10 points ❤ to buy make-up | أساسيات الميـكب

السلام عليكم ورحمة الله ،

في كثييير من البنات المراهقات أو حتى تكون بالعشرينات ماعندها اهتمام بالميكب وماتعرف  تحط لها ميكب ، وتجي تبي تتعلم للميكب بس تحتار شنو لازم تشتري ! شنو الأساسيات في الميكب والأشياء الضروريه ! في كثيير بنات راحو قسم التجميل واحتارو من كثر الماركات والخيارات الموجوده شنو تشتري وشنو ماتشتري ، ومرات تشتري أشياء بس ماعرفت طريقة استخدامها أو أختارت المنتج الخطأ وماناسبها 

أنا كنت من ضمن هالبنات وصل عمري ١٨ سنه وانا ما اعرف احط ميكب واصلا ماكان عندي ميكب أبدددد ، بس عندي قلوسات ألوان  ، ما كنت اهتم له كانت اهتماماتي مُغايره تماما

وفجأة بيوم وليلة قلت لا لازم أتعلم عالميكب وأعرف أسوي لنفسي ، رحت وشريت ميكب كثير بس اغلبه بلا فايده وماعرفت الدرجات اللي تناسبني ، قمت أشوف فيديوهات باليوتيوب تعليم مكياج وأحاول أقلدهم بالطريقه وكنت اشتري بعض اللي يستخدمونه في الفيديو بس هذا شي (( خطأ )) لان مو شرط ان ناسب صاحبة الفيديو أو ناسب صديقتك بيناسبك انتي بعد

عموما أنا اليوم بحاول أذكر لكم منتجات أساسيه في الميكب لازم تكون عندك عشان تبلشي تسوي وتتعلمي ميكب بنفسك ، وبذكر لكم من ماركات من وجهة نظري جيده ولك حرية الاختيار فيها

أول منتج وأهم منتج

 ( الفاونديشن / كريم الآساس )

أهم شي تعرفي لون بشرتك واللي يناسبها خلي الموظفه تحطلك على ايدك واختاري الدرجة القريبه من بشرتك واذا عندهم غرفه خاصه جربيه على بشرتك أفضل ، من وجهة نظري حاولي تاخذين درجة أفتح منك بشوي ، ابدا لا تاخذين درجة اغمق منك ولا افتح منك بكثيير 

الفاونديشن أنواع في

 ( Full Cover ) يعني تغطيته كبيره اذا كانت بشرتك فيها حبوب كثير وهالات سودة و تصبغات ومشاكل كثيره هذا ينفعك لان راح يخفيهم ويطلع بشرتك صافيه 

في اللي تغطيته ( متوسطه / خفيفه ) هنا انتي راح تعرفين اذا مشاكل بشرتك خفيفه ماله داعي هالـ فل كفر اكتفي بالمتوسط أو الخفيفه 

من أشهر أنواع الفاونديشن وأفضلهم وممكن ينفعونك عشان ماتضيعين سألي الموظفه عنهم وجربيهم بنفسك ، وطبعا هذيلا نماذج لك مو شرط تاخذين مثلهم 

Dolce & Gabbana perfect luminous liquid foundation

Diorskin Star Foundation

Dolce & Gabbana Matte Liquid Foundation

إذا كان عندك دوام بشكل يومي أنصحك ابتعدي عن الفاونديشن و أستخدمي الـ ( BB cream ) 

هو كريم فيه نسبة ترطيب للبشرة وحماية من الشمس و يعطيك لون مثل الفاونديشن بس لان الفاونديشن ثقيل ماينفع تحطينه كل يوم راح يتعب بشرتك الافضل الـ بي بي كريم لانه خفيف عالبشرة ويعطيك مظهر طبيعي ويناسب اللي يداومون 

وطبعا في أنواع كثيره من كل الماركات جربيهم بنفسك واختاري 

ثانيا : ( الكومباكت / بودرة الوجه ) 

البودرة توضع بعد الكريم وممكن تستخدم بروحها ، تساعد على تثبيت الكريم و اذا كانت بشرتك دهنيه فـ الكريم بعد مدة راح يبين لمعة بشرتك الدهنيه فـ البودرة تحد من ظهور هاللمعه ويدوم معاك الكريم مدة أطول

من اللي أحبهم بودرة ماك 

اسمها MAC Studio Fix Powder

Maybelline Dream Matte Powder

ثالثا : ( كونتور + إضاءة + بلشر )

الكنتور هو لون بني يستخدم لتحديد الوجنتين وبعض تفاصيل الوجه منها تصغير الأنف . . 

البلشر يأتي بعد الكونتور لـ توريد الوجنتين 

الإضاءة تستخدم بعد البلشر وهي لإبراز بعض تفاصيل الوجه وتعطيها بريق منها منطقة الوجنتين وتحت الحاجب 

وأفضل منتج بالنسبه لي و مريح يجمعلي الثلاثة في علبه وحده يعني بدل ما اشتري إضاءة بروحها و بلشر و كونتور هذا أقل تكلفة 

Sleek face form

رابعا : ( الكونسيلر / خافي العيوب )

شي مهم للي عندهم هالات سودة وحبوب يبون يخفونها ، وممكن تستخدم الدرجة الفاتحه منه كـ إضاءة لتحت العين بس تحت العين منطقه الهالات ، راح يخفي السواد ويساوي لون بشرتك ، ايضا له استخدامات كثيره من بس لتحت العين ممكن عند اطراف الشفايف و المنطقة اللي بين الحاجبين 

ومن أجمل الأنواع 

maybelline concealer

خامسا : ( آي لاينر / كحل سائل )

الكحل السائل كثير بنات يشوفونه صعب ومايعرفون طريقة رسم العين ، في البدايه فعلا صعب بس لازم الممارسة اليومية كل يوم جربي في عينك وارسم وامسحي راح تخطئين كثير يا عين تختلف عن الثانيه يا يطبع الكحل فوق بس عاااااادي استمري وشوفي فيديوهات كثير لطريقة رسم العين ، وأهم شي أعرفي رسمة عينك وش يناسبك مو كل رسمات الكحل تناسب جميع العيون أعررفي اللي يناسبك 

من أجمل أنواع الكحل السائل واللي أحب أستخدمها 

The balm eyeliner 

ومن ( محمود سعيد ) جميييل كحلهم

سادسا : ( جل الحواجب )

مايكتمل شكلك بدون حواجب جميله ومرتبه و جل الحواجب يرسمها لك اذا كانت محتاجة تضبيط أو خفيفه وفي فراغات بين الشعر تقدرين عن طريق الفرشة تضبطينها

حاليا أنا أستخدم من ماركة " ميكب فورايفر " وكثييير يمدحونه ويستخدمونه

سابعا : ( آي شادو / ظلال العيون )

خطوة جماليه أخرى ممكن تستغنين عنها وتكتفين في ماذكر بالسابق بالنسبه لميكب النهار لكن اذا تبين ميكب لليل أو سهره ظلال العيون تعطي جمال لمن يعرف استخدامها واختيار ألوان مناسبه وتليق بالشكل العام ، كأول خطوه لتعلم الميكب اكتفي بلون واحد لظلال العيون بعدها تعلمي كيفية مزج لونين أو أكثر بطريقه تناسقيه ملائمة 

ماأقدر أحددلك علبة ظلال عيون واحده ، لان الخيارات الموجوده بالسوق بالملايين وهذا يعتمد على اختياراتك وذوقك ، بالنسبه لي دايما أبحث عن الألوان الترابيه الهاديه وغالب ظلال العيون اللي عندي بنفس الألوان

اذا كنتي مثلي تحبين الألوان الترابيه فأنا أرشح لك علبة ظلال العيون من ماركة " إيربن ديكاي Urban Decay " 

ألوانه جميييييله جداااا وتناااسبني جداااا ونزل من هالعلبه ٣ أنواع بنفس الأسم مع اختلاف الرقم " ١/٢/٣ " وأنا أفضل العلبه ١ 

ثامنا : ( ماسكارا الرموش ) 

ومن ضمن الخطوات المهمه لإبراز الـ لوك أو الشكل النهائي هي الماسكارا ضروووريه جدددا عشان تعطي عيونك أنفتاح أكثر و بروز للعين وجماليه للعين ، و برأيي الماسكارا تغني أحيانا عن الكحل لو تبرزين رموشك بطريقه حلوه راح يكون شي ناعم ويناسب طلعات النهار ، لكن عمر الميكب مايكتمل بدون رموش عالاقل من وجهة نظري 

ColliStar mascara

تاسعا : ( روج / أحمر شفاة )

خطوة نهائية ومهمه كذلك وسهله جدا وهي روج لشفايفك ، هنا خياراتك كثييره بالنسبه للألوان والماركات مافي شي مميز بحد ذاته الكل يجرب وياخذ اللي يناسبه ، بالنسبه لي عندي ماركات متنوعه من الأرواج ( Mac, Nyx, UrbanDecay, LauraMercier, YSL ) والعدييييد من الماركات اختاري اللي يعجبك 

ومن باب الذكر أنا أحب الأرواج " المطفيه " اللي ماتكون فيها لمعه وبالغالبه أخذهم من ماك 

من الاسامي من اليسار إلي اليمين

 Hue, Creme Cup, Playing Koi, Shy Girl, Lady Gaga

عاشرا : ( تهيئة الوجه )

هذي خطوه أنصح فيها رغم أن ممكن تستغنين عنها وهي بخاخ لـ تثبيت الوجه وتهيئته للميكب ، هذا يستخدم قبل الميكب وبعد ماتخلصين من الميكب ، يخلي وجهك فريش و ثابت و ماجربت هالبخاخ إلا من ماركة "ماك " وكان جميييل جدددا 

FIX BRUME FIXANTE RAFRAICHISSANTE 

" الصور طبعا كلها اليوم من النت "

بالنسبه لـ ( فرش الميكب Brush ) 

أكون صريحة معاكم أنا ما أستخدم فرش كل شي أسويه بإيدي ، الفاونديشن و الكونسيلر والشادو كلهم عن طريق أصابع اليد ، الفرش عندي قلييل جدا ومايستخدمون هي بس فرشة الكونتور والبلشر أستخدمها وفي فرشة صغيره حق ظلال العيون اذا كنت بحطه بكفسة أو طعجة العين " أن شالله فهمتوها :d "

 لا تقولون الميكب مايضبط بدون الفرش أو أسفنجة التوزيع ، لا عادي أنا لي كم سنه والميكب أسويه وأوزعه بطريقه حلوه الحمدلله ماكان فيه عيوب ، أصلا في البدايه أنصح فاليد عشان تتعلمي وإذا كنتي حابه فرش نصيييحة لا تشترين فرش مجموعة كامله وسعرها غالي لان ممكن ماتعرفين تستخدمين و راح تهملينهم وحرام المبلغ فيها

لان بعض الفرش مثل ( سيقما ) حلوة مجموعتها بس سعرها مو رخيص و هي أساسا للمحترفين فهذي نصيحتي لك

عموما هذي كانت لمحة بسيطه عن أساسيات الميكب وشنو محتاجة يكون عندك من أدوات ، ممكن في أشياء ثانيه من وجهة نظري تعتبر ثانويه وليست أساسيه فما حبيت أذكرها ، فإذا كنتي محتاره وش تشترين ميكب ذكرتلك فوق أهم الأشياء مع بعض الأقتراحات اللي ممكن تفيدك وتساعدك ، هذي كخطوه أولى بالنسبه لك عشان تتعلمين أما الخطوة الثانيه هي شوفي فيديوهات تعليم مكياج من اليوتيوب سواء عربيات أو أجنبيات وحاولي تقلدينهم وتتبعينهم ، ماأنصح بـ دورات التدريب أحسها مكلفه وأنتي مو محتاجه لها ، في بيتك وأنت على سريرك مرتاحه وشغلي اللابتوب أو من جوالك وتفرجي على أشهر خبيرات التجميل بالعالم والبلوقرز 

وبسسس

أن شالله عجبكم الموضوع وأستني أكييد تعليقاتكم و رأيكم وأي أقتراحات لمواضيع جايه قولولي 

ولاتنسون تعملولي فولو عالـ أنستقرام @_lecristal و الآشتراك في المدونة

وآشوفكم على حب ❤