Friday, August 8, 2014

Shopping in London | التسوق في لنـدن





السلام عليكم ورحمة الله ،



موضوع اليوم للأمانه ما كنت مخططه له ولا كنت مفكره اسويه ، بس أحد الخوات طلبت مني تعرف أكثر عن لندن من ناحيه الشوبينق لانها بتسافر لها الشهر الجاي 

فـ هالموضوع الصغير أهداء لها ولكل من بيسافر لندن 


أعذروني في هالموضوع بخليه مختصر عن التسوق في لندن فقط والماركات المهمه هناك وايضا للاسف ماعندي صور لاني رايحه لها بـ ٢٠١١ فمضطره استعيد بصور النت شوي 


لندن عاصمة التسوق بلا منازع أحلى سوق شفته بحياتي انسحرت من جمالها وأجواءها


شنو تشترين من لندن . . !

السؤال اللي حير الملايين من البنات ، في كثير ماركات غاليه أو رخيصه مو عندنا 


• بريمارك ❤


وأنتي في شارع الأكسفورد راح تلاقين مول صغير شوي من برا يمكن بس من داخل عالم كبير تقريبا ٣ ادوار اذا مو ناسيه
هذا كل شي تحصلين فيه ملابس طلعه أو بجامات للبيت ، اكسسوارات ، الملابس الداخليه عندهم ماتتفوت وجوده ممتازه ، شوزات ، شنط
والأحلى من هذا الأسعار مناسبه أو رخيصه بشكل كبير ، اتذكر اني شريت منهم لـِ سنه قدام . . لان جودتها زينه وفوق هذا السعر حلو 
حق العروسه اللي تجهز ينفع لها ويناسب ميزانيتها وأحسن لها من الأماكن الغاليه 



• الصيدلية الجماليه


كل صيدليه في لندن ادخليها راح تلقين شغلات تتعجبين منها من ماركات ميكب مو موجوده عندنا اسعارها رخيصه مثل Sleek
آرواج هالماركة حلوه والشادو بعد وكثير من الماركات الجديده عليكم
غير آصباغ الآظافر بأنواعها و شغلات الحريم من مناديل مزيلة مكياج واشياء صغيره يمكن ماتنتبهون لها بالصيدليه فـ أمشي فيها على راحتك 


• سليفردج 


مول كبير وحلو فيه كافيهات بالدور الارضي ، ماركات عالميه شنط وعطور وملابس جدددا جميل التسوق فيه اسألوهم عن البضايع الحصريه عندهم ، في اشياء كثيره مو متوفره بالخليج تقريبا
انا راح أقولكم اللي أعرف انها مو متوفره عندي بالكويت بس ممكن موجوده بدول الخليج 
وممكن لا

عندك في هالمول ماركة Trish McEvoy مميز شغلهم عطووورهم روعه و ميكبهم جميل

عندهم تاتو لليد قليتر يجنننن وشغلات للشعر 

انصحك تشوفينه على مهلك بتحصلين اشياء حلووووه للغايه


(( كل الآشياء اللي ذكرتها فوق بشارع واحد - شارع الاكسفورد )) 


• تروكاديرو



مثل المول طوابق في شارع البيكاديلي شكله من الخارج مايشجع بس داخله اشياء حلووووه 
خصوصا اذا تبين هدايا لأهلك منااسب جداا وفيه جميع انواع الهدايا من شنط لندن ، أكواب ، مواعين ، اكسسوارات ، بروش ، ميداليات وغيرهم من الاشياء الكيوت


• قرية البسترفيلج ( آوت ليت )


يبعد ساعتين تقريبا بالقطار عن لندن ، هي قريه كبيره فيها بضايع السنه اللي فاتت واسعارها بنص القيمة ، شي فوووق الخيال والاسعار رووووعه تحصلين أشهر الماركات فيه " ديور - سيلين - بولو - دولتشي اند قابانا - فالنتينو " واكثر واكثر 

فضييييع هالمكان أتذكر من جماله ما كان ودي  اطلع منه بس لازم لانهم بيسكرون ونصيحه روحو له الصبح لانه الساعه ٤ العصر يسكر 
، وللي بتجهز لعرسها صج ينفع لها ماركات باسعار حلوه 


• جون لويس 


مول حلو واسعار زينه اكثر من طابق وكل احتياجاتك من ملابس وشنط وشوزات و اكسسوارات وحتى قطع للمطبخ موجودين فيه
، فيه ماركات جيده واسعارها مقارنه بالمولات الثانيه رخيصه 

حتى المحلات المشهوره اللي عندنا مثل " زارا - فورايفر٢١ - نيكست - دبنهامز " ادخلوها راح تحسون بفرق كبير بين بضاعتنا وبضاعتهم 
كنت وقتها اقول مابي ادخل هالمحلات دام عندنا بس يوم دخلتها وشفت جمال الموديلات والقطع خذيت منهم وتصدقون لليوم ماشفت نفسهم بمحلاتنا 


• ويست فيلد 


يبعد مسافه شوي عن شارع الاكسفورد لازم بسياره تروحون له ، مول رااااقي ويجنننن في مطاعم في الادوار اللي فوق و محلاته رووعه وغالبها جديده و مو موجوده بالخليج ، وانتي اذا كنتي عارفه محلاتكم ومولاتكم وش فيها بتعرفون شنو الجديد 


• سوق السبت / سوق الأحد


للي يبون بضايع أو هدايا رخيصه تحصلونها في هالاسواق ، هي اسواق شعبيه بسيطه بالهواء الطلق وطول الشارع الناس تبيع فيه 
، مو مواد غذائيه و ملابس و اكسسوارات تنفع كهدايا 


• هارودز


غني عن التعريف ومشهور جدا فيه ماركات عالميه من عطور ومكياج و ملابس ومجوهرات ، حلوو تتمشين فيه وتشوفينه بس انا ماحبيته من كثر الزحمه وحجمه صغير هو تقريبا ٣ او ٤ ادوار

وبالنسبه للماركات اللي موجوده فيه انا خذيت شنطة من " بربري " ولما رديت الكويت بعد ٧ شهور نزلت شنطتي في المحل عندنا و السعر كان أغلى من سعر شنطتي كان الفرق ١٠٠ دينار يعني أنا الكسبانه 


• ديزني


محل كيوووووت رووووعه لمحبي الاكواب والالعاب و الصحون و الكتب والاقلام وملابس الاطفال على شخصيات ديزني كل شي في المحل ديزني يجننننن ياخذك لعالم الطفوله 


• هامليز



مول كبير من ٥ ادوار تقريبا كللله لعب للأطفال كل شي يحبونه الأولاد والبنات موجود فيه ، أنا سحرني من جماله وأنا شخص كبير واتذكر شريتلي صبغ أظافر يجنننووون مثل القلم عشان ارسم على اظافري أشكال . .
أخواني اخذو لعبه الساحر و كتيبات يكتبون فيها بأقلام سحريه 
يعني فعلا الاشياء اللي فيه تناسب غالبيه أعمار البنات من الطفوله إلى المراهقه وحسب طبعا ميول البنت 



هذا اللي قدرت أتذكرت أتمنى تعذروني 
وان شالله تكون البنت اللي سألتني أستفادت
وأي سؤال أنا حاضر 



وبس


آشوفكم على حب ❤

8 comments:

  1. الله يجزاك خير حبيبتي ❤️❤️❤️❤️❤️❤️

    ReplyDelete
    Replies
    1. العفوو ي قلبي وان شالله فادك لو شي بسيط ❤

      Delete
  2. This comment has been removed by a blog administrator.

    ReplyDelete
    Replies
    1. حبيبتي شكرا واعتذر مسحت التعليق بالغلط ❤

      Delete
  3. للحصول على شنط ماركات بافضل الاسعار
    زور موقعنا
    http://goo.gl/EJrU1x

    ReplyDelete
  4. viabox.com يقبل البت كوينز للتسوق من امريكا و يشحن المشتريات الي باب منزلك

    ReplyDelete
  5. I love London and i adore shopping
    Pliz guys follow me on my page women 's world
    www.ra1992ta@plospot.com

    ReplyDelete