My skincare routine | روتيني اليومي للعناية في بشرتي

السلام عليكم ورحمة الله ،

روتيني اليومي للعنايه في بشرتي ، بيني وبينكم ترا انا من سنتين يمكن بديت أهتم في بشرتي لله الحمد انا ماعندي مشاكل كبيره بس حبوب خفيفه تجي وتروح في منطقه الجبهة وهذا امر عادي بسبب الهرمونات وهالامور ، انا بشرتي مختلطه إلى دهنيه وقلت لكم سابقا ماكنت اهتم في بشرتي وماكنت احط عليها شي بس يمكن ساعات قبل ما انام اتدهن بفازلين :d عجييييب هالفازلين احس بنعومه عقب مااقوم من النوم ، والسبب اللي خلاني اهمل بشرتي لاني كنت اشوفها زينه مو محتاجه شي وبنفس الوقت اخاف استخدم شي وتجي الامور عكسيه يعني بدل ماتصير احلا من قبل تصير أسوء وفوق هذا انا وحده كسوله في السابق وماحب التزم في كريمات او شي مده طووويله ، ومن فترة سنتين تقريبا قلت لا انا محتاجه اهتم في بشرتي لان العمر يمشي والبشره مع تقدم العمر تتعب وتفقد امور فـ بديت استخدم غسول شبه يومي وكريم ترطيب فقط لاغير وبين فترة والثانيه اضيف شي بسيط عليهم واغير بعض الامور واجرب بعض الاشياء 

حاليا روتيني الشبه يومي يعني مو كل يوم اسوي هالامور لا اسويها ممكن يوم وترك " يوم إي ويوم لا " وهذا شي يناسبني عشان ما أمل من الروتين والتكرار اليومي وأسويه بالغالب قبل النوم أو اذا عندي مناسبه أحب انظف بشرتي قبل ما أحط الميكب 

أول خطوة : 

أستخدم غسول " نيتروجينا " أنظف الوجه تماما من أي أثار أو بقايا ميكب وغيره وبالنسبه للغسول أنا أحب أجرب في كل مره غسول بالغالب استخدم كلين اند كلير و نيتروجينا ، أحط شوي من الغسول في يدي وأبللها بالماء شوي بحيث تكون عندي رغوه واحطها في وجهي اوزعها بالكامل بعدها أستخدم جهاز التنظيف الخاص للبشرة " كلاريسونك " هالشي الجميل يوفر عليك عناء التنظيف شي بسيط بس تحطينه على بشرتك وهو يقوم بالمهمه وهو فيه مؤقت يعني أنظف الجبهة بعدها يعطيني صوت ويتوقف ثواني عشان انتقل للمنطقه اللي بعدها وهكذا إلى ان يتوقف الجهاز عن العمل خلاص يعني خلصتي تنظيف . . 

( طبعا اعتذر نسيت أصور الكلاريسونك بس تقدرون تشوفونها في بوست المشتريات اللي قبله ) 

الخطوة الثانيه : 

بعد ما أتأكد من نظافة البشرة و أجففها من الماء أستخدم " ماسك " عندي أكثر من نوع للماسكات نوع من ماركة فريش ماسك بماء الورد و ماسكات أخرى من ماركة قلام قلو ، طبعا مو كلهم استخدمهم بنفس اليوم لا في كل مره استخدم شي جديد يعني اليوم أستخدمت ماسك قلام قلو الابيض العلاجي في اليوم اللي بعده استخدم ماسك ماء الورد ، لان ماسكات قلام قلو مو يوميه لا هي فقط ٣ مرات ممكن بالاسبوع وعند الحاجه أما ماسك ماء الورد فهو للاستخدام اليومي ، اوزع الماسك على بشرتي واتركه دقايق مابين الـ ١٠ دقايق إلى٢٠ دقيقه عشان تاخذ البشرة كفايتها من الماسك والمواد اللي فيه بعدها انظفها عدل من الماسك 

عندي ماسكات خاصه للعين من قلام قلو تنحط تحت العين حوالين المنطقه واوزعها عدل بالجهتين واتركها دقايق بعدها اغسلها ، وهذا الماسك مفيد لازاله السواد والتعب والتصبغات اللي تحت العين ويحسن من مظهرها ( حسب ماهو مكتوب ) 

الخطوة الثالثة :

خطوة مهمة جدا وهي الترطيب بعد اللي سويناه تحتاج البشرة تترطب وترتاح " كريم مرطب بفيتامين سي " من بيت الصابون اللبناني ، من فترة صايره استخدم هالكريم لان مكوناته حبيتها هو كريم ترطيب فيتامين سي وحماية من الشمس وهذا الكريم حسب ماهو مكتوب كريم مبيض و يزيل التصبغات والكلف ويصفي البشرة ، مالاحظت هالاشياء هذي من ناحية انه مبيض بس للامانه انا استخدمته تجربه بعد مايخلص ماظن بشتريه مره ثانيه ممكن اجرب كريمات غيره ، اوزع الكريم بالوجه كامل وحتى منطقه الرقبه لاننساها تحتاج اهتمام وترطيب مثل بشرة الوجه عشان لما تبان مع وجهك مايلاحظون انهم مختلفين عن بعض لازم تكون مثل وجهك 

هذي هي خطواتي البسيطة ومافيها تكلف ، تقدرين انتي تسوين نفس هالروتين لعنايتك بس مع اختلاف المنتجات اختاري المنتجات اللي تناسبك وترتاحين لها ، مو كل غالي يعني نتايجه ممتازه لا في كثير منتجات رخيصه وفي متناول اليد ونتايجها جميله عليك انتي اللي تختارين لان السوق ملياااان والناس اذواق 

وبس

آشوفكم على حب ❤️