سوالف ~ مَـابعد الـوِلادْة ❤

السلام عليكم ورحمة الله ،

موضوع آنطلب مني كثييييير وهو عناية الحامل بنفسها مع الحمال وبعد الولاده ، الموضوع كبير وحاولت أتطرق لـ آهم الجوانب 

من تجربة وحيده لي مع الحمل أقولكم تجربتي البسيطه ، صحيحه أو خاطئه هذا يعتمد حسب نظرة كل شخص وفكرته ، طبعا من الحين أقولكم ترا بعض الأمور ناسيتها لان هالكلام من سنه 

أول ما ربي رزقني وعرفت آني حامل جاني خوف و رهبه كبيييره ، أنا أكبر خواتي وماعندي بنات خاله وعمه كلهم إما كبار حيل أو صغار

وقتها أتذكر سويت بحث عالنت عن الحامل وشنو لازم أسوي وما أسوي ، أكون صريحة في بعض الاشياء إلتزمت فيها وبعضها لا ما قدرت 

أهم شي على الحامل وآساس عنايتها

- الترطيـب وتهيئه الجسم للتمدد ، كنت خايفه من السترتش مارك ماكنت أبي تطلع علامات بجسمي وزوايد ، قريت ان الترطيب يخفف منها ويأخر ظهورها إذا إلتزمتي في الترطيب من أول حملك ، نصحتني صديقتي بـ ( موستيلا ) ترطيب للحوامل ، استخدمته ليما خلص بعدها قلت بغير وخذيت من ( نيفيا لعلامات السترتش مارك ) بعدها استخدمت ( كريم فيتامين سي ) يعني كل مره اجرب كريم ترطيب جديد وكنت ارطب بشكل يومي كامل جسمي

ما أقول ما طلعت علامات بلا طلعت معاي سترتش مارك بس خفيفه جدا وفي مكان واحد من عند الحوض ، وفي كريمات لها بس صراحه ما استخدمتها 

من ضمن الآشياء اللي قريتها وللأمانه ما أتبعتها اللي هي :

- الابتعاد عن المنبهات من قهوة وشاي و مشروبات غازيه ، أنا من عشاق هالأمور ما منعت نفسي بس حاولت أقللها كثر ما أقدر

- الجلسه الصحيحه ، أنا جلستي دايم غلط ما اعرف أقعد مثل الناس أحب ألتوي بالقعده ":) حاولت أعدل نفسي شوي

- الأكل الصحي والإلتزام بـ حبوب الفيتامينات اللي عطاك اياها دكتورتك ، أنا بـعادتي أكلي خفيف وغير صحي ما أقولكم صار صحي لا نفسه ما تغير بس التزمت بالفيتاميناات اللي عطتني اياها دكتورتي

مادري هذا اللي آتذكره وقت حملي 

نجي لـ ما بعد الولاده وهذا آهم شي بالموضوع كله ، أنك ترجعين مثل قبل بصحة ممتازه وجسم سليم ومعافى 

أنا أول يومين من ولادتي كنت في المستشفى فـ ماكليت أدويه الحريم ولا أعشاب ولاشي ، كنت أتريق وأتغدى وأتعشى من أكل المستشفى وأمي كانت تجيبلي دلة شاي أو حليب حار مع زنجبيل يدفيني ، سبحان الله أنا جاني فقدان شهيه والله أني أفتح فمي غصب وأجبر نفسي عالأكل عشان كنت خايفه لان أمي تقول اللي ما تاكل تخرب ويجي معاها أصوات :"((

بعد ماطلعت من المستشفى ورديت البيت أبتدا الشغل على قولة أمي ، كنت ألبس شتوي ولازم أتدفى عدل وألبس ( شيله أو لفه ) عشان هوا المكيف مايدخل بأذني لاني أشغلها ماقدر اعيش بـ هالحر ، تخيلو المعاناة لبس شتوي بـ شهر آغسطس :( 

جدتي كانت محضرتلي أعشاب أشربها و حلبه و تمره  مخلوطه مع رشاد وفلفل أبيض وماخذين دوا ثاني من حرمه ، كنت أشرب كوب أعشاب مره باليوم و إذا قدرت أشرب مرتين ومرات اذا مليت منه سويتلي كوب حليب مع زنجبيل ، كنت أصحى الصبح و أتريق بيض مقلي ، الحلبه كنت أحطها بـ وجبتين الغدا والعشى . . الحلبه أكرررها بسبب ريحتها بالجسم ماتروح بس هي جدددا مهم للجسم بعد الولاده أنا ما آكلها بالدوره الشهريه بس بالاربعين كليتها أول ٢٠ يوم من الولاده بس بعدها خلاص تقدرين توقفينها لان اول ٢٠ يوم أهم شي ، والحلبة معروفه فوايدها وآهميتها 

قريت تنبيهات وأنتي فالأربعين ماتاكلينها وحاولت ألتزم وما أكلها مثل ( الحوامض عصاير أو غيرها / الاشياء اللي فيها لزوجه مثل البيدنجان / الطمام / الرز / المعكرونيا / المشروبات الغازيه / المشروبات البارده )

هذيلا كلهم يأثرون عالرحم وعالدوره ومثل الرز والمعكرونا يطلعون بطن "كرشة" :( حتى يقولون كثرت الماي مو زينة مدري وش الحكمة بس حسب ماقريت لها علاقة بـ ظهور البطن 

حاولي تشربين الآشياء اللي تنظف رحمك من بقايا الدم مثل بعض الآعشاب حلوه وتنظف

قلتلكم أن جاتني لوعه من الآكل ما اشتهي آكل شي كنت أغصب نفسي وأحس بلوووعه خلاص ما أقدر بس مضطره حاولت لين كملت الـ ٢٥ يوم تقريبا بعدها ماصرت آضغط على نفسي ، اللحم أنا خلقه ما أكل لحم أبد والكل كان يجبرني عليه على قولة جدتي حبيبتي : ( اللحم يجبر اللحم ) يعني اللحم إذا كليتيه بيعافي لحمك يعني جسمك :) بس أنا ماكليته أبدد ماقدرت سبحان الله ماحب حتى ريحته 

ومن ضمن اللي قريته للنفاس أنها ماتاخذ شور ، أنا عن نفسي أول يمكن ١٠ ايام ماتسبحت كنت بس يوميا أغسل جسمي بماي وصابون من فوق من عند الرقبه والأندر آرم والصدر من فوق وتحت بعدها أحط بودر ، طبعا ما اقدر اتطيب عشان ماتلتهب الخياط لاني كل ما اشم ريحة عطر أحس بآلام رهيييبه من تحت تقطعني :"( 

رفيقاتي من ضمن نصايحهم لي أن بعد ما تعدين الـ ٣٠ يوم يعني أخر ١٠ أيام من النفاس أو ٥ أيام حطيلك بخور وفيه ( بصل و مره ) قالت أن هذا البخور ينظف ويسكر الرحم ، وسويت اللي قالوه لي تقريبا تبخرت ٣ مرات بس ماقدرت اتحمل الرييييحه :((

وكانت أمي تحطلي طشط " وعاء " في ماي دافي نحط فيه ( مره و ملح ) وأقعد فيه مده ١٠ دقايق ، هذا عشان الخياط تنشف بسرعه ويلتئم الجرح ومطهر بنفس الوقت للمنطقه

دكتورتي عطتني تحاميل مهبليه أحطها أخر الأيام عشان تنظف الرحم وتطلع كل البقايا اللي مانزلت ، ناسيه أسمها أكيد في أنواع كثيره أنا حطيتها ٤ مرات تقريبا وكانت أول مره تلللسع من داخل وحسب ماقريت عنها ان اللسع عشان تطهر المنطقه بس المرات اللي بعدها ما حسيت باللسع . . 

وبالنسبه لـ عنايتك لما بعد الأربعين ضروري الحمامات المغربيه حاولي أنتي تسوينها لنفسك أو تجيبي أحد يساعدك ويسويلك عشان تنظفي جسمك وتزيلي الجلد الميت و تفتحي المسام ، أنا وقتها سويت بنفسي حمامي المغربي عندي الصابونه المغربيه والليفه وقمت أفرك نفسي كثر ما أقدر وسويتها أكثر من مره قبل لا آطلع من الأربعين عشان أتأكد أني نظفت جسمي عدل لان ماعندي خيمة البخار بس بحمامي العادي وآنتو بكرامة والترطيب أكيد ما أنساها على طول عودي نفسك وخليه روتين يومي تاخذين شور خفيف جسمك بس وترطبينه . .

من ضمن الآشياء اللي سويتها قبل ما آطلع من الأربعين يعني من ٣٥ يوم وشفت نفسي نظيفه بدت مشاوير العنايه بنفسي ، عملت مرتين تقريبا حمام زيت لشعري و عملت جلسة ليزر لأني كنت قبل زواجي مسويه ليزر وبعد ماتزوجت وقفته لان ممكن أحمل بأي وقت وطول مدة حملي أكيد ماسويت والحين رديت لـ جلسات الليزر ، وما ننسى بشرتنا بعد تعب الولاده سويت تنظيف بشرة جلسة وحده المفروض اكثر من جلسه بس ماقدرت التزم وانشغلت مع الطفل . 

وبس هذا اللي تذكرته ☺

وأن شالله الموضوع فادكم لو الشي البسيط 

ولكل بنت حامل الله يسهل عليك يارب

وعندكم موضوع جميل للـ بلوقر #قورجس 

تكلمت عن " روتين الآربعين " وموضوعها جمييل جدددا 

تلقونه في هالرابط
Here

آشوفكم على حب ❤