوينات الفضفضه بس بطريقه مغايره اني أكتب لكم عن يوم في حياتي من اصحى من النوم الى نهاية النهار ووقت النوم ، فيها بتعرفون روتيني اليومي ، يمكن يجدها البعض شي مو مهم ويقول انا شدخلني بيومك بس للتنويه ايضا انا اكتب التدوينات هذي لنفسي كـ مذكره لي قبل ما أكتبها لكم :) شي أبيه يبقى لي ذكرى أرجع لها مع السنين 

اليوم " ١١/٦/٢٠١٥" 

صحيت الساعه ٨ صباحا بعد ما غسلت وجهي انتقلت للركن الصغير اللي حاطه كل البلاوي فيه من ميكب وكريمات وعطور إلخ إلخ . .

جهزت نفسي حطيت كريمات الصباح بعدها الميكب " كتبت عن روتيني الصباحي والمسائي لبشرتي في تدوينه سابقه " 

كـ ميكب صباحي أستخدم أشياء بسيطه أساسيه بالنسبه لي تعتمد على ( جل الحواجب ~ آيلاينر ~ بي بي كريم ~ محدد شفايف ~ بلشر ) مرات ممكن أحط ماسكارا بس بالأغلب ما أحط عشان مو حابه أتعب رموشي . . 

يجي وقت الفطور بالغالب اذا كان معانا وقت سويت فطورنا ( بيض و فاصوليا ولبنه وزعتر وأجبان ) أما اذا تعبانه أو مافي وقت أكتفي بالتوست أو صمون أحشيها جبن وزعتر مع كرك سريع التحضير 💜 أنا ماخذه الكرك كميات كبيره معاي من الكويت يجي على نكهتين أما الزعفران او الهيل أنا أحب الاثنين ماعندي مشاكل نكهاتها جدا طيبه رغم ان الكل يقولي لو تجربين الكرك الأصلي راح تكرهين هالشي ، بس ماعليه شي طيب هذا بعد وسهل وسريع التحضير . . 

اطلع مع زوجي نخلص الاشغال بعدها نرجع البيت خلاص هلكانين أغدي طفلي بعدها أدخله ينام ساعه ونص تقريبا مو أكثر عشان بالليل ينام مبكر مايسهر ، بعد ماينام هنا يجي وقتي أنا طبعا ما أتغدى اكتفي بالتشيبس والعصير وممكن أسويلي قهوه وكيك وبس هذا يشبعني ، أحاول في هالوقت أنجز اموري الخاصه من مواضيع للمدونه او اسويلي عنايه ممكن احط ماسك لوجهي ممكن ادخل عالواتس اب و التويتر و الانستقرام وأشيك على الكل بس بالغالب احب ارتاح وانسدح في هالوقت ، في السابق كانت نومة الظهر شي ما أستغني عنه أبد لازم أنام وألا راسي يصدع  بس من جيت هنا خلاص تعودت ما انام مع انه شي متعب صراحه بس أحسن لي عشان الليل ما اتاخر بالنوم . . 

القهوة وما أدراك ما القهوة طبعا اللي يتابعوني بالانستقرام بيشوفون من كثرة صور القهوة اني من عشاقها بالذات القهوة العربية كل ظهرية بعد ماينام طفلي أحب أعدل راسي بالقهوة مع كيك أو اي شوكليت ، طبعا القهوة العربية أنا جايبه معاي تقريبا ٣ كيلو او اكثر شوي من الكويت وحاليا لي هنا بالتشيك ٣ شهور ونص حسيت ان القهوة بدأت تخلص عندي فـ تلاحقت الوضع وشريت مكينة القهوة اللي تسوي القهوه الامريكية والكابتشينو والكافي لاتيه اختاري كبسولة القهوة اللي تناسبك وسويها بكل سهولة ، انا افضل الكابتشينو أكثر شي صراحة و صرت أسويه هالفترة عشان أحاول امسك نفسي عن القهوة العربية وماخلصها ، بس والله شي حلوو هالمكينة تفك ازمات وسهلة حتى لما يجيك ضيوف تقديمها حلوو وذرب وسريع وتلبين احتياجاتهم ، رغم اني مازلت غير مقتنعه فيها لان ليه اشتريها طيب انا اذا ابي كابتشينو أروح أطلبه برا وأتقهوى وأغير جوو بس ممكن اللي ماتقدر تطلع دايم أو صعبه عليها تفيدها هالمكينة . . 

الساعه ٣ تقريبا يصحى طفلي من النوم أشوف احتياجاته ، الاطفال بعض الاحيان مملييييت بالذات لما يكون مزاجك مو ذاك الزود وهو يبي احد يضحك ويلعب معااه :/ وضع صعب صراحة ، تلقوني لما يصير الوضع مثل هذا أطلع معاه للسوبر ماركت منها أشتري أغراض للبيت ومنها هو يغير جو ، السوبر ماركت عندهم مشووق لما اكتشف منتجات جديده أو أفكار مميزه للاكل صحيح في البدايه عانيت مع الاغراض اللي ابيها لاني ماكنت افهم شنو مكتوب كل شي باللغه التشيكيه والماركات كلها جديده علي تقريبا مو نفس الشركات اللي عندنا بالخليج فصرت أحوس ماعرف اللبن من الحليب من الزبادي من القشطه كلهم نفس التعليب والكلام طبعا ماتفهمين منه شي ، بس الحين خلاص صار اسهل علي من بعد تجارب سابقه عرفت شكل الحليب وشنو يكتبون عالعلبه و شكل المواد الغذائيه الثانيه اللي ابيها . .

الجميل في هالسوبر ماركت أنه مو فقط لأغراض البيت لا هو مكان لاحتياجات الأُسرة كـ كل تحصلون محلات ملابس وشوزات محلات عطور وميكب واجهزة الكترونية وأثاث و ركن ألعاب للاطفال وكافيهات ومطاعم يعني المكان صحيح صغير وبسيط بس فيه متعة . .

هنا في التشيك تغيب الشمس الساعه ٩ ونص مساءا يعني ماشالله يووومهم طويل بشكل ممل اذا كنتي بس جالسة في البيت ، حبينا نغير شوي من طلعاتنا المعتاده للمولات وطلعنا لبحيرة قريبة من عندنا هي حديقة كبيره وفيها بحيرة جميله جددا صراحة ، خذينا عفشنا من سجادة عشان نفرشها ونقعد فيها وضبطت القهوة والشاي و أنواع الكيك والشوكولا والمكسرات وفرشنا بأرضهم وقعدنا " قلبي البدوي الصغير لايتحمل :d "

 الأجانب يطالعون فينا منصدمين ههههههههاي هم صحيح بعد يفرشون بس مايجيبون معاهم أكل ولا قهوة ولا شي أما أحنا ماخذين راحتنا عالآآخر ، والجو وقتها كان جممميل ساكن مافي هوا مزعج أجواء جميلة صراحة . . 

وبعدها ردينا البيت وأجهز العشى وفي أيام تجي أكون جالسة في البيت طول اليوم ويصير محور حياتي او يومي كله يدور في البيت واهتمامي في طفلي ، يعني لا علاقات اجتماعية ولا مواجيب وعزايم وجمعات بعكس حياتي في ديرتي حواليني أهلي وأحبابي ، فيها إيجابيات وفيها سلبيات للأمانه أحيانا جد ودك تبتعدين عن كل هالمواجيب والرسميات وفلانة بتزعل إذا ماحضرتي و فلانة قالت كذا وكذا ، جد أشتاق للعزلة أحيانا بس أنا وطفلي وزوجي ماعندي مسؤوليات ثانية حتى دوام ماعندي ، صحيح الدوام يكون أحيانا ونيس ويوسع الصدر وتغيير جو وتكتسبين خبرات وتجارب من البنات اللي معاك بس بنفس الوقت الروتين والقعدة الصبح وأنتي مجبره متتتتعبـة حلاتها تكون بمزاج عندك مزاج داومي ماعندك نامي لاحسيب ولارقيب ، عموما هذي من الاشياء الايجابية في السفر يكون اهتمامي منصب اكثر على طفلي ومافي أحد ثاني يخرب عليك طريقتك في تربية طفلك لاني عانيت صراحة مع الـ ماما حبيبتي مشكلتها دايم انها تخرب علي جدولي مع طفلي لما نكون عندها خلاص هي تستلم الامور وتخرب أم النظام اللي ماشي عليه طفلي من أكل ونوم و كلللل شي ههههههه ربي يخليها لي :* 

بعد ماأخلص من العشى ونتعشى وكل شي تمام يجي وقت نوم طفلي ينام تقريبا عالساعه ١٠ بالليل بعدها أجلس عالتلفزيون أو أشوف أفلام أو مسرحيات باللابتوب ولازم دلة القهوة جنبي :~] 

وأنام تقريبا عالساعه ١ بالليل واليوم الثاني أصحي ٨ صباحا وهكذا جدولي كل يوم ، بس في الوينكد عندهم اللي هو سبت وأحد لا نقوم متأخر شوي وممكن نطلع أما العاصمة براغ أو مدن ألمانية قريبة أو نروح حدايق أو بحيرات هنا عندنا في تبليتسه . .

وبسس

في هاليوم حاولت آسويلكم جو وآطلع عشان آصور لكم ان شالله كان بوست خفيف وعجبكم لاتنسوني بالدعم والتعليقات . . 

آشوفكم على حب ❤️